ଉମରକୋଟ, ୩୧ା୧୦(ସ୍ବ.ପ୍ର.): ଉତ୍ତର ପ୍ରଦେଶରୁ ଆସି ନବରଙ୍ଗପୁର ଜିଲା ଉମରକୋଟରେ ରହି ମୋବାଇଲ୍ ଟାଓ୍ବାରରୁ ବ୍ୟାଟେରି ଚୋରି କରୁଥିବା ଆନ୍ତଃରାଜ୍ୟ ଲୁଟେରା ଗ୍ୟାଙ୍ଗର ୨ ଜଣଙ୍କୁ ଉମରକୋଟ ପୋଲିସ ଗିରଫ କରିଛି। ଦୁହେଁ ହେଲେ ଉତ୍ତର ପ୍ରଦେଶ ରାଜ୍ୟ ମିରଟ୍ ଜିଲାର ଅକ୍ଷୟ(୨୨) ଏବଂ ଅଙ୍କିତ୍(୨୨)।
ସୂଚନା ଅନୁଯାୟୀ, ଉତ୍ତର ପ୍ରଦେଶର ମିରଟ୍ ଜିଲା ଅଧୀନ ମହଲଓ୍ବାଲା ଗ୍ରାମରୁ କେତେଜଣ ଲୁଟେରା ଉମରକୋଟ ଆସି ବ୍ୟବସାୟ ବାହାନାରେ ଲୋକଙ୍କ ଘରେ ଭଡ଼ାରେ ରହୁଥିଲେ। ସନ୍ତୋଷୀ ନଗରରୁ କେନାଲ ସାହିକୁ ଯିବା ରାସ୍ତାରେ ଗ୍ରାମାଞ୍ଚଳରେ ଲାଗିଥିବା ମୋବାଇଲ ଟାୱାରଗୁଡ଼ିକରୁ ଏମାନେ କୌଶଳରେ ବ୍ୟାଟେରି ଚୋରିକରି ପଡ଼ୋଶୀ ରାଜ୍ୟ ଛତିଶଗଡ଼ର କୋଣ୍ଡାଗାଁ ସହରରେ କମ୍ ମୂଲ୍ୟରେ ବିକ୍ରି କରୁଥିଲେ। ଏହି ଲୁଟେରା ଗ୍ୟାଙ୍ଗରେ ଅଧିକ ସଦସ୍ୟ ରହିଥିବା ଜଣାପଡ଼ିଛି। ଉମରକୋଟ ଏବଂ କୋଣ୍ଡାଗାଁରେ ରହି ଏମାନେ ବ୍ୟାଟେରି ଲୁଟ୍ ଏବଂ ବିକ୍ରି କାରବାର ଚଳାଇଥିଲେ। ଏ ନେଇ ଉମରକୋଟ ପୋଲିସ ଖବର ପାଇ ପ୍ରଥମେ ଉମରକୋଟସ୍ଥିତ ଭଡ଼ାଘରେ ଚଢ଼ାଉ କରି ଦୁଇ ଅଭିଯୁକ୍ତଙ୍କୁ ଗିରଫ କରିଥିଲା। ଛତିଶଗଡ଼ର କୋଣ୍ଡାଗାଁରେ ଏହି ଲୁଟେରା ଗ୍ୟାଙ୍ଗର ମୁଖ୍ୟ ଆଡ୍ଡା ରହିଥିବା ଜଣାପଡ଼ିବା ପରେ ଏକ ସ୍ବତନ୍ତ୍ର ପୋଲିସ ଟିମ୍ ଛତିଶଗଡ଼ ଯାଇ ସେଠାକାର ପୋଲିସ ସହାୟତାରେ ୩ ସ୍ଥାନରେ ଚଢ଼ାଉ କରିଥିଲା। ସେଠାରୁ ବିପୁଳ ପରିମାଣରେ ବ୍ୟାଟେରି ଜବତ କରାଯାଇଥିଲା। ସେଥିରେ ଉମରକୋଟ ଅଞ୍ଚଳରୁ ଚୋରି ବ୍ୟାଟେରି ମଧ୍ୟ ରହିଥିବା ଜଣାପଡ଼ିଛି। ସ୍ବତନ୍ତ୍ର ଟିମ୍ରେ ଉମରକୋଟ ପୋଲିସ ଏସ୍ଆଇ ରାଧାକାନ୍ତ ବାରିକ, ଶରତ ଚନ୍ଦ୍ର କୁଟରୁକା ଏବଂ ନୀଳିମା ପାଣିଗ୍ରାହୀ ରହିଥିଲେ। ଏ ନେଇ ଉମରକୋଟ ଥାନାରେ ୪୨୫/୨୧ରେ ଏକ ମାମଲା ରୁଜୁ କରାଯାଇ ଦୁଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ଥାନା ଅଧିକାରୀ ନରେଶ ପ୍ରଧାନ ସୂଚନା ଦେଇଛନ୍ତି।
