ଲଣ୍ଡନ,୩।୨:ପର୍ନୋଗ୍ରାଫିକୁ ନେଇ ବିଶ୍ୱର ବିଭିନ୍ନ ଦେଶରେ ବହୁ ନିୟମମାନ ଲାଗୁ କରାଯାଇଛି। ପ୍ରତ୍ୟେକ ବୟସ ବର୍ଗର ଲୋକଙ୍କ ଉପରେ ଏହାର ନକାରାତ୍ମକ ପ୍ରଭାବକୁ ଦେଖି ଏ ପ୍ରକାର କାର୍ଯ୍ୟାନୁଷ୍ଠାନ ନିଆଯାଇଛି। ତେବେ ନିକଟରେ ଲଣ୍ଡନରେ କରାଯାଇଥିବା ଏକ ସର୍ଭେ ମୁତାବକ, ଅଧିକାଂଶ ପିଲା କିଶୋର ବୟସରେ ପହଞ୍ଚିବା ପୂର୍ବରୁ ପର୍ନ ବା ଅଶ୍ଳୀଳ ଫିଲ୍ମ ଦେଖିବା ଆରମ୍ଭ କରୁଛନ୍ତି। ଭବିଷ୍ୟତର ଯୁବପିଢ଼ିଙ୍କ ଉପକାର ସକାଶେ ପିଲାମାନଙ୍କୁ ଅନ୍ଲାଇନ୍ରେ ପ୍ରସାରିତ ହେଉଥିବା ଖରାପ କଣ୍ଟେଣ୍ଟ ଦେଖିବାକୁ ରୋକାଯିବା ବର୍ତ୍ତମାନ ସମୟରେ ଅତି ଗୁରୁତ୍ୱପୂର୍ଣ୍ଣ ହୋଇପଡ଼ିଥିବା ଏହି ପର୍ନୋଗ୍ରାଫି ସର୍ଭେରେ କୁହାଯାଇଛି।
ଅନ୍ଲାଇନ୍ରେ ଏକ ସାଧାରଣ ଭିଡିଓ ପ୍ରସାରିତ ହେବାଭଳି ବର୍ତ୍ତମାନ ସମୟରେ ପର୍ନ ଭିଡିଓ ସବୁ ଘୂରୁବୁଲୁଛି, ଯାହାଫଳରେ ପିଲାମାନଙ୍କ ନିକଟରେ ଏସବୁ ଅତି ସହଜରେ ପହଞ୍ଚିଯାଇ ପାରୁଛି। ପାଖାପାଖି ୧୦% ପିଲା ମାତ୍ର ୯ ବର୍ଷ ବୟସରେ ପର୍ନ ଭିଡିଓ ଦେଖୁଥିବାବେଳେ ୧୧ ବର୍ଷ ବୟସର ପ୍ରାୟ ୨୭% ପିଲା ଏହି ଭିଡିଓକୁ ଅନ୍ଲାଇନ୍ରେ ଦେଖିବାରେ ଲାଗିଛନ୍ତି।
ସର୍ଭେ ରିପୋର୍ଟ ଅନୁସାରେ, ମାଇକ୍ରୋବ୍ଲଗିଂ ସାଇଟ୍ ଟୁଇଟରରେ ସର୍ବାଧିକ ୪୧% ପିଲା ପର୍ନୋଗ୍ରାଫି ଦେଖୁଛନ୍ତି। ସେହିପରି ନିର୍ଦ୍ଦିଷ୍ଟ ପର୍ନୋଗ୍ରାଫି ସାଇଟ୍ରେ ୩୭%, ଇନ୍ଷ୍ଟାଗ୍ରାମରେ ୩୩%, ସ୍ନାପଚାର୍ଟରେ ୩୨% ଏବଂ ସର୍ଚ୍ଚ ଇଞ୍ଜିନ ଜରିଆରେ ୩୦% ପିଲା ଅଶ୍ଳୀଳ ଫିଲ୍ମ ଦେଖୁଛନ୍ତି। ପିଲାମାନଙ୍କୁ ଏ ପ୍ରକାର କାର୍ଯ୍ୟକଳାପରୁ ନିବୃତ୍ତ ରଖିବା ଅତ୍ୟନ୍ତ ଆବଶ୍ୟକ। ପୂର୍ବରୁ ବିକ୍ରି ହେଉଥିବା ଅଶ୍ଳୀଳ ମାଗାଜିନ୍ ଏବଂ ବର୍ତ୍ତମାନ ସମୟରେ ସହଜରେ ଅନ୍ଲାଇନ୍ରେ ଉପଲବ୍ଧ ହେଉଥିବା ଅଶ୍ଳୀଳ ଭିଡିଓ ମଧ୍ୟ ବହୁ ପାର୍ଥକ୍ୟ ରହିଥିବା ଲଣ୍ଡନର ଚିଲ୍ଡ୍ରେନ୍ କମିଶନର ଡାମେ ରାଚେଲ ଡି ସୋଜା କହିଛନ୍ତି। ଏ ନେଇ ଶିକ୍ଷକ ଓ ଆଇନ ପ୍ରଣେତାମାନେ ସମ୍ବେଦନଶୀଳ ହୋଇ କାର୍ଯ୍ୟାନୁଷ୍ଠାନ ଗ୍ରହଣ କରିବା ଉଚିତ୍।
ଭାରତରେ ୨୦୨୧ ମସିହା ନୂଆ ଆଇଟି ନିୟମ ଅନୁସାରେ ଭାରତରେ ପର୍ନୋଗ୍ରାଫିକ୍ ଓ୍ବେବ୍ ସାଇଟ୍ଗୁଡ଼ିକୁ ବ୍ୟାନ୍ କରାଯାଇଛି। ଏ ନେଇ ଗୁରୁତ୍ୱପୂର୍ଣ୍ଣ ନିୟମ ଗତବର୍ଷ ସେପ୍ଟେମ୍ବରରେ ଲାଗୁ କରାଯାଇଛି। ଏହା ଜରିଆରେ ପାଖାପାଖି ୬୩ଟି ଓ୍ବେବ୍ସାଇଟ୍କୁ କେନ୍ଦ୍ର ସରକାର ନିଷିଦ୍ଧ କରିଛନ୍ତି। ଉତ୍ତରାଖଣ୍ଡ ହାଇକୋର୍ଟଙ୍କ ନିର୍ଦ୍ଦେଶକ୍ରମେ ୨୦୧୮ରେ ପର୍ନୋଗ୍ରାଫିକ୍ କଣ୍ଟେଣ୍ଟ୍ ଥିବା ୮୨୭ ଓ୍ବେବ୍ସାାଇଟ୍କୁ ବ୍ଲକ୍ କରିଥିଲେ।
