ଓ୍ବାଶିଂଟନ/ଓ୍ବାର୍ସା, ୨୦।୨ : ୟୁକ୍ରେନ ବିରୁଦ୍ଧରେ ରୁଷିଆର ଯୁଦ୍ଧଖୋର ମନୋଭାବ ସଙ୍କଟ ମଧ୍ୟରେ ଅନ୍ତର୍ଜାତୀୟ ବଜାରରେ ଅସ୍ତ୍ରଶସ୍ତ୍ର ତଥା ଯୁଦ୍ଧ ଉପକରଣ କାରବାର ବୃଦ୍ଧି ପାଇଛି। ରୁଷିଆ ସୈନ୍ୟଙ୍କ ପ୍ରତିରୋଧ କରିବା ଲାଗି ସମ୍ପ୍ରତି ପୋଲାଣ୍ଡ ଆମେରିକାଠାରୁ ବିଧ୍ୱଂସକ ଟ୍ୟାଙ୍କ କୁହାଯାଉଥିବା ଅବ୍ରାମ୍ସ୍ କିଣିବାକୁ ଯାଉଛି।
ଆମେରିକାର ବୈଦେଶିକ ବିଭାଗ ୬ ବିଲିୟନ ଡଲାରରେ ୨୫୦ଟି ଅବ୍ରାମ୍ସ୍ ଟ୍ୟାଙ୍କ ବିକ୍ରି କରିବାକୁ ଏକ ଚୁକ୍ତିକୁ ଅନୁମୋଦନ କରିଛି। ଏହି ଟ୍ୟାଙ୍କଗୁଡିକ ପୋଲାଣ୍ଡ ସେନାରେ ସାମିଲ ହେବା ପରେ ଏହାର ଗ୍ରାଉଣ୍ଡ ଆଟାକ ଶକ୍ତି ଯଥେଷ୍ଟ ବୃଦ୍ଧି ପାଇବ ବୋଲି କୁହାଯାଉଛି।
ଇତିମଧ୍ୟରେ ପୋଲାଣ୍ଡ ଜର୍ମାନୀଠାରୁ ୨୫୦ଟି ଲିଓପାର୍ଡ ୨-ଏସ୍ ଟ୍ୟାଙ୍କ କ୍ରୟ କରିସାରିଛି। ଆମେରିକା ଆଶଙ୍କା କରୁଛି ଯେ ରୁଷିଆ ଯେକୌଣସି ସମୟରେ ୟୁକ୍ରେନ ଉପରେ ଆକ୍ରମଣ କରିପାରେ। ବ୍ରିଟେନ ଚେତାବନୀ ଦେଇଛି ଯେ ରୁଷିଆ ଦ୍ୱିତୀୟ ବିଶ୍ୱଯୁଦ୍ଧ ପରଠାରୁ ୟୁରୋପରେ ସବୁଠାରୁ ଖରାପ ଆକ୍ରମଣ ପାଇଁ ପ୍ରସ୍ତୁତ ହେଉଛି।
ଆମେରିକା ବ୍ୟତୀତ ଅବ୍ରାମ୍ସ୍ ଟ୍ୟାଙ୍କକୁ ସୌଦି ଆରବ, ଇରାକ, କୁଏତ ଏବଂ ଅଷ୍ଟ୍ରେଲିଆର ସୈନ୍ୟମାନେ ମଧ୍ୟ ବ୍ୟବହାର କରୁଛନ୍ତି। ଏହି ଟ୍ୟାଙ୍କ ପ୍ରଥମେ ଜେନେରାଲ ଡାଇନାମିକ୍ସ ଲ୍ୟାଣ୍ଡ ସିଷ୍ଟମ ଦ୍ୱାରା ୧୯୭୮ରେ ନିର୍ମିତ ହୋଇଥିଲା।
ଏହା ପରେ, ଅପଗ୍ରେଡ କାର୍ଯ୍ୟ ସମୟ ସମୟରେ ଏଥିରେ କରାଯାଇଛି। ପାରସ୍ୟ ଗଲ୍ଫ ଯୁଦ୍ଧ, ଆଫଗାନିସ୍ତାନ ଯୁଦ୍ଧ, ଇରାକ ଯୁଦ୍ଧ, ୨୦୧୧ରେ ଇଜିପ୍ଟ ବିପ୍ଳବ, ଇରାକର ଗୃହଯୁଦ୍ଧ, ୟେମେନ ଉପରେ ସୌଦି ଆରବ ଆକ୍ରମଣରେ ଏହି ଟ୍ୟାଙ୍କ ନିଜର ଶକ୍ତି ପ୍ରଦର୍ଶନ କରିଛି।
ଏହି ଟ୍ୟାଙ୍କରେ ୧୨୦ଏମଏମ ଏମ୍-୨୫୬ ସ୍ମୁଥ୍ବୋର୍ ଗନ୍ ଲାଗିଛି। ଏହି ଗନ୍ ୩ କିଲୋମିଟର ପର୍ଯ୍ୟନ୍ତ ଲକ୍ଷ୍ୟ ଭେଦ କରିବାକୁ ସକ୍ଷମ। ଏହା ବ୍ୟତୀତ, ଏଥିଲେ ୧୨୦ ମିଲିମିଟର ଗନ୍ ମଧ୍ୟ ଅଛି। ଯାହା କୌଣସି ନିମ୍ନ ଫ୍ଲାଇଙ୍ଗ ବସ୍ତୁକୁ ଗୁଳି କରିବାକୁ ସକ୍ଷମ।
