ଚେନ୍ନାଇ,୨୬।୮: ରେଳଲାଇନ୍ରେ ବିଡ଼ା ବିଡ଼ା ୫ ଶହ ଏବଂ ଦୁଇ ହଜାରେ ଟଙ୍କିଆ ନୋଟ୍ ବିଛାଡ଼ି ହୋଇ ପଡିଥିବାର ଦେଖି ପୋଲିସ ଆଶ୍ଚର୍ଯ୍ୟ ହୋଇଯାଇଥିଲା। ପରେ ଜଣାପଡ଼ିଥିଲା ସମସ୍ତ ନୋଟ୍ ନକଲି। ଏଭଳି ଅଭାବନୀୟ ଘଟଣା ତାମିଲନାଡୁର ଧର୍ମପୁରୀ ଷ୍ଟେଶନ ନିକଟରେ ଘଟିଛି। ଖବର ପ୍ରଚାରିତ ହେବା ପରେ ଲୋକେ ଘଟଣାସ୍ଥଳକୁ ଛୁଟିବାରେ ଲାଗିଲେ। ରେଳ କର୍ମଚାରୀ ଘଟଣାସ୍ଥଳରେ ପହଞ୍ଚି ନୋଟ୍ ବିଡ଼ା ଗୁଡ଼ିକୁ ଜବତ କରିଥିଲେ। ରେଳ ଅଧିକାରୀ ରାମକୁମାର ଥୋପପୁର ନିକଟରେ ବେଙ୍ଗାଲୁରୁ-ସଲେମ୍ ରେଲଓ୍ବେ ଲାଇନ୍ ଯାଞ୍ଚ୍ କରୁଥିବା ସମୟରେ ଏସବୁ ନୋଟ୍ ବିଡ଼ାକୁ ଦେଖିଥିଲେ। ଏନେଇ ସେ ପୋଲିସକୁ ସୂଚନା ଦେଇଥିଲେ। ଘଟଣାସ୍ଥଳରେ ସବ୍ ଇନସ୍ପେକ୍ଟର ଭେଙ୍କଟଛଲମ୍ଙ୍କ ନେତୃତ୍ୱରେ ଏକ ଟିମ୍ ପହଞ୍ଚିଥିଲେ। ସେମାନେ ନୋଟ୍ ବିଡ଼ା ଯାଞ୍ଚ୍ କରି ଥିଲେ। ସେ ସବୁ ନକଲି ବୋଲି ଜଣାପଡ଼ିଥିଲା। ଏକ କାଗଜ ପେଟିରେ ମଧ୍ୟ ଭର୍ତ୍ତି ହୋଇଥିବା ନକଲି ନୋଟ୍ ବିଡ଼ାକୁ ଜବତ କରାଯାଇଥିଲା। ତେବେ ଏହା କିପରି ରେଳ ଲାଇନ୍ ନିକଟକୁ ଆସିଲା ସେ ନେଇ ତଦନ୍ତ ଜାରି ରହିଛି।
