ଢେଙ୍କାନାଳ ଅଫିସ,୧୩।୧: ଢେଙ୍କାନାଳ ଜିଲା ହିନ୍ଦୋଳ ତହସିଲ ଗଣ୍ଡାନାଳୀ ମୌଜାରେ ବିନା ପରିବେଶ ଅନୁମତିରେ କଳାପଥର ଖଣି ଚାଲିବା, ଖଣିରେ ବିସ୍ଫୋରକ ବ୍ୟବହାର, ଜେସିବି ସହାୟତାରେ ପଥର ଉତ୍ତୋଳନ, କଦଳୀପାଳ ଗ୍ରାମ୍ୟ ଜଙ୍ଗଲ ଜମିକୁ ଏଥିଲାଗି ବ୍ୟବହାର କରିବା ନେଇ ଜାତୀୟ ସବୁଜ ପ୍ରାଧିକରଣ (ଏନ୍ଜିଟି)ରେ ଅଭିଯୋଗ ହୋଇଥିଲା। ଉକ୍ତ ମାମଲାର ଶୁଣାଣି କରି ଜମିର ପୂର୍ବ ସ୍ଥିତାବସ୍ଥା ଫେରାଇ ଆଣିବା ଦିଗରେ ପଦକ୍ଷେପ ନେବାକୁ ଜିଲାପାଳ ଏବଂ ଡିଏଫ୍ଓଙ୍କୁ ଏନ୍ଜିଟି ନିର୍ଦ୍ଦେଶ ଦେଇଛନ୍ତି। ଗଣ୍ଡାନାଳୀ କଳାପଥର ଖଣିରୁ ଖଣିଜ ପରିବହନ ପାଇଁ ଜଙ୍ଗଲ କିସମ ଜମିରେ ରାସ୍ତା କରାଯିବା ପ୍ରସଙ୍ଗକୁ ବିଚାରକୁ ନେଇ ପରିବେଶ କ୍ଷତିପୂରଣ ଆକଳନ ପାଇଁ ଜିଲାପାଳଙ୍କୁ ଏନ୍ଜିଟି କହିଛନ୍ତି। ଲିଜଧାରୀଙ୍କୁ ନୋଟିସ ସହିତ ପରିବେଶ କ୍ଷତିପୂରଣ ନିର୍ଦ୍ଧାରଣ କରାଯିବ। ୨ମାସ ମଧ୍ୟରେ ଏହି କ୍ଷତିପୂରଣ ଲିଜଧାରୀଙ୍କଠାରୁ ଆଦାୟ କରିବା ଲାଗି ଏନ୍ଜିଟି ସମୟସୀମା ଧାର୍ଯ୍ୟ କରିଛନ୍ତି।
ସରକାରଙ୍କ ପକ୍ଷରୁ ଦିଆଯାଇଥିବା ସତ୍ୟପାଠରେ ପୂର୍ବ ଲିଜ୍ଧାରୀଙ୍କ ବିରୋଧରେ ଦୁଇବର୍ଷ ହେଲା ନୋଟିସ ଜାରି କରାଯାଇଥିବା ଦର୍ଶାଯାଇଛି। ଏହା ସତ୍ତ୍ୱେ ଟଙ୍କା ପୈଠ କରାଯାଇ ନାହିଁ। ତେଣୁ ଆଇନ ଅନୁଯାୟୀ କାହିଁକି ତାଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଗଲାନାହିଁ ବୋଲି ପ୍ରଶ୍ନ କରିବା ସହ ଏନ୍ଜିଟି ଅସନ୍ତୋଷ ବ୍ୟକ୍ତ କରିଛନ୍ତି। ଜଙ୍ଗଲ କିସମ ଜମିକୁ ରାସ୍ତାଭାବେ ଲିଜଧାରୀ ବ୍ୟବହାର କରିଥିବାରୁ ହନ୍ଦୋଳ ତହସିଲଦାର ନୋଟିସ ଜାରି କରିଥିଲେ। ଲିଜଧାରୀ ମଧ୍ୟ ଜବାବ ଦାଖଲ କରି ଏହାକୁ ସ୍ବୀକାର କରିଥିବା ଜଣାପଡ଼ିଛି। ଏ ସଂକ୍ରାନ୍ତରେ ଡିଏଫ୍ଓ ଡା. ପ୍ରକାଶ ଚାନ୍ଦ ଗୋଗିନେନି କୁହନ୍ତି, ଉକ୍ତ ରାସ୍ତାକୁ ବନ୍ଦ କରି ଦିଆଯାଇଛି। ଉକ୍ତ ଅଞ୍ଚଳରେ ପାଉଁଶ ପକାଇ ରେଭେନ୍ୟୁ ପ୍ଲାଣ୍ଟେଶନ କରାଯିବ।
