ନୂଆଦିଲ୍ଲୀ,୮।୧: ଅଧାରେ ରହିପାରେ ପାକିସ୍ତାନ ଏବଂ ଏହାର କ୍ରିକେଟ ବୋର୍ଡ ପିସିବିର ଆଶା। କାରଣ ଦଳ ହାତରୁ ଚାମ୍ପିଅନ୍ସ ଟ୍ରଫି ଆୟୋଜକ ହେବାର କ୍ଷମତା ଚାଲିଯାଇପାରେ। କାରଣ ଏହାର ସ୍ଥାନ ନିର୍ଦ୍ଧାରିତ ହୋଇନାହିଁ। ଜାନୁଆରୀ ୧୯ରୁ ଚାମ୍ପିଅନ୍ସ ଟ୍ରଫି ଖେଳାଯିବ। ପ୍ରଥମ ମ୍ୟାଚ୍ ପାକିସ୍ତାନରେ ଖେଳାଯିବ। ଟୁର୍ନାମେଣ୍ଟର ମୁକାବିଲା ପାକିସ୍ତାନର ୩ ଷ୍ଟାଡିୟମ ଲାହୋର, ରାଓ୍ବଲପିଣ୍ଡି ଏବଂ କରାଚିରେ ହେବ। ହେଲେ ଏବେଯାଏ ଏହି ଷ୍ଟାଡିୟମକୁ ପ୍ରସ୍ତୁତ କରାଯାଇନାହିଁ।
ଚାମ୍ପିଅନ୍ସ ଟ୍ରଫି ଆରମ୍ଭ ହେବାକୁ ଏବେ ମାତ୍ର ୪୦ ଦିନ ଅଛି। ପାକିସ୍ତାନର ତିନୋଟି ଯାକ ଷ୍ଟାଡିୟମ୍ରେ ନିର୍ମାଣ କାର୍ଯ୍ୟ ଜାରି ରହିଛି। ଆସନ୍ତା ସପ୍ତାହରେ ଆଇସିସି ଅଧିକାରୀ ପାକିସ୍ତାନ ଯାଇ କରାଚି, ରାଓ୍ବଲପିଣ୍ଡି ଏବଂ ଲାହୋର ଷ୍ଟାଡିୟମ ପରିଦର୍ଶନ କରି ସ୍ଥିତି ପରଖିବେ। ପିସିବି ଯଦି ସେହି ଡେଡ୍ଲାଇନ୍ ଟପିଯାଏ ତେବେ ଟୁର୍ନାମେଣ୍ଟ ପାକିସ୍ତାନ ହାତରୁ ଚାଲିଯାଇପାରେ। ସେମିତିରେ ୟୁଏଇରେ ଚାମ୍ପିଅନ୍ସ ଟ୍ରଫି ଆୟୋଜିତ କରାଯାଇପାରେ।
କହିରଖୁଛୁ, ପାକିସ୍ତାନ କ୍ରିକେଟ ବୋର୍ଡ ଆଇସିସି ସହ ଭାରତୀୟ ଟିମ୍ ଖେଳିବାକୁ ନେଇ ବିତର୍କ ରଖିଥିଲା। ଟୁର୍ନାମେଣ୍ଟ ଖେଳିବାକୁ ଟିମ୍ ପଡ଼ୋଶୀ ଦେଶ ପାକିସ୍ତାନକୁ ଆସୁ ବୋଲିି ପିସିବି ଚାହୁଁଥିଲା। ହେଲେ ବିସିସିଆଇ ଖେଳାଳି ଟୁର୍ନାମେଣ୍ଟ ଲାଗି ପାକିସ୍ତାନ ଯିବେ ନାହିଁ ବୋଲି ମନା କରିଥିଲେ। ଶେଷରେ ହାଇବ୍ରିଡ୍ ମଡେଲ ଲାଗି ପିସିବି ରାଜି ହୋଇଛି। ଟିମ୍ ଇଣ୍ଡିଆ ଦୁବାଇରେ ନିଜର ମ୍ୟାଚ୍ ଖେଳିବ। ହେଲେ ଯଦି ସମ୍ପୂର୍ଣ୍ଣ ଟୁର୍ନାମେଣ୍ଟ ଦୁବାଇରେ ଖେଳାଯିବ ତେବେ ପାକିସ୍ତାନର ସମ୍ମାନ ଅନ୍ତର୍ଜାତୀୟ କ୍ରିକେଟସ୍ତରରେ ହ୍ରାସ ପାଇବ।
