ଭବାନୀପାଟଣା/ଜୁନାଗଡ଼,୫।୧୦(ଉତ୍ତମ କୁମାର ଦାଶ/ସୁନୀଲ କୁମାର ସିଂହ): କଳାହାଣ୍ଡି ଜିଲା ଜୁନାଗଡ଼ ଥାନା ଅଧୀନ ଶଙ୍କରପଲା ଗ୍ରାମରେ ଗତ ରବିବାର ଘଟିଥିବା ଟ୍ରିପଲ ମର୍ଡର ଘଟଣାର ଫର୍ଦ୍ଦାଫାଶ କରିଛି ଜୁନାଗଡ଼ ପୋଲିସ। ଗୁଣି ଗାରେଡିକୁ ନେଇ ଏହି ହତ୍ୟାକାଣ୍ଡ ଘଟିଛି। ଏହି ଘଟଣାରେ ମୁଖ୍ୟ ଅଭିଯୁକ୍ତ ଗ୍ରାମର ମହେନ୍ଦ୍ର ମାଝି (୩୦)ଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଛି ।
ଗୁରୁବାର ଅପରାହ୍ନରେ ଜୁନାଗଡ଼ ଥାନା କାର୍ଯ୍ୟାଳୟରେ ଆୟୋଜିିତ ଏକ ଖବରଦାତା ସମ୍ମିଳନୀରେ ଧର୍ମଗଡ଼ ଏସ୍ଡିପିଓ ଧିରଜ କୁମାର ଚୋପଦାର, ଜୁନାଗଡ଼ ଆଇଆଇସି ଶେଷଦେବ ବେହେରା ଏହି ସୂଚନା ଦେଇଛନ୍ତି। ପୋଲିସଠାରୁ ମିଳିଥିବା ସୂଚନା ଅନୁଯାୟୀ, ମହେନ୍ଦ୍ର ଭାବୁଥିଲେ ଯେ, ଗୁଣିଗାରେଡି ଯୋଗୁ ତାଙ୍କ ଦେହ ଅସୁସ୍ଥ ହେବା ସହ ତାଙ୍କ ଘରେ ପିଲା ଛୁଆ ହେଉ ନ ଥିଲା। ଏଥିରେ ମୃତ ରାଏମତି ଓ ମହେନ୍ଦ୍ର କୁମାରଙ୍କ ହାତ ରହିଥିବା ସେ ସନ୍ଦେହ କରୁଥିଲେ। ଅଭିଯୁକ୍ତ ମହେନ୍ଦ୍ର ରାଏମତିଙ୍କ ପୁତୁରା ହୋଇଥିବା ବେଳେ ଗୁଣି ଗାରେଡି ଘଟଣାକୁ ନେଇ ଉଭୟଙ୍କ ମଧ୍ୟରେ ଝଗଡା ଲାଗି ରହୁଥିଲା। ଫଳରେ ରାଗ ରଖି ରାଏମତି ଓ ମହେନ୍ଦ୍ରଙ୍କୁ ମାରଣାସ୍ତ୍ରରେ ବେକ କାଟି ସେ ହତ୍ୟା କରିଥିଲେ। ଏହି ସମୟରେ ରାଏମତିଙ୍କ ୨ ବର୍ଷର ପୁଅ ଶିବଶକ୍ତିକୁ ମଧ୍ୟ ହତ୍ୟା କରିବାକୁ ପଛେଇ ନ ଥିଲେ ଅଭିଯୁକ୍ତ ମହେନ୍ଦ୍ର। ମୃତ ବୃଦ୍ଧ ମହେନ୍ଦ୍ର କୁମାରଙ୍କ ସ୍ତ୍ରୀ ମୂଳା କୁମାରଙ୍କ ଅଭିଯୋଗ ପରେ ପୋଲିସ ଘଟଣାସ୍ଥଳରେ ଡଗ ସ୍କ୍ବାଡ ଓ ସାଇଣ୍ଟିଫିକ ଟିମ ସହିତ ତଦନ୍ତ ଆରମ୍ଭ କରିଥିଲେ। ଏ ନେଇ ଜୁନାଗଡ଼ ଥାନାରେ ଏକ ମାମଲା (ନଂ.୩୬୫/୨୩)ରୁଜୁ ହୋଇଥିଲା। ତଦନ୍ତ ପରେ ଅଭିଯୁକ୍ତ ମହେନ୍ଦ୍ରଙ୍କୁ ପୋଲିସ ଗିରଫ କରିଥିଲା। ତେବେ ସଚେତନତା ଅଭାବରୁ ଲୋକେ ଅନ୍ଧବିଶ୍ୱାସକୁ ଆପଣାଇ ଏଭଳି ଜଘନ୍ୟ ଘଟଣା ଘଟାଉଥିବା ଏସ୍ଡିପିଓ ଚୋପଦାର ପ୍ରକାଶ କରିଥିଲେ।
