କୋରେଇ,୨୯।୭( ଚନ୍ଦ୍ରକାନ୍ତ ପତି): ରାଜ୍ୟରେ ମୃତ୍ତିକା ସଂରକ୍ଷଣ ବିଭାଗ ରେକର୍ଡ ସଂଖ୍ୟାରେ ଚାଷଜମିରେ କ୍ଷେତ୍ର ପୋଖରୀ ଏବଂ କାଜୁ ବଗିଚା ଆଦି ସୃଷ୍ଟି କରିଥିବା ମିଳିଥିବା ତଥ୍ୟରୁ ଜଣାପଡ଼ିଛି। ହେଲେ ପରିତାପର ବିଷୟ ପଞ୍ଚାୟତ ସ୍ତରୀୟ ନେତା ଏବଂ ଅଧିକାରୀଙ୍କ ଅସାଧୁ ମେଣ୍ଟ ଯୋଗୁ କାଜୁ ବଗିଚା ଓ କ୍ଷେତ୍ର ପୋଖରୀ ନାମରେ ଅନେକ କୋଟି ଟଙ୍କା ଆତ୍ମସାତ୍ କରାଯାଇଛି। ଯାଜପୁର ଜିଲାରେ ମଧ୍ୟ ମୃତ୍ତିକା ସଂରକ୍ଷଣ ବିଭାଗରେ ଅନେକ କୋଟି ଟଙ୍କାର ଦୁର୍ନୀତି ହୋଇଥିବା ଅଭିଯୋଗ ହୋଇଛି। ଏମ୍ଜିଏନ୍ଆର୍ଇଜିଏସ୍ରେ ବିଲ୍ ହେଉଥିବାରୁ ଅଧିକାରୀମାନେ ମିଥ୍ୟା ମଷ୍ଟରରୋଲ୍ ପ୍ରସ୍ତୁତ କରି ଜାଲ୍ ଶ୍ରମିକଙ୍କ ଆକାଉଣ୍ଟଙ୍କୁ ଅର୍ଥରାଶି ପୈଠ କରୁଛନ୍ତି ଏବଂ ପରବର୍ତ୍ତୀ ମୁହୂର୍ତ୍ତରେ ସ୍ଥାନୀୟ ନେତା ଏବଂ ବିଭାଗୀୟ ଅଧିକାରୀ ଅଧାରୁ ଅଧିକ ଅର୍ଥ ମିଳିମିଶି ଚଳୁ କରୁଛନ୍ତି।
ମିଳିଥିବା ତଥ୍ୟ ଅନୁଯାୟୀ ଏହି ବିଭାଗ ପକ୍ଷରୁ ଗତ ୪ ବର୍ଷ ମଧ୍ୟରେ ଯାଜପୁର ଜିଲାରେ ୨୧୫୮ଟି ପ୍ରକଳ୍ପ ପ୍ରସ୍ତୁତ କରାଯାଇଛି। ଇତିମଧ୍ୟରୁ ୧,୨୭୩ ପ୍ରକଳ୍ପର କାମ ଚାଲୁ ରହିଥିବାବେଳେ ୮୮୬ଟି ଶେଷ ହୋଇଛି। ବଡ଼ଚଣା ବ୍ଲକରେ ୧୦୭, ବରୀ ୧୨୭, ବିଞ୍ଝାରପୁର ୨୪୫, ଦାନଗଦି ୪୧, ଦଶରଥପୁର ୨୪୯, ଧର୍ମଶାଳା ୧୩୨, ଯାଜପୁର ୧୧୯, କୋରେଇ ୧୪୬, ରସୁଲପୁର ୧୪ ଏବଂ ସୁକିନ୍ଦା ବ୍ଲକରେ ୯୨ ପ୍ରକଳ୍ପ ଶେଷ ହୋଇଛି। କୋରେଇ ବ୍ଲକରେ କାଜୁ ବଗିଚା ଏବଂ କ୍ଷେତ୍ର ପୋଖରୀ ନାଁରେ ବ୍ୟାପକ ଦୁର୍ନୀତି ହୋଇଥିବା ଅଭିଯୋଗ ହୋଇଛି। ଏହି ବ୍ଲକର ଅମୃତିଆ ପଞ୍ଚାୟତରେ ୨୦, ଅନ୍ଧାରୀରେ ୭, ଅସନଝରରେ ୪, ବଡ଼ବିରୁହାଁରେ ୧, ବନ୍ଦାଳରେ ୨୨, ବରୁଣ୍ଡେଇରେ ୧, ଧନେଶ୍ୱରରେ ୨, ଗୋଳେଇପୁରରେ ୩, ହଳଦୀଗଡ଼ିଆରେ ୮, ଜହ୍ନାରେ ୩, କାଚରାସାହିରେ ୧୪, କନ୍ତୋରରେ ୮, କରଦାରେ ୨, ମକୁନ୍ଦପୁରରେ ୧୦, ମୂଳାପାଳରେ ୨, ପଛିକୋଟରେ ୧୩, ପାଟରଙ୍ଗାରେ ୪, ରଣପୁରରେ ୧୩, ସାଦକପୁରରେ ୩, ତଣ୍ଡରାରେ ୨ ଏବଂ ତୁଳତୀ ପଞ୍ଚାୟତରେ ୪ଟି କାଜୁ ବଗିଚା ଓ କ୍ଷେତ୍ର ପୋଖରୀ ନିର୍ମାଣ କରାଯାଇଛି। ହେଲେ କେଉଁ ପଞ୍ଚାୟତରେ କାଜୁ ଗଛ ନ ଥାଇ ବିଲ୍ ହୋଇଛି ତ କେଉଁଠି ପୁରୁଣା ପୋଖରୀ ଏବଂ ଖତ ଗାଡ଼ିଆକୁ କ୍ଷେତ୍ର ପୋଖରୀର ରୂପ ଦେଇ ଅର୍ଥ ଆତ୍ମସାତ୍ କରାଯାଇଛି। ଏହି ବ୍ଲକ ଅଧୀନ ପଛିକୋଟ ପଞ୍ଚାୟତ କଡ଼ମା ଗ୍ରାମରେ ୩ଟି କାଜୁ ବଗିଚା ନାଁରେ ପାଖାପାଖି ୨୦ ଲକ୍ଷ ଟଙ୍କା ଆତ୍ମସାତ୍୍ କରାଯାଇଥିବା ଅଭିଯୋଗ ହୋଇଛି। ଏହି ଗ୍ରାମର ଏକ ଗୋଚର ଜମିରେ ପ୍ରଥମ କାଜୁ ବଗିଚା ପାଇଁ ୧୨ ଲକ୍ଷ ଟଙ୍କା ଅନୁମୋଦନ ହୋଇଥିବା ବେଳେ ୨୩୯ ଜଣ ଜାଲ୍ ଶ୍ରମିକଙ୍କ ନାମରେ ୨୪୮୪ ଦିନର କାର୍ଯ୍ୟଦିବସ ଦର୍ଶାଇ ୩୧ ଗୋଟି ମିଥ୍ୟା ମଷ୍ଟରରୋଲ ପ୍ରସ୍ତୁତ କରାଯାଇଛି। ମେଟେରିଆଲ ଏବଂ ଲେବର ପେମେଣ୍ଟ ବାବଦରେ ସମୁଦାୟ ୯.୫୧ ଲକ୍ଷ ଟଙ୍କାର ବିଲ୍ ହୋଇଛି। ସେହିପରି ଦ୍ୱିତୀୟ କାଜୁ ବଗିଚା ପାଇଁ ୮ ଲକ୍ଷ ଟଙ୍କା ଅନୁମୋଦନ ହୋଇଥିବାବେଳେ ୮୧ ଜଣ ଜାଲ୍ ଶ୍ରମିକଙ୍କ ନାମରେ ୯୨୪ ଦିନର କାର୍ଯ୍ୟଦିବସ ଦର୍ଶାଇ ୧୨ଟି ମିଥ୍ୟାମଷ୍ଟର ରୋଲ୍ ପ୍ରସ୍ତୁତ କରି ଲେବର ପେମେଣ୍ଟ ଏବଂ ଶ୍ରମିକଙ୍କ ବାବଦରେ ୪.୭୫ ଲକ୍ଷ ଟଙ୍କା ବିଲ୍ କରାଯାଇଛି। ସମାନ ଭାବେ ତୃତୀୟ କାଜୁ ବଗିଚାରେ ପାଇଁ ୧୨ ଲକ୍ଷ ଟଙ୍କା ଅନୁମୋଦନ ହୋଇଥିବାବେଳେ ୧୨୪ ଜାଲ୍ ଶ୍ରମିକଙ୍କ ନାମରେ ୧୪୮୮ ଦିନର କାର୍ଯ୍ୟଦିବସ ଦର୍ଶାଇ ୧୯ଟି ମିଥ୍ୟା ମଷ୍ଟରରୋଲ୍ ପ୍ରସ୍ତୁତ କରି ୬.୩୪ ଲକ୍ଷ ଟଙ୍କାର ବିଲ୍ କରାଯାଇଛି। ଅଥଚ ଏହି ବଗିଚାଗୁଡ଼ିକ ପରିଦର୍ଶନ କଲେ ଗୋଟିଏବି କାଜୁ ଗଛ ଦେଖିବାକୁ ମିଳୁନାହିଁ।
ତିନୋଟି କାଜୁ ବଗିଚା ନାଁରେ ପାଖାପାଖି ୨୦ ଲକ୍ଷ ଟଙ୍କା ବିଲ୍ ହୋଇଥିବା ବେଳେ ବାସ୍ତବରେ ୨୦ଟି ବି କାଜୁ ଗଛ ଦେଖିବାକୁ ମିଳୁନାହିଁ। ଏନେଇ ଭିଜିଲାନ୍ସ ତଦନ୍ତ ହେଲେ ଦୁର୍ନୀତି ଧରାପଡ଼ନ୍ତା ବୋଲି ସାଧାରଣରେ ଦାବି ହେଉଛି। ଅନ୍ୟପକ୍ଷରେ କେତେକ ପଞ୍ଚାୟତରେ ଖତ ଗାଡ଼ିଆ ଏବଂ ପୁରୁଣା ପରିତ୍ୟକ୍ତ ପୋଖରୀକୁ କ୍ଷେତ୍ର ପୋଖରୀର ଆଖ୍ୟା ଦେଇ ଅନେକ କୋଟି ଟଙ୍କାର ବିଲ ହୋଇଛି। ଏମ୍ଜିଏନ୍ଆର୍ଇଜିଏସ୍ କାମ ଶ୍ରମିକଙ୍କ ଦ୍ୱାରା ହେବାକୁ ନିର୍ଦ୍ଦେଶ ଥିବାବେଳେ ମେଶିନରେ କ୍ଷେତ୍ର ପୋଖରୀ ଖନନ କରାଯାଇ ଜବକାର୍ଡ ମାଧ୍ୟମରେ ଜାଲ୍ ଶ୍ରମିକଙ୍କ ଆକାଉଣ୍ଟକୁ ଅର୍ଥ ପୈଠକରି ସ୍ଥାନୀୟ ନେତା ଓ ଯନ୍ତ୍ରୀ ଲାଭବାନ ହେଉଛନ୍ତି। ଏନେଇ ମୃତ୍ତିକା ସଂରକ୍ଷଣ ବିଭାଗର ପ୍ରକଳ୍ପ ନିର୍ଦ୍ଦେଶକ ପ୍ରଦୀପ ପଟ୍ଟନାୟକଙ୍କୁ ପଚାରିବାରେ କଡ଼ମା କାଜୁ ବଗିଚା ଦୁର୍ନୀତି ବାବଦରେ ତାଙ୍କ ପାଖରେ ଅଭିଯୋଗ ହୋଇଛି। ଖୁବଶୀଘ୍ର ଏହାର ତଦନ୍ତ ହେବ ବୋଲି ସେ କହିଛନ୍ତି।
