ଲକ୍ଷ୍ନୌ,୧୫।୧: ୨୦୨୩ରେ ହେବାକୁ ଥିବା ସମସ୍ତ ବିଧାନସଭା ନିର୍ବାଚନରେ ଏକାକୀ ଲଢ଼ିବ ବହୁଜନ ସମାଜବାଦୀ ପାର୍ଟି(ବିଏସ୍ପି)। ଏଥିସହ ୨୦୨୪ ଲୋକ ସଭା ନିର୍ବାଚନରେ ମଧ୍ୟ ବିଏସ୍ପି କୌଣସି ଦଳ ସହ ମେଣ୍ଟ କରିବ ନାହିଁ ବୋଲି କହିଛନ୍ତି ସୁପ୍ରିମୋ ମାୟାବତୀ। ରବିବାର ଜନ୍ମଦିନ ଅବସରରେ ଏଠାରେ ଗଣମାଧ୍ୟମକୁ ସମ୍ବୋଧିତ କରୁଥିବା ବେଳେ ସେ ଏନେଇ ଘୋଷଣା କରିଛନ୍ତି।
ବିଏସ୍ପି ସୁପ୍ରିମୋ ମାୟାବତୀ କହିଛନ୍ତି, ୨୦୨୩ରେ କର୍ନାଟକ, ମଧ୍ୟପ୍ରଦେଶ, ଛତିଶଗଡ଼ ଏବଂ ଯେଉଁଠାରେ ବି ନିର୍ବାଚନ ଅନୁଷ୍ଠିତ ହେବ, ବିଏସ୍ପି ଏକାକି ସମସ୍ତ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବ। ଲୋକ ସଭା ନିର୍ବାଚନରେ ମଧ୍ୟ ଦଳ କାହା ସହ ମେଣ୍ଟ କରିବ ନାହିଁ।
ତେବେ ମାୟାବତୀ ଏହି ସମୟରେ ସମାଜବାଦୀ ପାର୍ଟିକୁ କଟାକ୍ଷ କରି କହିଛନ୍ତି, ଏସ୍ପି ସରକାର ଏସ୍ସି ଏବଂ ଏସ୍ଟି ସଂରକ୍ଷଣକୁ ସଂସଦରେ ପାରିତ ହେବାକୁ ଦେଇନାହାନ୍ତି। ଏପରିକି ବିଲ୍କୁ ମଧ୍ୟ ଚିରି ଦେଇଛନ୍ତି। ବିଏସ୍ପି ସରକାର ଏସ୍ସି-ଏସ୍ଟି ଲୋକଙ୍କୁ ତାଙ୍କର ହକ୍ ଦେଇଥିଲା। ଦଳ ସନ୍ଥ ଏବଂ ଗୁରୁଙ୍କୁ ମଧ୍ୟ ଆଦର ସମ୍ମାନ କରିଛି। ହେଲେ ଅନ୍ୟ ଦଳର ସରକାରରେ ଏଭଳି ହୁଏ ନାହିଁୟ। ଏଣୁ ବିଏସ୍ପି ଶାସନ କ୍ଷମତାକୁ ଆସିଲେ ବାବା ସାହେବ ଦେଇଥିବା ଆଇନର ଲାଭ ପାଇପାରିବେ। ସେମାନେ ଆତ୍ମ ସମ୍ମାନର ଜୀବନ ବିତାଇ ପାରିବେ। ଯଦି ସେଭଳି ହୁଏ ତେବେ ତାହା ଜନ୍ମଦିନର ସବୁଠାରୁ ବଡ଼ ଉପହାର ହେବ। ଏହାଠାରୁ ଅଧିକ କିଛି ଆବଶ୍ୟକତା ନାହିଁ ବୋଲି ସେ କହିଛନ୍ତି।
