ଭଞ୍ଜନଗର,୩ା୭(ବାବୁଲା ପ୍ରଧାନ): ଭଞ୍ଜନଗର ବ୍ଲକ ସମ୍ମିଳନୀ କକ୍ଷରେ ଶୁକ୍ରବାର ଉପଖଣ୍ଡସ୍ତରୀୟ ଜନଗଣନା ଅବସରରେ ଜିଲା ଜନଗଣନା ପୁସ୍ତିକା ପ୍ରସ୍ତୁତିକୁ ସୂଚାରୁ ଓ ତ୍ରୁଟିମୁକ୍ତ କରିବା ଉଦ୍ଦେଶ୍ୟରେ ପ୍ରଶିକ୍ଷଣ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏଥିରେ ଅତିରିକ୍ତ ଜିଲାପାଳ ସୁନୀଲ କୁମାର କେର୍କେଟା ଅଧ୍ୟକ୍ଷତା କରି ୨୦୨୭ ଜନଗଣନାର ଜିଲା ଜନଗଣନା ହ୍ୟାଣ୍ଡବୁକ ପ୍ରସ୍ତୁତି ସହ କ୍ଷେତ୍ରସ୍ତରୀୟ କାର୍ଯ୍ୟ ଓ ସମୟସୀମା ସମ୍ପର୍କରେ କହିଥିଲେ। ବିଶେଷକରି ଜନଗଣନା କ୍ଷେତ୍ର କାର୍ଯ୍ୟ ସହ ସମ୍ପୃକ୍ତ ୧୦ଟି ପ୍ରମୁଖ ଏଲିମେଣ୍ଟ ଉପରେ ବିସ୍ତୃତ ପର୍ଯ୍ୟାଲୋଚନା କରାଯାଇ ସଠିକ ତଥ୍ୟ ସଂଗ୍ରହ, ତାଲିକା କରଣ ପ୍ରକ୍ରିୟା ଏବଂ କ୍ଷେତ୍ରସ୍ତରରେ କାର୍ଯ୍ୟ ସମ୍ପାଦନ ସମ୍ବନ୍ଧୀୟ ଆବଶ୍ୟକ ମାର୍ଗଦର୍ଶନ କରାଯାଇଥିଲା। ଉପଜିଲାପାଳ ଉମାଶଙ୍କର ବେହେରା ଜନଗଣନା କାର୍ଯ୍ୟରେ ନିର୍ଭୁଲ ତଥ୍ୟ ସଂଗ୍ରହ, ସମୟବଦ୍ଧ କାର୍ଯ୍ୟ ସମ୍ପାଦନ ଏବଂ ସମନ୍ବିତ ପ୍ରୟାସର ବିସ୍ତାର ସହ ଆଲୋକପାତ କରିଥିଲେ । ଏହି ତାଲିମ କାର୍ଯ୍ୟକ୍ରମରେ ଅତିରିକ୍ତ ଉପଜିଲାପାଳ ପ୍ରଧାନ ଟୁଲିଆମା, ସହାୟକ ଉପଜିଲାପାଳ ଚନ୍ଦ୍ରଗିରି ଗାୟତ୍ରୀ, କନ୍ସଲଣ୍ଟାଣ୍ଟ ଏମ. ଶ୍ରୀନିବାସ ଏବଂ ଡିସିଓ ଓଡ଼ିଶା ସନ୍ତୋଷ କୁମାର ଆଚାର୍ଯ୍ୟ ପ୍ରମୁଖ ଉପସ୍ଥିତ ରହି ପ୍ରଶିକ୍ଷଣ ଦେଇଥିଲେ। ପ୍ରଶିକ୍ଷଣରେ ଜିଲା ଜନଗଣନା ପୁସ୍ତିକା ପ୍ରସ୍ତୁତିରେ ତହସିଲଦାର, ରାଜସ୍ବ ନିରୀକ୍ଷକ, ସହକାରୀ ରାଜସ୍ବ ନିରୀକ୍ଷକ, ରେଭିନ୍ୟୁ ସୁପରଭାଇଜର ଓ ଅମୀନଙ୍କ ଭୂମିକା, କ୍ଷେତ୍ରସ୍ତରୀୟ ଅନୁସନ୍ଧାନ ପ୍ରକ୍ରିୟା ଏବଂ ତଥ୍ୟ ସଂଗ୍ରହର ମାନଦଣ୍ଡ ସମ୍ପର୍କରେ ସବିଶେଷ ଆଲୋଚନା କରାଯାଇଥିଲା। ଜିଲାର ଜନଗଣନା ପ୍ରଭାରୀ ତଥା ପ୍ରଶିକ୍ଷକ ସନ୍ତୋଷ କୁମାର ଆଚାର୍ଯ୍ୟ ପ୍ରଶିକ୍ଷଣ ପ୍ରଦାନ କରିଥିଲେ।
ସୂଚନାଯୋଗ୍ୟ, ଗତ ୧ ତାରିଖରେ ଜିଲାରେ ପ୍ରଥମ ପର୍ଯ୍ୟାୟ ବ୍ରହ୍ମପୁରରେ, ଗୁରୁବାର ଛତ୍ରପୁରରେ ଦ୍ୱିତୀୟ ପର୍ଯ୍ୟାୟ ଏହି ପ୍ରଶିକ୍ଷଣ କାର୍ଯ୍ୟକ୍ରମ ହୋଇଥିଲା। ଶୁକ୍ରବାର ତୃତୀୟ ପର୍ଯ୍ୟାୟ ପ୍ରଶିକ୍ଷଣ ଭଞ୍ଜନଗରରେ ହୋଇଛି। ୩ଟି ପର୍ଯ୍ୟାୟରେ ଜିଲାର ୨୩୭ ଜଣ ଅଧିକାରୀ ପ୍ରଶିକ୍ଷଣ ନେଇଛନ୍ତି।
