ଯାଜପୁର,୨୯ା୫(ହର୍ଷବର୍ଦ୍ଧନ ବେହେରା):ଭାରତୀୟ ଗଣତନ୍ତ୍ର ପାଇଁ ରାଜନୀତିର ଅପରାଧୀକରଣ ଉଦ୍ବେଗର ବିଷୟ। ଏହାସହ ପ୍ରାର୍ଥୀଙ୍କ ସ୍ଥାବର ଓ ଅସ୍ଥାବର ସମ୍ପତ୍ତି ତାଲିକା ମଧ୍ୟ ରାଜନୀତି ପାଇଁ ବେଶ୍ ଗୁରୁତ୍ୱପୂର୍ଣ୍ଣ। ଏହିକ୍ରମରେ ଚଳିତ ସାଧାରଣ ନିର୍ବାଚନରେ ଯାଜପୁର ସଂସଦୀୟ କ୍ଷେତ୍ରର ୭ ବିଧାନସଭା ଆସନ ପାଇଁ ପ୍ରାର୍ଥତ୍ପତ୍ର ଦାଖଲ କରିଥିବା ବିଜେଡି, ଭାଜପା ଓ କଂଗ୍ରେସର ୪ ପ୍ରାର୍ଥତ୍ଙ୍କ ନାମରେ ଏକାଧିକ ମାମଲା ରହିଛି। ରାଜ୍ୟ ମୁଖ୍ୟ ନିର୍ବାଚନ କମିଶନର ଅପରାଧିକ ମାମଲାରେ ସମ୍ପୃକ୍ତ ଥିବା ପ୍ରାର୍ଥୀମାନେ ଦୈନିକ ଖବରକାଗଜରେ ବିଜ୍ଞାପନ ଦେଇ ଜନସାଧାରଣଙ୍କୁ ଜଣାଇବାକୁ ନିର୍ଦ୍ଦେଶ ଦେଇଛନ୍ତି। ହେଲେ ସେହି ପ୍ରାର୍ଥୀମାନେ ଅଳ୍ପ ଛପା ଯାଉଥିବା କେତେକ ଖବରକାଗଜରେ ବିଜ୍ଞାପନ ଦେଇ ଅଞ୍ଚଳବାସୀଙ୍କୁ ଏକପ୍ରକାର ଅନ୍ଧାରରେ ରଖିଥିବା ମତପ୍ରକାଶ ପାଇଛି।
ସତ୍ୟପାଠରୁ ମିଳିଥିବା ତଥ୍ୟ ଅନୁଯାୟୀ, ବରୀ ନିର୍ବାଚନମଣ୍ଡଳୀର ବିଜେଡି ବିଧାୟକ ପ୍ରାର୍ଥୀ ବିଶ୍ୱରଞ୍ଜନ ମଲ୍ଲିକଙ୍କ ନାମରେ ଏକାଧିକ ଗୁରୁତ୍ୱପୂର୍ଣ୍ଣ ମାମଲା ରହିଛି। ସେଥିମଧ୍ୟରୁ ବିଭିନ୍ନ ଥାନାରେ ଆଇପିସି ୫୦୭, ୫୦୬, ୨୯୪,୩୨୩ ଭଳି ମାମଲା ରୁଜୁ ହୋଇଛି। ସେହିଭଳି ବଡ଼ଚଣା ବିଧାନସଭା ନିର୍ବାଚନମଣ୍ଡଳୀର ବିଜେଡି ପ୍ରାର୍ଥୀ ବର୍ଷା ପ୍ରିୟଦର୍ଶିନୀ ୪୨୦, ୩୪୧, ୧୮୬, ୧୭୦, ୫୦୬, ୨୯୪, ୪୪୮, ୪୬୧, ଆଟ୍ରୋସିଟି ଭଳି ଅନେକ ମାମଲାରେ ଛନ୍ଦି ହୋଇଛନ୍ତି। ଧର୍ମଶାଳା ବିଧାନସଭା ନିର୍ବାଚନମଣ୍ଡଳୀର ଭାଜପା ପ୍ରାର୍ଥୀ ସ୍ମୃତିରେଖା ପହିଙ୍କ ନାମରେ ବିଭିନ୍ନ ଥାନାରେ ୧୮୮, ୨୬୯, ୨୭୦, ୩୪୧, ୨୯୪, ୩୨୩, ୫୦୬, ୩୭୯, ୪୨୭, ୧୪୩, ୧୪୯, ୩୯୪, ୫୦୭ ଭଳି ମାମଲା ବିଚାରାଧୀନ ରହିଛି। ବିଞ୍ଝାରପୁର ବିଧାନସଭା ନିର୍ବାଚନମଣ୍ଡଳୀର ଭାଜପା ପ୍ରାର୍ଥୀ ବବିତା ମଲିକଙ୍କ ନାମରେ ୧୪୭, ୩୪୧, ୨୮୩, ୨୯୦, ୨୯୪, ୫୦୬, ୧୪୯ ଭଳି କେତେକ ମାମଲା ବିଚାରାଧୀନ ରହିଛି। ସ୍ବାଧୀନ ପ୍ରାର୍ଥୀ ହିମାଂଶୁ ଶେଖର ସାହୁଙ୍କ ନାମରେ ମଧ୍ୟ ଏକାଧିକ ମାମଲା ବିଚାରାଧୀନ ଥିବା ସତ୍ୟପାଠରେ ଦର୍ଶାଯାଇଛି।
ଅନ୍ୟପକ୍ଷେ ଯାଜପୁର ଜିଲାର ୧୦ରୁ ଊର୍ଦ୍ଧ୍ୱ ପ୍ରାର୍ଥୀ କୋଟିପତି। ସେଥିମଧ୍ୟରୁ ଶିଳ୍ପ ଓ ଖଣି ସମେତ ଲଘୁ ଖଣିଜ ଦ୍ରବ୍ୟ ସମ୍ପଦରେ ଭରପୂର ଥିବା ଦୁଇ ବିଧାନସଭା ନିର୍ବାଚନମଣ୍ଡଳୀର ସୁକିନ୍ଦା ଓ ଧର୍ମଶାଳାର ୩ ପ୍ରାର୍ଥୀ କ୍ରମାଗତ ଭାବେ ପ୍ରଥମ, ଦ୍ୱିତୀୟ ଓ ତୃତୀୟ ସ୍ଥାନରେ ରହିଛନ୍ତି।
ଏଥର ଯାଜପୁର ଜିଲାର ଗୋଟିଏ ଲୋକ ସଭା ଓ ୭ଟି ବିଧାନସଭା ପାଇଁ ୭୪ ଜଣ ପ୍ରାର୍ଥୀ ମଇଦାନରେ ରହିଛନ୍ତି। ସେଥିମଧ୍ୟରୁ ଦାଖଲ କରିଥିବା ସତ୍ୟପାଠରୁ ଜଣାପଡିଛି, ସୁକିନ୍ଦା ନିର୍ବାଚନମଣ୍ଡଳୀ ବିଧାୟକ ପ୍ରୀତିରଞ୍ଜନ ଘଡେଇ ଓ ତାଙ୍କ ସ୍ତ୍ରୀଙ୍କ ନାମରେ ସ୍ଥାବର ଓ ଅସ୍ଥାବର ସମ୍ପତ୍ତି ୨୬.୪୯ କୋଟି ଟଙ୍କା ରହିଛି। ତା’ପରକୁ ଧର୍ମଶାଳା ବିଧାନସଭା ଆସନ ପାଇଁ ବିଜେଡି ପ୍ରାର୍ଥୀ ପ୍ରଣବ ବଳବନ୍ତରାୟ(ଜିତୁ) ଓ ତାଙ୍କ ସ୍ତ୍ରୀଙ୍କ ନାମରେ ସ୍ଥାବର ଓ ଅସ୍ଥାବର ସମ୍ପତ୍ତି ପ୍ରାୟ ୨୨.୨୫ କୋଟି ଟଙ୍କା ଓ ତୃତୀୟରେ ଶିଳ୍ପ ଓ ଖଣି ସମୃଦ୍ଧ ସୁକିନ୍ଦା ଆସନ ପାଇଁ ଭାଜପା ପ୍ରାର୍ଥୀ ପ୍ରଦୀପ ବଳସାମନ୍ତ ଓ ତାଙ୍କ ସ୍ତ୍ରୀଙ୍କ ନାମରେ ସ୍ଥାବର ଓ ଅସ୍ଥାବର ସମ୍ପତ୍ତି ପ୍ରାୟ ୧୭.୩୦ କୋଟି ଟଙ୍କା ରହିଛି।
