ମହାକାଳପଡ଼ା, ୩ା୧ (ଡି.ଏନ୍.ଏ.):କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ନିକଟ ଗୋବରୀ ନଦୀ ଉପରେ ସେତୁ ନିର୍ମାଣକୁ ନେଇ ଅନିଶ୍ଚିତତା ଲାଗି ରହିଛି ବୋଲି କୁହାଯାଇଛି। ଏହି ସେତୁ ରାଜ୍ୟ ପୂର୍ତ୍ତ ବିଭାଗ ପକ୍ଷରୁ ନିର୍ମାଣ କରାଯାଉଥିଲେ ମଧ୍ୟ ଦାୟିତ୍ୱ ନିର୍ବାହ କରୁଥିବା ଠିକାଦାର (ପଢ଼ିଆରୀ କନ୍ଷ୍ଟ୍ରକଶନ) ସେତୁ ନିର୍ମାଣ ଅଧା କରି ସ୍ଥାନ ଛାଡ଼ି ନିଜର ସରଞ୍ଜାମ ନେଇଯାଇଛି। ଏହି ଚଣ୍ଡିଆପଲ୍ଲୀ-ମହାକାଳପଡ଼ା ଗୋବରୀ ସେତୁ ହୋଇଥିଲେ ବ୍ଲକ ମୁଖ୍ୟ କାର୍ଯ୍ୟାଳୟରୁ ଦେଉଳିପଡ଼ା, ବିଜୟନଗର, ବଡିଢ଼ି, ଗୋଗୁଆ, ସୁନିତି, ନାଞ୍ଜୁରା, ଜମ୍ବୁ ଓ କେବିଦାଣ୍ଡୁଆ ପଞ୍ଚାୟତର ଶତାଧିକ ଜନସାଧାରଣ ସିଧାସଳଖ ଯାତାୟାତର ବାଟ ଖୋଲିଥାନ୍ତା।
ସୂଚନାଯୋଗ୍ୟ, ଗୋବରୀ ନଦୀ ଉପରେ ୧୯୮୮ରେ ତତ୍କାଳୀନ ମୁଖ୍ୟମନ୍ତ୍ରୀ ଜାନକୀ ବଲ୍ଲଭ ପଟ୍ଟନାୟକ କିୟାରବାଙ୍କ ହାଟଠାରେ ଗୋବରୀ ସେତୁ ନିର୍ମାଣ ପାଇଁ ଶିଳାନ୍ୟାସ କରିଥିଲେ। ପରେ ଗୋବରୀ ନଦୀ ଉପରେ ସେତୁ ନିର୍ମାଣ ହୋଇଥିଲା। ଅଧା ପିଲାର ନିର୍ମାଣ ହୋଇଛି ଓ ଅନିଶ୍ଚିତତା ମଧ୍ୟରେ ଏହା ରହିଛି। ତେବେ ପ୍ରକଳ୍ପ ବନ୍ଦ ହେବା ପରେ ପରବର୍ତ୍ତୀ ସମୟରେ ବିଭାଗ କି ପଦକ୍ଷେପ ଗ୍ରହଣ କରିବେ ସ୍ଥାନୀୟ ଲୋକମାନଙ୍କ ମନରେ ସନ୍ଦେହ ପ୍ରକାଶ ପାଇଥିଲା। ପରବର୍ତ୍ତୀ ସମୟରେ ଲୋକମାନଙ୍କ ଯାତାୟାତ ପାଇଁ ଚଣ୍ଡିଆପଲ୍ଲୀ-ମହାକାଳପଡ଼ା ଗୋବରୀ ସେତୁ ନିର୍ମାଣ ନିମନ୍ତେ ୨୦୧୬ ନଭେମ୍ବର ୮ରେ ସ୍ଥାନୀୟ ବାୟାବାବା କଲେଜ ପଡ଼ିଆରେ ଅନୁଷ୍ଠିତ ଏକ ସାଧାରଣ ସଭାରେ ଯୋଗଦେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗୋବରୀ ସେତୁ ନିର୍ମାଣ ପାଇଁ ଶିଳାନ୍ୟାସ କରିଥିଲେ। ଏହି ପ୍ରକଳ୍ପ ପାଇଁ ପ୍ରଥମ ପର୍ଯ୍ୟାୟରେ ୨୨ କୋଟି ଟଙ୍କା ମଞ୍ଜୁର ହୋଇଥିଲା। ସେତୁ ନିର୍ମାଣ କାମ ଚାଲିଥିଲା। ଏହି ସେତୁ ନିର୍ମାଣରେ ଗୋବରୀ ନଦୀର ଦୁଇପାର୍ଶ୍ୱରେ ଦୁଇଟି ପିଲର ନିର୍ମାଣ କାମ ସାରି ଦେଇ ୨୦୨୨ ଡିସେମ୍ବର ଶେଷ ସପ୍ତାହରେ ଠିକାଦାର ପଳାୟନ କରିଛନ୍ତି। ସେତୁ ନିର୍ମାଣ ଅଧା ଛାଡ଼ି କାହିଁକି ଠିକାଦାର କାମ ବନ୍ଦ କଲେ ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ଏ ସମ୍ପର୍କରେ କେନ୍ଦ୍ରାପଡ଼ା ପୂର୍ତ୍ତ ବିଭାଗ ଅଧୀକ୍ଷଣ ଯନ୍ତ୍ରୀ ସରୋଜ କୁମାର ନାୟକଙ୍କୁ ପଚାରିବାରେ ଉକ୍ତ ସେତୁ ନିର୍ମାଣ ପାଇଁ ପୁନର୍ବାର ଟେଣ୍ଡର କରାଯିବ ବୋଲି ସେ କହିଛନ୍ତି।
