ଚଣ୍ଡିଗଡ଼, ୨୫ା୧୧: କେନ୍ଦ୍ରର କୃଷି ବିଲ୍କୁ ବିରୋଧକରି ପଞ୍ଜାବ, ହରିୟାଣାର ସହସ୍ରାଧିକ କୃଷକ ‘ଦିଲ୍ଲୀ ଚଲୋ’ ଡାକରା ଦେବା ସହ ବିକ୍ଷୋଭ ଲାଗି ଆଗେଇ ଆସିଛନ୍ତି। ହରିୟାଣା ସୀମାରେ ଟ୍ରାକ୍ଟର, ଟ୍ରେଲର ସହ କୃଷକମାନେ ମେଳି ବାନ୍ଧିଥିବାବେଳେ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ଭାଜପା ଶାସିତ ହରିୟାଣା ସରକାରଙ୍କ ପକ୍ଷରୁ ବିିଧାନସଭା ନିକଟରେ ବିକ୍ଷୋଭ ଆଶଙ୍କାରେ ୧୪୪ ଧାରା ଲଗାଯାଇଛି। ଏଥିସହ ଶତାଧିକ କୃଷକ ନେତାଙ୍କୁ ମଧ୍ୟ ଗିରଫ କରାଯାଇଛି। ପଞ୍ଜାବରୁ ପ୍ରାୟ ୨ ଲକ୍ଷ କୃଷକ ଦିଲ୍ଲୀ ଅଭିମୁଖେ ବାହାରି ଥିବା ପୋଲିସ ସୂତ୍ରରୁ ପ୍ରକାଶ। ନଭେମ୍ବର ୨୬ରେ ଦିଲ୍ଲୀରେ ୪୭୦ କୃଷକ ସଙ୍ଗଠନ ପକ୍ଷରୁ ବିକ୍ଷୋଭ କରାଯିବାର କାର୍ଯ୍ୟକ୍ରମ ରହିଛି।
ଭାରତୀୟ କିଶାନ ସଂଘ ସଭାପତି ବଲ୍ବୀର ସିଂ ରାଜଓ୍ବୋଲ ଅଭିଯୋଗ କରିିଛନ୍ତି ଯେ, ହରିୟାଣା ସରକାର ଆନ୍ତଃରାଜ୍ୟ ସୀମାକୁ ସିଲ୍କରି ପଞ୍ଜାବ କୃଷକଙ୍କୁ ଦିଲ୍ଲୀ ଆସିବାକୁ ଦେଉନାହାନ୍ତି। ଆମେ ହିମାଚଳ, ଜମ୍ମୁ-କଶ୍ମୀରକୁ ଯାଉଥିବା ରାସ୍ତାରେ ଶାନ୍ତିପୂର୍ଣ୍ଣ ଭାବେ ବିକ୍ଷୋଭ କରିବାକୁ ଚାହୁଁ। କୃଷକଙ୍କୁ ଦିଲ୍ଲୀ ଛଡ଼ା ନ ଗଲେ ବିକ୍ଷୋଭ ଜୋର୍ଦାର କରାଯିବା ସହ ଦିଲ୍ଲୀର ସବୁ ରାସ୍ତା ବନ୍ଦ କରାଯିବ ବୋଲି ସେ ପ୍ରକାଶ କରିଛନ୍ତି। ସେପଟେ ପୋଲିସ ପ୍ରଶାସନ ଦିଲ୍ଲୀରେ କୃଷକଙ୍କ ବିକ୍ଷୋଭ ଲାଗି ଅନୁମତି ଦିଆଯିବ ନାହିଁ ବୋଲି କହୁଛି। ହରିୟାଣା ପୋଲିସ ମଧ୍ୟ ଏନେଇ ଆଡଭାଇଜରି ଜାରିକରିଛି। ଆଇନଶୃଙ୍ଖଳାକୁ ଦୃଷ୍ଟିରେ ରଖି ପର୍ଯ୍ୟାପ୍ତ ବନ୍ଦୋବସ୍ତ କରାଯାଇଥିବା ପୋଲିସ କହିଛି।
