ପଟ୍ଟାମୁଣ୍ଡାଇ,୨୪ା୧(ସ୍ବ.ପ୍ର.):କେନ୍ଦ୍ରାପଡ଼ା ଜିଲାର ପଟ୍ଟାମୁଣ୍ଡାଇ, ରାଜନଗର, ଆଳି, ଭଦ୍ରକ, ଚାନ୍ଦବାଲି ଓ ରାଜକନିକା ଅଞ୍ଚଳରୁ କଟକକୁ ଯାଉଥିବା ବସ୍ ଯାତ୍ରୀମାନେ ବର୍ଷ ବର୍ଷ ଧରି ଠକାମିର ଶିକାର ହେବାକୁ ପଡୁଛି। ସାଧାରଣ ଯାତ୍ରୀମାନେ ଏହି ଠକେଇର ସୁରାକ ପାଉ ନ ଥିବା ବେଳେ ଘରୋଇ ବସ୍ଗୁଡିକ ଚଞ୍ଚକତା କରି ଯାତ୍ରୀମାନଙ୍କୁ ଚତୁରତାର ସହ ଠକୁଥିବା ଜଣାପଡିଛି। ଖାଲି ସେତିକି ନୁହେଁ, କଟକରୁ ଉପରୋକ୍ତ ଅଞ୍ଚଳକୁ ଆସୁଥିବା ଯାତ୍ରୀମାନେ ମଧ୍ୟ ଅନୁରୂପ ଭାବେ ଠକାମିର ଶିକାର ହେଉଛନ୍ତି। ସରକାରୀ ଭାବେ ପଟ୍ଟାମୁଣ୍ଡାଇରୁ କଟକକୁ ୭୬ କି.ମି. ବୋଲି ପୂର୍ତ୍ତ ବିଭାଗ ପକ୍ଷରୁ ରାସ୍ତାପାର୍ଶ୍ୱରେ ବୋର୍ଡ ଲଗାଯାଇଛି। କିନ୍ତୁ ଘରୋଇ ବସ୍ଗୁଡିକ କଟକକୁ ୮୮ କି.ମି. ଦର୍ଶାଇ ଯାତ୍ରୀମାନଙ୍କଠାରୁ ୧୨ କି.ମି.ର ଅଧିକ ଭଡ଼ା ବାବଦରେ ଟଙ୍କା ଲୁଟ୍ କରି ଚାଲିଛନ୍ତି। ଏହି ଘଟଣା ଜଣାପଡ଼ିବା ପରେ ସାଧାରଣରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି।
ପୂର୍ବରୁ କଟକ ଚାନ୍ଦିନଚୌକରେ ବସ୍ଷ୍ଟାଣ୍ଡ ଥିବାରୁ ପଟ୍ଟାମୁଣ୍ଡାଇରୁ ଯାଉଥିବା ଯାତ୍ରୀମାନଙ୍କଠାରୁ ୮୮ କି.ମି . ରାସ୍ତାର ବସ୍ ଭଡା ନିଆଯାଉଥିଲା। ତେବେ ବହୁବର୍ଷ ପୂର୍ବରୁ ବାଦାମବାଡ଼ିଠାରେ ବସ୍ଷ୍ଟାଣ୍ଡ ନିର୍ମାଣ ହୋଇ ସାରିଥିବା ବେଳେ ପଟ୍ଟାମୁଣ୍ଡାଇ କଟକକୁ ୭୬ କି.ମି. ରାସ୍ତା ଯିବାକୁ ପଡ଼ୁଥିଲେ ହେଁ ପୂର୍ବ ନିର୍ଦ୍ଧାରିତ ୮୮ କି.ମି. ରାସ୍ତାର ପଇସା ଯାତ୍ରୀମାନଙ୍କଠାରୁ ନିଆଯାଉଛି। ବର୍ତ୍ତମାନ ତେଲ ମୂଲ୍ୟ ବୃଦ୍ଧି ପାଇଥିବାରୁ ପୂର୍ବ ନିର୍ଦ୍ଧାରିତ ବସ୍ ଭଡ଼ାକୁ ବଢ଼ାଇ ଦିଆଯାଇଛି। ପୂର୍ବରୁ ଅର୍ଡିନାରି ବସ୍ ୧ କି.ମି. ପିଛା ୯୦ ପଇସା ଥିବା ବେଳେ ବର୍ଦ୍ଧିତ ବସ୍ଭଡା ଅନୁଯାୟୀ ଏହା ୯୨ ପଇସା ହୋଇଛି। ସେହିପରି ଏକ୍ସପ୍ରେସ ବସ୍ ଭଡ଼ା ପୂର୍ବରୁ ୧ କି.ମି. ପିଛା ୯୪ ପଇସା ଥିବା ବେଳେ ବର୍ଦ୍ଧିତ ଭଡା ଅନୁଯାୟୀ ୯୬ ପଇସା ହୋଇଛି। ଡିଲକ୍ସ ବସ୍ ଭଡ଼ା ପୂର୍ବରୁ ୧ କି.ମି. ପିଛା ୧.୩୧ ପଇସା ଥିବାବେଳେ ଏବେ ୧.୩୫ ପଇସା କରାଯାଇଛି। ଏସ୍ସି ଡିଲକ୍ସ ବସ୍ ୧ କି.ମି .ପିଛା ବର୍ଦ୍ଧିତ ଭଡ଼ା ଅନୁଯାୟୀ ଏହା ୧.୬୩ ପଇସାକୁ ବୃଦ୍ଧି ହୋଇଛି। ତଦନୁଯାୟୀ ପଟ୍ଟାମୁଣ୍ଡାଇରୁ କଟକକୁ ଯାଉଥିବା ଯାତ୍ରୀମାନେ ୮୮ କି.ମି. ରାସ୍ତା ପାଇଁ ଅର୍ଡିନାରି ବସ୍ଭଡା ପୂର୍ବରୁ ୭୯.୨୦ ପଇସା ଦେଉଥିବା ବେଳେ ବର୍ତ୍ତମାନ ୮୦.୯୬ ପଇସା ଭଡ଼ା ଦେବା କଥା। ମାତ୍ର ଏବେ ବସ କଣ୍ଡକ୍ଟର ସାଧାରଣ ଯାତ୍ରୀଙ୍କ ପାଖରୁ ୧୨୦ ଟଙ୍କା ନେଉଛନ୍ତି। ସେହିଭଳି ଏକ୍ସପ୍ରେସ୍ ବସ୍ ଭଡ଼ା ମଧ୍ୟ ପୂର୍ବରୁ ୮୨.୭୨ ପଇସା ଥିବାବେଳେ ବର୍ତ୍ତମାନ ୮୪. ୪୮ ପଇସା ନେବା କଥା ମାତ୍ର ୧୫୦ ଟଙ୍କା ଯାତ୍ରୀଙ୍କ ପାଖରୁ ନେଉଛନ୍ତି। ସେହିପରି ଡିଲକ୍ସ ଓ ଏସସି ଡିଲକ୍ସ ବସ୍ ଭଡ଼ା କଥା ନ କହିବା ଭଲ। ପଟ୍ଟାମୁଣ୍ଡାଇରୁ କଟକକୁ ଦୂରତ୍ୱ ୭୬ କି.ମି. ହୋଇଥିବା ବେଳେ ପଟ୍ଟାମୁଣ୍ଡାଇରୁ ରାଜନଗରକୁ ୨୦ କି.ମି., ଆଳିକୁ ୧୬ କି.ମି., ରାଜକନିକାକୁ ୨୪ କି.ମି., ଭିତରକନିକାକୁ ୫୯ କି.ମି .ଓ ଚାନ୍ଦବାଲିକୁ ୩୦ କି.ମି. ଦୂରତ୍ୱ ବୋଲି ପୂର୍ତ୍ତ ବିଭାଗ ପକ୍ଷରୁ ଦର୍ଶାଯାଇଛି। ଜିଲା ପ୍ରଶାସନ, ପରିବହନ କମିଶନର ତଥା ରାଜ୍ୟ ସରକାର ଏ ଦିଗରେ ଦୃଷ୍ଟିଦେବାକୁ ସାଧାରଣରେ ଦାବି ହୋଇଛି। ଏ ସମ୍ପର୍କରେ କେନ୍ଦ୍ରାପଡ଼ା ଆର୍ଟିଓ ଧୀରେନ୍ଦ୍ର କୁମାର ନାୟକଙ୍କୁ ପଚାରିବାରୁ ଏ ନେଇ ମୋ ପାଖକୁ କୌଣସି ଅଭିଯୋଗ ଆସିନାହଁି। ଏ ବିଷୟରେ ବସ୍ ଆସୋସିଏଶନ ସହ କଥା ହେବେ ବୋଲି ସେ କହିଛନ୍ତି।
