କଟକ ଅଫିସ,୨୭ା୩: ସହରରେ ବିସ୍ଥାପିତ ୧୨୦୦ ଉଠାଦୋକାନୀଙ୍କୁ ଥଇଥାନ କରିବା ପାଇଁ ମୁଖ୍ୟମନ୍ତ୍ରୀ କର୍ମତତ୍ପର ଅଭିଯାନ ଯୋଜନାରେ ମଡେଲ୍ ଭେଣ୍ଡିଂଜୋନ୍ ନିର୍ମାଣ କରିବାକୁ କଟକ ମହାନଗର ନିଗମ(ସିଏମ୍ସି) ପକ୍ଷରୁ ନିଷ୍ପତ୍ତି ନିଆଯାଯାଇଥିଲା। ସହରରେ ରାସ୍ତା ପାର୍ଶ୍ୱରେ ବସି ବିକ୍ରି କରୁଥିବା ସମସ୍ତ ଉଠାଦୋକାନୀମାନ ଏଥିପାଇଁ ସିଡିଏ ସେକ୍ଟର-୭ସ୍ଥିତ ଆଶ୍ରୟ ଦି ସେଲ୍ଟର ନିକଟ, ବୀରେନ ମିତ୍ର ପାର୍କ ସମ୍ମୁଖ, ସେକ୍ଟର-୧୦ସ୍ଥିତ ମଶ୍ୱେରୀ ସ୍କୁଲ ନିକଟ, ୯ ନଂ. ୱାର୍ଡ ଦୟା ଆଶ୍ରମ ସମ୍ମୁଖ, ୪୮ ନଂ. ୱାର୍ଡ ଅଫିସ ସମ୍ମୁଖ, ୪୮ ନଂ. ୱାର୍ଡ ବିରୂପା ନଦୀ ନିକଟ ରାସ୍ତାପାର୍ଶ୍ୱ, ୯ ନଂ. ୱାର୍ଡରେ ଥିବା ବୋର୍ଡ ଅଫ ରେଭିନ୍ୟୁ କ୍ୱାର୍ଟର୍ସ ସମ୍ମୁଖ, ଚାଉଳିଆଗଞ୍ଜ ସହରାଞ୍ଚଳ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ସମ୍ମୁଖରୁ ଜାତୀୟ ରାଜପଥର ସର୍ଭିସ ରୋଡ ଅଞ୍ଚଳ, ଫକୀରପୁର ଆଇବି ରୋଡରୁ ନିମପୁର ବସ୍ତି ଅଞ୍ଚଳରେ ଥିବା ଖାଲି ସ୍ଥାନ, ୫୪ ନଂ. ୱାର୍ଡର ଲେପ୍ରୋସି ହୋମ୍ ଆଣ୍ଡ ହସ୍ପିଟାଲ ସମ୍ମୁଖ, ନୂଆବଜାର ମାଛ ମାର୍କେଟ ନିକଟ ଏବଂ ୫୮ ନମ୍ବର ୱାର୍ଡ ଗୋପାଳପୁର ଅଣ୍ଡରପାସ ଅଞ୍ଚଳରେ ଜମି ଚିହ୍ନଟ କରାଯାଇଥିଲା। ଏପରି କି ଉକ୍ତ ଅଞ୍ଚଳରୁ ଜବରଦଖଲ ଉଚ୍ଛେଦ ପାଇଁ ସ୍ଥିର କରାଯାଇଥିଲା। ଟିମ୍ ପକ୍ଷରୁ ଏ ନେଇ ଅନୁଧ୍ୟାନ କରାଯାଇଥିଲେ ମଧ୍ୟ ଏ ସମ୍ପର୍କରେ ରିପୋର୍ଟ ପ୍ରସ୍ତୁତ କରାଯାଇନାହିଁ। ଇତିମଧ୍ୟରେ ୨୦ ମାସରୁ ଊର୍ଦ୍ଧ୍ୱ ସମୟ ବିତିଯାଇଥିଲେ ମଧ୍ୟ ଏପର୍ଯ୍ୟନ୍ତ ଜଣେ ଉଠାଦୋକାନୀଙ୍କୁ କ୍ୟାବିନ୍ ଖଣ୍ଡେ ମିଳିପାରିନାହିଁ।
ଏ ସମ୍ପର୍କରେ ସିଏମ୍ସି ଡେପୁଟି କମିଶନର ଅଜୟ ମହାନ୍ତି କହିଛନ୍ତି, ମଡେଲ ଭେଣ୍ଡିଂ ଜୋନ୍ ନିର୍ମାଣ ପାଇଁ ଯନ୍ତ୍ରୀ ବିଭାଗ ବୁଝାବୁଝି କରୁଛି। ସେହିପରି ସିଏମ୍ସି ନିର୍ବାହୀ ଯନ୍ତ୍ରୀ ଦିବ୍ୟରଞ୍ଜନ ତ୍ରିପାଠୀ କହିଛନ୍ତି, ପୂର୍ବରୁ ସହରର ଅନେକ ସ୍ଥାନରେ ଭେଣ୍ଡିଂ ଜୋନ ନିର୍ମାଣ କରାଯାଇ ବ୍ୟବସାୟୀଙ୍କୁ ପ୍ରଦାନ କରାଯାଇଛି। ହେଲେ ସେମାନେ ତାହାକୁ ଖୋଲୁ ନାହାନ୍ତି। ନୂତନ ମଡେଲ ଭେଣ୍ଡିଂ ଜୋନ୍ ନିର୍ମାଣ କାର୍ଯ୍ୟ ଭେଣ୍ଡିଂ ଜୋନ୍ କମିଟି ବୁଝୁଛି। ସେମାନେ ଯୋଜନା ପ୍ରସ୍ତୁତ କରୁଛନ୍ତି। ହେଲେ କଟକରେ ଏହି ଯୋଜନା କାର୍ଯ୍ୟକାରୀ ହେବା କଷ୍ଟକର ମନେହେଉଛି। କାରଣ ବ୍ୟବସାୟୀଙ୍କୁ କ୍ୟାବିନ୍ ଯୋଗାଇ ଦିଆଯାଇଥିଲେ ମଧ୍ୟ ବର୍ଷ ବର୍ଷ ଧରି ସେଥିରେ ତାଲା ଝୁଲୁଛି ବୋଲି ସେ କହିଛନ୍ତି।
