ଦିଗପହଣ୍ଡି/ପାଟପୁର,୨୫।୧୧(ଅଶେଷ ନାଥ ମିଶ୍ର/ସିମାଞ୍ଚଳ ସାହୁ): ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ଟି.ଗୋବିନ୍ଦପୁର ପଞ୍ଚାୟତ ଦାମପୁର,କନ୍ଧ ଜକର ଏବଂ ବୋରେଇ ପାହାଡ ଗ୍ରାମ ସଂଲଗ୍ନ ଦୁର୍ଗମ ଜଙ୍ଗଲରେ ପୋଲିସ ଓ ଅବକାରୀ ବିଭାଗ ବଡ଼ କାର୍ଯ୍ୟାନୁଷ୍ଠାନ ନେଇଛି। ସୋମବାର ପୋଲିସ ଓ ଅବକାରୀ ବିଭାଗ ପକ୍ଷରୁ ଚଢ଼ାଉ କରାଯାଇ ୨୦ ଏକରରୁ ଉଦ୍ଧର୍ବ ଜମିରେ ଲଗାଯାଇଥିବା ପ୍ରାୟ ୨୨ ହଜାର ଗଞ୍ଜେଇ ଗଛ ଗୁଡ଼ିକୁ ନଷ୍ଟ କରାଯାଇଛି। ନଷ୍ଟ କରାଯାଇଥିବା ଗଞ୍ଜେଇ ଗଛ ଗୁଡ଼ିକର ଆନୁମାନିକ ମୂଲ୍ୟ ପ୍ରାୟ ୨ କୋଟି ୨୦ ଲକ୍ଷରୁ ଉଦ୍ଧର୍ବ ଟଙ୍କା ହେବ ବୋଲି ଆକଳନ କରାଯାଇଛି। ଗଞ୍ଜାମ ଏସ୍ପି ଶୁଭେନ୍ଦୁ କୁମାର ପାତ୍ରଙ୍କ ନିର୍ଦ୍ଦେଶକ୍ରମେ ଆସିକା ଏସଡିପିଓ ଗିରିଜା ନନ୍ଦନ ପଟ୍ଟନାୟକଙ୍କ ନେତୃତ୍ୱରେ ପାଟପୁର ଥାନା ଆଇଆଇସି ସବ୍ୟସାଚ୍ଚୀ ମଲ୍ଲ ଏବଂ ଦିଗପହଣ୍ଡି ଅବକାରୀ ଓଆଇସି ଅନୀତା ପ୍ରଧାନଙ୍କ ମିଳିତ ତତ୍ତ୍ୱାବଧାନରେ ଶେରଗଡ଼ ଥାନା ଆଇଆଇସି ନରେନ୍ଦ୍ର ସିଆଳ ,ବଡଗଡ ଥାନା ଆଇଆଇସି ସନ୍ତୋଷ କୁମାର ବେହେରା, କୋଟିନଡ଼ା ଥାନା ଆଇଆଇସି କୃଷ୍ଣ ଚନ୍ଦ୍ର ସାହା, ବେଲ ଗାଁ ଥାନା ଆଇଆଇସି ସ୍ମିତାଞ୍ଜଳି ପ୍ରଧାନଙ୍କ ସମେତ ୨ ପ୍ଲାଟୁନ ଫୋର୍ସ ଏବଂ ଦିଗପହଣ୍ଡି ଅବକାରୀ ଥାନାର କର୍ମଚାରୀ ଏହି ଚଢ଼ାଉରେ ସାମିଲ ଥିଲେ। ସାନଖେମୁଣ୍ଡି ଏକଜିକ୍ୟୁଟିଭ ମାଜିଷ୍ଟ୍ରେଟ ତଥା ତହସିଲଦାର ରାମଚନ୍ଦ୍ର ପଟ୍ଟନାୟକଙ୍କ ଉପସ୍ଥିତିରେ ୨ ଟି ଟିମ ଗଠନ କରାଯାଇ ଅପରେଶନ ଗ୍ରୀନ କ୍ଳିନ ଆରମ୍ଭ କରାଯାଇଥିଲା। ଅପରାହ୍ନ ପ୍ରାୟ ୪ ଟା ଯାଏ ପୋଲିସ ଓ ଅବକାରୀ ଟିମ ମିଳିତ ଭାବେ ୪ ପାହାଡ଼ ସଂଲଗ୍ନ ଦୁର୍ଗମ ଜଙ୍ଗଲରେ ଚାଷ କରାଯାଇଥିବା ଗଞ୍ଜେଇ ଗଛଗୁଡ଼ିକୁ ଓପାଡ଼ି ଜାଳି ଦେଇଥିଲେ। ଗଞ୍ଜାମ – ଗଜପତି ସୀମାନ୍ତରେ ଥିବା ଉକ୍ତ ଅଞ୍ଚଳରେ କିଛି ଗଞ୍ଜେଇ ବ୍ୟବସାୟୀ ସ୍ଥାନୀୟ ଅନୁସୂଚିତ ଜନଜାତିର ଗ୍ରାମବାସୀଙ୍କୁ ବିଭିନ୍ନ ଉପାୟରେ ପ୍ରଲୋଭନ ଦେଖାଇ ଗତ କିଛିବର୍ଷ ହେଲା ସମ୍ପୃକ୍ତ ଅଞ୍ଚଳରେ ବେଆଇନ ଭାବେ ଏକର ଏକର ପାହାଡ଼ିଆ ଜମିରେ ବେଧଡକ ଗଞ୍ଜେଇ ଚାଷ ଚଳାଇଥିବା ଜଣାପଡ଼ିଛି।
ସୂଚନାକୁ ଭିତ୍ତିକରି ପୋଲିସ, ଅବକାରୀ ବିଭାଗ ପକ୍ଷରୁ ସମ୍ପୃକ୍ତ ଇଲାକାରେ ମିଳିତ ଚଢ଼ାଉ ପାଇଁ ଉଭୟ ବିଭାଗର ଉଚ୍ଚ ପଦସ୍ଥ ଅଧିକାରୀ ନିଷ୍ପତ୍ତି ନେଇଥିଲେ। ପୂର୍ବ ନିଷ୍ପତ୍ତି କ୍ରମେ କୌଣସି ତଳିଆ କର୍ମଚାରୀଙ୍କୁ ସୂଚନା ଦିଆନଯାଇ ଏହି ଚଢ଼ାଉ ଧରପଗଡ କରାଯାଇଥିଲା। ସେଠାକାର ଗ୍ରାମବାସୀମାନଙ୍କୁ ଗଞ୍ଜେଇ ଚାଷରୁ ନିବୃତ୍ତ ରହିବା ସହ ସରକାରଙ୍କ ବିଭିନ୍ନ ଜନ କଲ୍ୟାଣ ଯୋଜନାର ଲାଭ ଉଠାଇବା ପାଇଁ ପୋଲିସ ଅଧିକାରୀ ପରାମର୍ଶ ଦେଇଛନ୍ତି।
