କଟକ ଅଫିସ ,୮।୨: କଟକ ଜଗତ୍ପୁର ସମେତ ରାଜ୍ୟର ବିଭିନ୍ନ ସ୍ଥାନରେ ଗୋଟିଏ ପରେ ଗୋଟିଏ ଅପମିଶ୍ରିତ ଖାଦ୍ୟ ସାମଗ୍ରୀ କାରଖାନାର ପର୍ଦ୍ଦଫାଶ ହୋଇଆସୁଛି। ସସ୍, ଆଚାରଠୁ ଆରମ୍ଭ କରି ଭିନେଗାର, ଘିଅ, ତେଲ, ମସଲାଗୁଣ୍ଡ ଆଦି ବହୁ ଭେଜାଲ ସାମଗ୍ରୀ ପୂରପଲ୍ଲୀରେ ବ୍ୟାପକ ଭାବେ ବିକ୍ରି କରାଯାଉଛି। ଲୋକେ ସାମାନ୍ୟ ଶସ୍ତା ପାଇଁ ଏଭଳି ସାମଗ୍ରୀ ଆପଣାଉଛନ୍ତି। ପୋଲିସ, ଫୁଡ୍ ଇନ୍ସପେକ୍ଟରମାନେ ଜାଣିଶୁଣି ନୀରବ ରହୁଥିବାରୁ ଏହି କାରବାର ରାଜ୍ୟରେ କାୟା ମେଲିଛି। କିନ୍ତୁ ସଚେତନ ଲୋକଙ୍କ ଅସନ୍ତୋଷକୁ ଦୃଷ୍ଟି ରଖି ଏବେ ଗତ କିଛିମାସ ହେଲା ଜୋରଦାର ଧରପଗଡ଼ ହେଉଛି।
ଏହି କ୍ରମରେ ଗତ ନଭେମ୍ବର ୩୦ରେ ଜଗତ୍ପୁର ଶିଳ୍ପାଞ୍ଚଳସ୍ଥିତ ସୁବାସ କମ୍ପାନୀରୁ ଜବତ ବିପୁଳ ଅପମିଶ୍ରିତ ସାମଗ୍ରୀକୁ ପୋଲିସ ରବିବାର ନଷ୍ଟ କରିଛି। ନଷ୍ଟ ସାମଗ୍ରୀର ମୂଲ୍ୟ ୧୦ଲକ୍ଷରୁ ଊର୍ଦ୍ଧ୍ୱ ଟଙ୍କା ହେବ ବୋଲି ଏସିପି ଅମରେନ୍ଦ୍ର ପଣ୍ଡା କହିଛନ୍ତି। ଜବତ ସାମଗ୍ରୀର ନମୁନା ପରୀକ୍ଷା ପାଇଁ ପଠାଯାଇଥିଲା। ପରେ ଏହି ସାମଗ୍ରୀ ଖାଦ୍ୟ ଉପଯୋଗୀ ହୋଇ ନ ଥିବା ଜଣାପଡିଥିଲା ବୋଲି କଟକ ମହାନଗର ନିଗମର ସ୍ବାସ୍ଥ୍ୟ ଅଧିକାରୀ ଡ. ସତ୍ୟବ୍ରତ ମହାପାତ୍ର କହିଛନ୍ତି। ଅନ୍ୟପକ୍ଷରେ ଥାନାଧିକାରୀ ରବୀନ୍ଦ୍ର ନାଥ ମେହେର କହିଛନ୍ତି, ନମୁନା ରିପୋର୍ଟ ମିଳିବା ପରେ ଏହି ସାମଗ୍ରୀ ମଣିଷର ଖାଦ୍ୟ ଉପଯୋଗୀ ନୁହେଁ ବୋଲି ଜଣାପଡିଥିଲା। ଏହାକୁ ଖାଇଲେ ମଣିଷ ଶରୀରରେ ବିଭିନ୍ନ ରୋଗ ସୃଷ୍ଟି ହେବା ସମ୍ଭାବନା ରହିଛି। କମ୍ପାନୀରୁ ଜବତ ହୋଇଥିବା ୧୧,୦୦୦ରୁ ଊର୍ଦ୍ଧ୍ୱ ବୋତଲର ସସ୍, ଆଚାର, ଭିନେଗାର ଏବଂ ୨୫୦୦ରୁ ଊର୍ଦ୍ଧ୍ୱ ଘିଅ ଡବାକୁ ଏକ ପଡିଆରେ ରଖାଯାଇ ଜେସିବି ସହାୟତାରେ ନଷ୍ଟ କରାଯାଇଥିଲା। ପରେ ତାହାକୁ ଶିଳ୍ପାଞ୍ଚଳ ପରିସରରେ ଗାତ ଖୋଳି ସିଏମ୍ସି ଅଧିକାରୀଙ୍କ ଉପସ୍ଥିତିରେ ପୋତାଯାଇଥିଲା।
ସୂଚନାଯୋଗ୍ୟ, ଜଗତ୍ପୁର ଥାନା ଅଞ୍ଚଳରେ ଏହି କମ୍ପାନୀରେ ଅପମିଶ୍ରିତ ଆଚାର, ଘିଅ, ସସ୍ ତିଆରି କରାଯାଇ ରାଜ୍ୟ ଓ ରାଜ୍ୟ ବାହାରର ବିଭିନ୍ନ ବ୍ୟବସାୟିକ ପ୍ରତିଷ୍ଠାନକୁ ପଠାଯାଉଥିଲା। ଖବରପାଇ ୨୦୨୦ ନଭେମ୍ବର ୩୦ ତାରିଖରେ ପୋଲିସ ଉକ୍ତ କମ୍ପାନୀରେ ଚଢାଉ କରି ଅପମିଶ୍ରିତ ଆଚାର, ଘିଅ, ସସ୍କୁ ଜବତ କରିଥିଲା। ଏହାର ନମୁନା ପରୀକ୍ଷା ପାଇଁ ପଠାଯାଇଥିଲା। ପରେ ଏହି ଘଟଣାରେ ପୋଲିସ କମ୍ପାନୀ ମାଲିକ ସୁବାସ ମଲ୍ଲିକ, ପରିଚାଳକଙ୍କ ସହ ଅନ୍ୟ କର୍ମଚାରୀଙ୍କୁ ଗିରଫ କରିଥିଲା।
