କଲମ୍ବୋ, ୧୪ା୬: ଶ୍ରୀଲଙ୍କାରେ ଏକ ବିଦ୍ୟୁତ୍ ପ୍ରକଳ୍ପ ପ୍ରତିଷ୍ଠା ଦାୟିତ୍ୱ ଆଦାନୀ ଗ୍ରୁପ୍କୁ ଦେବା ପାଇଁ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଚାପ ପକାଇଥିଲେ ବୋଲି ସେଠାକାର ବିଦ୍ୟୁତ୍ କର୍ତ୍ତୃପକ୍ଷ ମୁଖ୍ୟ ଏମ୍. ଏମ୍. ସି. ଫର୍ଡିନାଣ୍ଡୋ ଅଭିଯୋଗ ଆଣିବା ପରେ ତାହା ଚର୍ଚ୍ଚାର ବିଷୟ ପାଲଟିଛି। ଏକ ସଂସଦୀୟ କମିଟି ଆଗରେ ଶୁକ୍ରବାର ଏଭଳି ଅଭିଯୋଗ ଆଣିବାର ଦୁଇ ଦିନ ପରେ ନିଜ କଥାରୁ ଓହରି ଯାଇଥିବା ଫର୍ଡିନାଣ୍ଡୋ ସୋମବାର ସେଲନ୍ ଇଲେକ୍ଟ୍ରିସିଟି ବୋର୍ଡ (ସିଇବି) ମୁଖ୍ୟ ପଦରୁ ଇସ୍ତଫା ଦେଇଛନ୍ତି।
୫ ଶହ ମେଗାଓ୍ବାଟ୍ ବିଶିଷ୍ଟ ପବନଚାଳିତ ବିଦ୍ୟୁତ୍ ପ୍ରକଳ୍ପ ପ୍ରତିଷ୍ଠା ଦାୟିତ୍ୱ ଆଦାନୀ ଗ୍ରୁପ୍କୁ ଦେବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜୋର ଦେଇଥିବା ଫର୍ଡିନାଣ୍ଡୋ ପବ୍ଲିକ୍ ଏଣ୍ଟରପ୍ରାଇଜେସ୍ ସମ୍ପର୍କିତ ପାର୍ଲାମେଣ୍ଟାରୀ କମିଟିର ଏକ ଖୋଲା ଶୁଣାଣିରେ ଅଭିଯୋଗ ଆଣିଥିଲେ। ୨୦୨୧ ନଭେମ୍ବର ୨୪ରେ ରାଷ୍ଟ୍ରପତି ରାଜପାକ୍ସେ ଏ ନେଇ ଫର୍ଡିନାଣ୍ଡୋଙ୍କୁ ଜଣାଇଥିଲେ ବୋଲି ସିଇବି ପୂର୍ବତନ ମୁଖ୍ୟ ପ୍ରକାଶ କରିଥିଲେ। ଏହାର ଜବାବରେ ଫର୍ଡିନାଣ୍ଡୋ ରାଷ୍ଟ୍ରପତିଙ୍କୁ ପତ୍ର ଲେଖି ଜଣାଇଥିଲେ ଯେ, ଏହି ପ୍ରସଙ୍ଗ ଉପରେ ସିଇବି ନିଷ୍ପତ୍ତି ନେଇପାରିବ ନାହିଁ। ଏହା ନିବେଶ ବୋର୍ଡ ଅଧୀନରେ ଆସୁଥିବାରୁ ଅର୍ଥ ସଚିବ ଆବଶ୍ୟକ ପଦକ୍ଷେପ ନେବା ଉଚିତ। କାରଣ ଏହା ଆନ୍ତଃସରକାରୀ ଡିଲ୍ ବୋଲି ସେ ପ୍ରକାଶ କରିଥିଲେ। ୧୦ ମେଗାଓ୍ବାଟ୍ରୁ ଅଧିକ କ୍ଷମତା ବିଶିଷ୍ଟ ପାଓ୍ବାର ପ୍ଲାଣ୍ଟ ପାଇଁ ନିଲାମ ପ୍ରକ୍ରିୟା ହେବା କଥା ବୋଲି ମୁଖ୍ୟ ବିରୋଧୀ ଏସ୍ଜେବି ଦାବି କରିଥିଲା। କିନ୍ତୁ ଶାସକ ଦଳ ଏମ୍ପି ଏହା ବିରୋଧରେ ଭୋଟ ଦେବାରୁ ତାହା ଖାରଜ ହୋଇଥିଲା। ରାଷ୍ଟ୍ରପତି ରାଜପାକ୍ସେ ଅଭିଯୋଗକୁ ଖଣ୍ଡନ କରି ଫର୍ଡିନାଣ୍ଡୋଙ୍କୁ ଏଭଳି ନିର୍ଦ୍ଦେଶ ଦେଇ ନ ଥିବା ଜୁନ୍ ୧୧ରେ ଟୁଇଟ୍ କରି କହିଥିଲେ। ଫଳରେ ଫର୍ଡିନାଣ୍ଡୋ ନିଜ ମନ୍ତବ୍ୟରୁ ଓହରି ଯାଇଥିଲେ। ତାଙ୍କ ଉପରେ ବଢ଼ୁଥିବା ଚାପରେ ବିବ୍ରତ ଓ ଭାବପ୍ରବଣ ହୋଇ ସେ ଭାରତର ପ୍ରଧାନମନ୍ତ୍ରୀଙ୍କ ବିରୋଧରେ ଏଭଳି ଅଭିଯୋଗ ଆଣିଥିବା ପ୍ରକାଶ କରିଥିଲେ। ଏଥିସହ ଫର୍ଡିନାଣ୍ଡୋ କ୍ଷମା ମଧ୍ୟ ମାଗିଥିଲେ। ପ୍ରକାଶ ଯେ, ଗତବର୍ଷ ଅକ୍ଟୋବର ୨୧ରେ ଆଦାନୀ ଗ୍ରୁପ୍ ମୁଖ୍ୟ ଗୌତମ ଆଦାନୀ ଶ୍ରୀଲଙ୍କା ଗସ୍ତ କରିଥିଲେ। ସେହି ସମୟରେ ଆଦାନୀ ଗ୍ରୁପ୍ ଏବଂ ସିଇବି ମଧ୍ୟରେ ମନାର୍ ଓ ପୁନେରନ୍ ପ୍ରଦେଶରେ ୫୦୦ ମେଗାଓ୍ବାଟ୍ ବିଶିଷ୍ଟ ନବୀକରଣୀୟ ବିଦ୍ୟୁତ୍ ପ୍ରକଳ୍ପ ପ୍ରତିଷ୍ଠା ପାଇଁ ଚୁକ୍ତିନାମା ହୋଇଥିଲା। ଏଥିରେ ଆଦାନୀ ଗ୍ରୁପ୍ ୫୦୦ ମିଲିୟନ ଡଲାର ନିବେଶ କରିବ ବୋଲି ସ୍ଥିର ହୋଇଥିଲା।
