ବାରଙ୍ଗ,୧୪।୬(ଲିଙ୍ଗରାଜ ରାଉତ): ପ୍ରାଣୀ ଉଦ୍ୟାନ ନନ୍ଦନକାନନରେ ରୋପ୍ୱେ ଚାଲିବା ପୂର୍ବରୁ ଅଘଟଣ ଘଟିଛି। ମଙ୍ଗଳବାର ଦ୍ୱିପ୍ରହରରେ ରୋପ୍ୱେକୁ ସଂଯୋଗ କରିଥିବା ଟ୍ରାନ୍ସର୍ଫମରରେ ବିଦ୍ୟୁତ୍ ଯାଞ୍ଚ କରିବାବେଳେ ତାହା ଫାଟିଯାଇଥିଲା। ଫଳରେ ୩ଜଣ କର୍ମଚାରୀ ଗୁରୁତର ହୋଇଥିଲେ। ସେମାନେ ହେଲେ ନନ୍ଦନକାନନର ଅସ୍ଥାୟୀ କର୍ମଚାରୀ ଶିବରାମ ସାହୁ, ରୋପଓ୍ବେର ଅପରେଟର ସୋମୁ ବାନାର୍ଜି ଓ ରାମଲଳିତ ସାହା। ଗୁରୁତର ଅବସ୍ଥାରେ ଏମାନଙ୍କୁ ଉଦ୍ଧାର କରି ଚିକିତ୍ସା ନିମନ୍ତେ ଘରୋଇ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ପରେ ଶିବରାମ ଓ ସୋମୁଙ୍କ ଅବସ୍ଥା ସଙ୍କଟାପନ୍ନ ହେବାରୁ ଅନ୍ୟ ଏକ ଘରୋଇ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ସୂଚନା ଅନୁଯାୟୀ, ନନ୍ଦନକାନନରେ ପୂର୍ବରୁ ରୋପଓ୍ବେ ଚାଲୁଥିବାବେଳେ କୌଣସି କାରଣରୁ ତାହା ବନ୍ଦ କରାଯାଇଥିଲା। ହେଲେ ସୋମବାର ରୋପଓ୍ବେ ପୁନଃକାର୍ଯ୍ୟକ୍ଷମ ପାଇଁ ନୂତନ ଟ୍ରାନ୍ସର୍ଫମରକୁ ୩୧କେଭି ବିଦ୍ୟୁତ୍ ସଂଯୋଗ କରାଯାଇଥିଲା। ମଙ୍ଗଳବାର ଭିସିବି ୟୁନିଟର ବିଦ୍ୟୁତ୍ ଯାଞ୍ଚ ପାଇଁ କର୍ମଚାରୀମାନେ ଯାଇଥିବାବେଳେ କୌଣସି କାରଣରୁ ଟ୍ରାନ୍ସର୍ଫମରଟି ହଠାତ୍ ଫାଟିଯାଇଥିଲା। ତେବେ ଟ୍ରାନ୍ସର୍ଫମର ତଳେ କାର୍ଯ୍ୟରତ ୩କର୍ମଚାରୀଙ୍କ ଉପରେ ନିଆଁ ଓ ତେଲ ପଡିବାରୁ ଗୁରୁତର ହୋଇ ଅଚେତ ହୋଇଯାଇଥିଲେ। ସେମାନଙ୍କ ମୁହଁ, ହାତ ସହିତ ଅର୍ଦ୍ଧାଧିକ ଶରୀର ପୋଡ଼ିଯାଇଛି। ୩ଜଣଙ୍କୁ ଉଦ୍ଧାର କରି ହସ୍ପିଟାଲ ନିଆଯାଇଥିଲା। ଖବରପାଇ ନନ୍ଦନକାନନ ପ୍ରଶାସନିକ ଅଧିକାରୀ, ବିଦ୍ୟୁତ୍ ବିଭାଗ ଓ ରୋପ୍ଓ୍ବେର ଅଧିକାରୀମାନେ ଘଟଣାସ୍ଥଳରେ ପହଞ୍ଚିଥିଲେ। ଏ ନେଇ ପାଖରେ କାମ କରୁଥିବା ରୋପଓ୍ବେର କର୍ମଚାରୀ ଉପେନ୍ଦ୍ର ବିଶ୍ବକର୍ମା କହିଥିଲେ, ଶିବରାମ ନୂତନ ଟ୍ରାନ୍ସର୍ଫମର ଭିତରକୁ ଯାଇ ଭିସିବି ୟୁନିଟରେ ମଲ୍ଟି ମିଟର ନେଇ ପରୀକ୍ଷା କରିବାବେଳେ ହଠାତ୍ ଟ୍ରାନ୍ସଫର୍ମର ଫାଟିଥିଲା। ସେଥିରୁ ନିଆଁ ଓ ତେଲ ପଡି ତଳେ ଥିବା ୩ଜଣ ଗୁରୁତର ହୋଇଥିଲେ। ଏ ସମ୍ପର୍କରେ ଭୁବନେଶ୍ବର ବିଦ୍ୟୁତ୍ ବିଭାଗ ନିର୍ବାହୀ ଯନ୍ତ୍ରୀ ଜ୍ଞାନରଞ୍ଜନ ବେହେରା କହିଥିଲେ, ସୋମବାରଠାରୁ ୩୩କେଭି ବିଦ୍ୟୁତ୍ କେବୁଲ୍ରୁ ଟ୍ରାନ୍ସଫର୍ମରକୁ ବିଦ୍ୟୁତ୍ ସଂଯୋଗ ଦେଇ ବଲ୍ ଜଳାଇଛୁ। ମଙ୍ଗଳବାର ବିଦ୍ୟୁତ୍ ବିଭାଗର ଅନୁପସ୍ଥିତିରେ ସେମାନେ କାହିଁକି ଟ୍ରାନ୍ସର୍ଫମରରେ କାର୍ଯ୍ୟ କରୁଥିଲେ ତାହା ଆମେ ଜାଣିନୁ। ତଦନ୍ତ ହେଲେ ସତ୍ୟ ଜଣାପଡିବ ବୋଲି ସୂଚନା ଦେଇଛନ୍ତି। କିନ୍ତୁ ଏତେ ବଡ଼ ଘଟଣା ପରେ ନନ୍ଦନକାନନ କର୍ତ୍ତୃପକ୍ଷ କିମ୍ବା ବିଦ୍ୟୁତ୍ ବିଭାଗର ଦାୟିତ୍ୱରେ ଥିବା ରେଞ୍ଜର କୌଣସି ସ୍ପଷ୍ଟୀକରଣ ଦେଇ ନ ଥିଲେ। ତେବେ ରଜରେ ରୋପ୍ୱେ ଚାଲିବା ପାଇଁ ଜୋରସୋରରେ ଉଦ୍ୟମ ଚାଲିଥିଲା। ବିଦ୍ୟୁତ୍ ସମ୍ବନ୍ଧୀୟ ସମ୍ପୂର୍ଣ୍ଣ ଖର୍ଚ୍ଚ ନନ୍ଦନକାନନ ପକ୍ଷରୁ କରାଯାଇଥିବାବେଳେ ନୂଆକରି ଲଗାଯାଇଥିବା ଟ୍ରାନ୍ସଫର୍ମର ଫାଟିବାକୁ ନେଇ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି।
