ନୂଆଦିଲ୍ଲୀ, ୪।୮: ଦକ୍ଷିଣ-ପଶ୍ଚିମ ନୂଆଦିଲ୍ଲୀର କ୍ୟାଣ୍ଟନମେଣ୍ଟ ଏରିଆରେ ରବିବାର ରାତିରେ ଜଣେ ଦଳିତ ନାବାଳିକାଙ୍କୁ ଗଣବଳାତ୍କାର ଓ ହତ୍ୟା କରାଯିବା ଘଟଣାକୁ ନେଇ ବିବାଦ ବଢ଼ିବାରେ ଲାଗିଛି। କଂଗ୍ରେସ, ଆମ୍ ଆଦମୀ ପାର୍ଟି (ଏଏପି) ସମେତ ବିରୋଧୀ ଦଳଗୁଡ଼ିକ ଏହି ପ୍ରସଙ୍ଗରେ କେନ୍ଦ୍ରକୁ ଘେରିଛନ୍ତି। ବୁଧବାର କଂଗ୍ରେସ ନେତା ରାହୁଲ ଗାନ୍ଧୀ ପୀଡ଼ିତାଙ୍କ ପରିବାରକୁ ଭେଟିଛନ୍ତି। ତେବେ ରାହୁଲଙ୍କ ଏକ ଟୁଇଟ୍ ତାଙ୍କୁ ଅଡ଼ୁଆରେ ପକାଇଛି। ଉକ୍ତ ଟୁଇଟ୍ରେ ସେ ପୀଡ଼ିତାଙ୍କ ମା’ବାପାଙ୍କ ଫଟୋକୁ ସଂଲଗ୍ନ କରିଥିଲେ, ଯାହାକୁ ନେଇ ଭାଜପା ତାଙ୍କୁ ପାଲଟା ଆକ୍ରମଣ କରିଛି। ଜାତୀୟ ଶିଶୁ ଅଧିକାର ସୁରକ୍ଷା ଆୟୋଗ (ଏନ୍ସିପିସିଆର୍) ଅଧ୍ୟକ୍ଷ ପ୍ରିୟଙ୍କ କାନୁନ୍ଗୋ ଏହାକୁ ପୋକ୍ସୋ ଏବଂ କିଶୋର ନ୍ୟାୟ ଆଇନର ଉଲ୍ଲଂଘନ ଦର୍ଶାଇ ଉକ୍ତ ବିବାଦୀୟ ଟୁଇଟ୍କୁ ଡିଲିଟ୍ କରିବା ପାଇଁ ଟୁଇଟର ଇଣ୍ଡିଆକୁ ନିର୍ଦ୍ଦେଶ ଦେଇଛନ୍ତି। କାରଣ ରାହୁଲଙ୍କ ଟୁଇଟ୍ରୁ ମୃତାଙ୍କ ପରିଚୟ ଜଣାପଡ଼ୁଛି।
ଇତିମଧ୍ୟରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲ ମଧ୍ୟ ପୀଡ଼ିତାଙ୍କ ମା’ବାପାଙ୍କୁ ଭେଟିବା ସହ ୧୦ ଲକ୍ଷ ଟଙ୍କା ଅନୁକମ୍ପାମୂଳକ ସହାୟତା ରାଶି ଯୋଗାଇଦେବାକୁ ଘୋଷଣା କରିଛନ୍ତି। ଆମ ଝିଅ ଆଉ ଫେରି ଆସିବନି। ତାଙ୍କ ପରିବାର ପ୍ରତି କରାଯାଇଥିବା ଅନ୍ୟାୟ ଅତ୍ୟନ୍ତ ଦୁର୍ଭାଗ୍ୟଜନକ। ଏହି କ୍ଷତି ପୂରଣ ହୋଇ ପାରିବ ନାହିଁ। ୯ ବର୍ଷୀୟା ଦଳିତ ଝିଅଙ୍କୁ ନ୍ୟାୟ ପ୍ରଦାନ ପାଇଁ ମାଜିଷ୍ଟ୍ରେଟ ସ୍ତରୀୟ ତଦନ୍ତ କରାଯିବ ବୋଲି ଏଏପି ଆବହକ ଗଣମାଧ୍ୟମକୁ କହିଛନ୍ତି। କଂଗ୍ରେସ ଏହି ମାମଲାର ଶୁଣାଣି ଫାଷ୍ଟ୍ ଟ୍ରାକ୍ କୋର୍ଟରେ ହେଉ ବୋଲି ଦାବି କରୁଥିବାବେଳେ ରାହୁଲଙ୍କୁ ଭାଜପା ମୁଖପାତ୍ର ସମ୍ବିତ ପାତ୍ର ଟାର୍ଗେଟ କରିଛନ୍ତି। ରାଜସ୍ଥାନ, ପଞ୍ଜାବ, ଛତିଶଗଡ଼ ଭଳି କଂଗ୍ରେସ ଶାସିତ ରାଜ୍ୟଗୁଡ଼ିକରେ ଦଳିତ ଝିଅଙ୍କ ପ୍ରତି ଘଟୁଥିବା ବର୍ବରତାକୁ ନେଇ ରାହୁଲ କାହିଁକି ମୁହଁ ଖୋଲୁନାହାନ୍ତି ବୋଲି ସେ ପ୍ରଶ୍ନ କରିଛନ୍ତି। ପ୍ରକାଶ ଯେ, ବାଳିକା ଜଣକ ଶ୍ମଶାନର ଓ୍ବାଟର କୁଲରକୁ ପାଣି ଆଣିବାକୁ ଯାଇଥିବାବେଳେ ପୂଜକ ରାଧେଶ୍ୟାମଙ୍କ ସମେତ ୪ଜଣ ତାଙ୍କୁ ବଳାତ୍କାର ପରେ ହତ୍ୟା କରିଥିଲେ।
