ନୂଆଦିଲ୍ଲୀ,୨୭।୫: ହାତକୁ ଦୁଇହାତ ହୋଇଛନ୍ତି ଭାରତୀୟ ସ୍ପିନର ୟୁଜବେନ୍ଦ୍ର ଚହଲ। ପ୍ରେମିକା ଧନଶ୍ରୀ ବର୍ମାଙ୍କୁ ବୈଦିକ ରୀତିନୀତିରେ ସେ ବିବାହ କରିଛନ୍ତି। ନିଜ ସୋସିଆଲ ମିଡିଆ ପୃଷ୍ଠାରେ ଉଭୟଙ୍କ ଏକାଧିକ ଫଟୋ ଶେୟାର କରି ଚହଲ ନିଜ ଖୁସି ପ୍ରଶଂସକଙ୍କ ସହ ବାଣ୍ଟିଥିଲେ।
ଚହଲ-ଧନଶ୍ରୀ ପ୍ରେମବିବାହ କରିଥିବା ବେଳେ ଉଭୟଙ୍କ କାହାଣୀ ବେଶ୍ ନିଆରା। ଗୁରୁଶିଷ୍ୟ ଭାବେ ଲକ୍ଡାଉନ୍ ବେଳେ ସେମାନେ ପରସ୍ପରକୁ ଭେଟିଥିଲେ। ଏକ ସାକ୍ଷାତକାରରେ ଧନଶ୍ରୀ କହିଥିଲେ, ଚହଲ ୟୁଟ୍ୟୁବରେ ତାଙ୍କର କିଛି ଭିଡିଓ ଦେଖିଥିଲେ। ସାରା ବିଶ୍ୱରେ ଲକ୍ଡାଉନ୍ ଚାଲିଥିବା ହେତୁ ଏହି ସମୟର ସଦୁପଯୋଗ କରିବାକୁ ଚାହୁଁଥିଲେ ଚହଲ। ଏଣୁ ସେ ନାଚ ଶିଖିବାକୁ ମନସ୍ଥ କରିଥିଲେ। ଏଥିଯୋଗୁ ଉଭୟ ନିକଟତର ହୋଇଥିଲେ। ପରେ ଏହା ନିର୍ବନ୍ଧ ଆଉ ଏବେ ବିବାହରେ ପରିଣତ ହୋଇଛି।
୨୦୧୧ରେ ଜିମ୍ବାଓ୍ବେ ବିପକ୍ଷ ଦିନିକିଆରେ ଡେବ୍ୟୁ କରିଥିଲେ ଚହଲ। ୩୦ ବର୍ଷୀୟ ଏହି ସ୍ପିନର ଭାରତୀୟ ଟିମ୍ରୁ ଖେଳି ୫୪ ଦିନିକିଆ, ୪୫ ଟି୨୦ ମ୍ୟାଚ୍ ଖେଳିସାରିଛନ୍ତି। ଦିନିକିଆରେ ୯୨ ଓ ଟି୨୦ରେ ସେ ୫୯ଟି ଉଇକେଟ ନେଇଛନ୍ତି। ଅପରପକ୍ଷେ ଧନଶ୍ରୀ ପେସାରେ ଜଣେ କୋରିଓଗ୍ରାଫର। ସେ ନିଜ ସୋସିଆଲ ପୃଷ୍ଠାରେ ନୃତ୍ୟର ଅନେକ ଭିଡିଓ ଶେୟାର କରିଛନ୍ତି। ସେ ନିଜ କମ୍ପାନୀ ମଧ୍ୟ ଚଳାଉଛନ୍ତି।
