ନୂଆଦିଲ୍ଲୀ,୧୦।୧୧ :ଭାରତକୁ ଏକ ପ୍ରମୁଖ ଅପଲିଙ୍କିଂ ହବ ଭାବରେ ପ୍ରୋଜେକ୍ଟ କରିବାକୁ ସରକାର ଟେଲିଭିଜନ ଚ୍ୟାନେଲଗୁଡିକର ଅନୁପାଳନ ନିର୍ଦ୍ଦେଶାବଳୀ ଘୋଷଣା କରିଛନ୍ତି ଏବଂ ମୁଖ୍ୟତଃ ମନୋରଞ୍ଜନ ଚ୍ୟାନେଲଗୁଡିକ ପାଇଁ ୩୦ମିନିଟର ଜନସାଧାରଣଙ୍କ ସ୍ବାର୍ଥ ସହ ଜଡ଼ିତ ଥିବା ପ୍ରସାରଣକୁ ବାଧ୍ୟତାମୂଳକ କରିଛନ୍ତି।
ଭାରତରେ ସାଟେଲାଇଟ ଟେଲିଭିଜନ ଚ୍ୟାନେଲଗୁଡ଼ିକର ଅପଲିଙ୍କିଂ ଏବଂ ଡାଉନ ଲିଙ୍କ ପାଇଁ ଗାଇଡଲାଇନକୁ କେନ୍ଦ୍ର କ୍ୟାବିନେଟ ଅନୁମୋଦନ କରିଛି। ଏହି ପଦକ୍ଷେପ ଭୁଟାନ, ବାଂଲାଦେଶ, ଶ୍ରୀଲଙ୍କା ଏବଂ ନେପାଳର ଟେଲିଭିଜନ ଚ୍ୟାନେଲଗୁଡ଼ିକୁ ସିଙ୍ଗାପୁର ପରିବର୍ତ୍ତେ ଭାରତରୁ ଅପଲିଙ୍କ କରିବାକୁ ଅନୁମତି ଦେବ ବୋଲି ଆଶା କରାଯାଉଛି।
ଉପମହାଦେଶରେ ପ୍ରସାରଣ କରୁଥିବା ଚ୍ୟାନେଲଗୁଡ଼ିକ ପାଇଁ ସିଙ୍ଗାପୁର ପସନ୍ଦର ଅପଲିଙ୍କିଂ ହବ ପାଲଟିଛି। ଅଧିକାରୀ କହିଛନ୍ତି ଯେ ବର୍ତ୍ତମାନ ସୂଚନା ଏବଂ ପ୍ରସାରଣ ମନ୍ତ୍ରଣାଳୟରେ ପଞ୍ଜୀକୃତ ହୋଇଥିବା ମୋଟ ୮୯୭ ଟି ଚ୍ୟାନେଲ ମଧ୍ୟରୁ କେବଳ ୩୦ ଟି ଚ୍ୟାନେଲ ଭାରତରୁ ଅପଲିଙ୍କ ହୋଇଛି।
ଯୁଗ୍ମ ସଚିବ (ବ୍ରୋଡକାଷ୍ଟିଂ) ସଞ୍ଜୀବ ଶଙ୍କର ଗଣମାଧ୍ୟମକୁ କହିଛନ୍ତି ଯେ କାର୍ଯ୍ୟକ୍ରମର ଲାଇଭ ଟେଲିକାଷ୍ଟ ପାଇଁ ଅନୁମତି ନେବା ଆବଶ୍ୟକତା ଶେଷ ହୋଇଛି। କେବଳ ଲାଇଭ ପ୍ରୋଗ୍ରାମର ପୂର୍ବ ପଞ୍ଜୀକରଣ ଆବଶ୍ୟକ ହେବ। ସେ କହିଛନ୍ତି ଯେ ଷ୍ଟାଣ୍ଡାର୍ଡ ଡେଫିନେଶନରୁ ହାଇ ଡେଫିନେଶନ କିମ୍ବା ବିପରୀତରେ ଭାଷା କିମ୍ବା ଟ୍ରାନ୍ସମିସନ ମୋଡ ପରିବର୍ତ୍ତନ କରିବାକୁ କୌଣସି ପୂର୍ବ ଅନୁମତି ଆବଶ୍ୟକ ହେବ ନାହିଁ।
ସେ କହିଛନ୍ତି ଯେ ଚ୍ୟାନେଲକୁ କେବଳ ପରିବର୍ତ୍ତନ ହେବାକୁ ଥିବା ନେଇ ମନ୍ତ୍ରଣାଳୟକୁ ଜଣାଇବାକୁ ପଡ଼ିବ। ଏ ବାବଦରେ ନିର୍ଦ୍ଦେଶାବଳୀ ପ୍ରଥମେ ୨୦୦୫ ରେ ଜାରି କରାଯାଇଥିଲା ଏବଂ ୨୦୧୧ ରେ ସଂଶୋଧିତ ହୋଇଥିଲା। ବୈଷୟିକ ପ୍ରଗତିକୁ ଧ୍ୟାନରେ ରଖି ବର୍ତ୍ତମାନ ୧୧ ବର୍ଷ ପରେ ଏହାକୁ ସଂଶୋଧନ କରାଯାଇଛି ।
ଏକ କମ୍ପାନୀ ଡିଜିଟାଲ ସାଟେଲାଇଟ ନ୍ୟୁଜ ସଂଗ୍ରହ ବ୍ୟତୀତ ଅପ୍ଟିକ ଫାଇବର, ବ୍ୟାଗ ବ୍ୟାକ, ମୋବାଇଲ ଇତ୍ୟାଦି ଖବର ସଂଗ୍ରହ ଉପକରଣ ବ୍ୟବହାର କରିପାରିବ ଯାହା ପାଇଁ କୌଣସି ପୃଥକ ଅନୁମତି ଆବଶ୍ୟକ ହେବ ନାହିଁ ।
ସେ କହିଛନ୍ତି ଯେ ନୂତନ ନିର୍ଦ୍ଦେଶାବଳୀ ଅନୁଯାୟୀ ଟେଲିଭିଜନ ଚ୍ୟାନେଲଗୁଡ଼ିକ ଜାତୀୟ ତଥା ଜନସାଧାରଣଙ୍କସ୍ବୋର୍ଥ ସହ ଜଡିତ ବିଷୟବସ୍ତୁକୁ ପ୍ରତିଦିନ ୩୦ ମିନିଟ ପର୍ଯ୍ୟନ୍ତ ପ୍ରସାରଣ କରିବା ବାଧ୍ୟତାମୂଳକ ଅଟେ।
ନିର୍ଦ୍ଦେଶାବଳୀ ଅନୁଯାୟୀ, ଏକରୁ ଅଧିକ ଟେଲିପୋର୍ଟ କିମ୍ବା ଉପଗ୍ରହର ସୁବିଧା ବ୍ୟବହାର କରି ଏକ ଚ୍ୟାନେଲକୁ ଅପଲିଙ୍କ କରାଯାଇପାରିବ। ତଥାପି, ବିଦ୍ୟମାନ ନିୟମ ଅନୁଯାୟୀ, କେବଳ ଗୋଟିଏ ଟେଲିପୋର୍ଟ କିମ୍ବା ଉପଗ୍ରହ ମାଧ୍ୟମରେ ଏକ ଚ୍ୟାନେଲକୁ ଅପଲିଙ୍କ କରାଯାଇପାରିବ।
