ଖୋର୍ଦ୍ଧା,୭ା୮(ପ୍ରଭାତ ପାଣିଗ୍ରାହୀ): ଖୋର୍ଦ୍ଧା ଶିଳ୍ପାଞ୍ଚଳ ଥାନା ପୋଲିସ ଏକ ଆନ୍ତଃରାଜ୍ୟ ଗଞ୍ଜେଇ ଚୋରା ଚାଲାଣକାରୀଙ୍କୁ ଧରିବାରେ ସଫଳ ହୋଇଛି। ଗଡ଼ଖୋର୍ଦ୍ଧାସ୍ଥିତ ଗଡ଼ ଚଣ୍ଡିମନ୍ଦିର ନିକଟରେ ଚଢ଼ାଉ କରି ଏକ ବୋଲେରୋ ପିକ୍ଅପ୍ର ଗୁପ୍ତ ଚାମ୍ବରରୁ ୧୦୯ କେଜି ଗଞ୍ଜେଇ ଜବତ କରିଛି। ଜବତ ଗଞ୍ଜେଇର ଆନୁମାନିକ ମୂଲ୍ୟ ୫.୪୫ ଲକ୍ଷ ଟଙ୍କା ହେବ।
ଏହି ଘଟଣାରେ କଟକ ଜିଲା ବାଙ୍କୀ ଅଞ୍ଚଳର ମାନସ କୁମାର ନାୟକ (୪୩) ଏବଂ ନୟାଗଡ଼ ଜିଲା ଇଟାମାଟି ଅଞ୍ଚଳର କୁନି ଓରଫ ସାବିନା ବିବି (୩୨)ଙ୍କୁ ଗିରଫ କରିଛି। ସେମାନଙ୍କ ନିକଟରୁ ଏକ ବୋଲେରୋ ପିକ୍ଅପ୍, ଏକ କାର୍, ଦୁଇଟି ମୋଟର ସାଇକେଲ ଏବଂ ୬ଟି ମୋବାଇଲ ଫୋନ୍ ମଧ୍ୟ ଜବତ କରାଯାଇଛି।
କନ୍ଧମାଳ ଜିଲାରୁ ନୟାଗଡ଼-ଖୋର୍ଦ୍ଧା ଦେଇ ବାହାର ଜିଲା, ରାଜ୍ୟକୁ ଏକ ପିକ୍ଅପ୍ରେ ଗଞ୍ଜେଇ ଚୋରାଚାଲାଣ ହେଉଥିବା ଶିଳ୍ପାଞ୍ଚଳ ପୋଲିସ ଖବରପାଇ ବିଭିନ୍ନ ସ୍ଥାନରେ ଚଢ଼ାଉ କରିଥିଲେ। ଏହି ସମୟରେ ଗଡ଼ଖୋଦ୍ଧା ଚଣ୍ଡି ମନ୍ଦିର ନିକଟରେ ଟିମ୍ ଯାଞ୍ଚ ବେଳେ ପ୍ରଥମେ କିଛି ପାଇ ନ ଥିଲେ। ପିକ୍ଅପ୍କୁ ଅନୁଧ୍ୟାନ ସମୟରେ ଏକ ସିକ୍ରେଟ୍ ଚ୍ୟାମ୍ବର କରାଯାଇ ତା’ ଭିତରେ ଗଞ୍ଜେଇ ର଼୍ୟାକେଟ୍ ରହିଥିବା ଦେଖିବାକୁ ପାଇଥିଲେ। ସେଠାରୁ ୧୦୯ କେଜି ଗଞ୍ଜେଇ ସହ ପିକ୍ଅପ୍ର ଡ୍ରାଇଭରଙ୍କୁ ଗିରଫ କରିଥିଲେ। ତାଙ୍କ ସୂଚନା ଆଧାରରେ ଗଞ୍ଜେଇ ଚୋରାଚାଲାଣ ମଧ୍ୟ କାର୍ପଟଦାର ସାବିନା ବିବିଙ୍କୁ ଗିରଫ କରିଥିଲେ।
ଏନେଇ ଶିଳ୍ପାଞ୍ଚଳ ଥାନାରେ କେସ୍ ନଂ୨୩୧/୨୬ରେ ଏକ ମାମଲା ରୁଜୁ କରାଯାଇଛି। ଘଟଣାର ଅଧିକ ତଦନ୍ତ ଜାରି ରଖିଛି। ଘଟଣାର ଅଧିକ ତଦନ୍ତ ଜାରି ରହିଛି ବୋଲି ଶୁକ୍ରବାର ଆୟୋଜିତ ଖବରଦାତା ସମ୍ମିଳନୀରେ ଅତିରିକ୍ତ ଏସ୍ପି ଅନିଲ ମହାନ୍ତି ଏହି ସୂଚନା ଦେଇଛନ୍ତି। ଏହି ଖବରଦାତା ସମ୍ମିଳନୀରେ ସଦର ଏସ୍ଡିପିଓ ପଙ୍କଜ କୁମାର ମାଝୀ ଏବଂ ଶିଳ୍ପାଞ୍ଚଳ ଥାନାଧିକାରୀ ଉମେଶ ସାହୁ ଉପସ୍ଥିତ ଥିଲେ।
