ନୂଆଦିଲ୍ଲୀ, ୮ା୧ (ପି.ଟି.)-ଚତୁର୍ଥ ଟେଷ୍ଟ ପୂର୍ବରୁ ବ୍ରିସ୍ବେନର କଠୋର କ୍ୱାରାଣ୍ଟାଇନ୍ ପ୍ରୋଟୋକଲକୁ କୋହଳ କରିବା ଲାଗି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) କ୍ରିକେଟ ଅଷ୍ଟ୍ରେଲିଆ (ସିଏ) ଇଅର୍ଲ ଏଡିଙ୍ଗ୍ସଙ୍କ ନିକଟକୁ ଏକ ଚିଠି ଲେଖିଛି। ଟୁର୍ ପାଇଁ ଦୁଇ କ୍ରିକେଟ ବୋର୍ଡ ମଧ୍ୟରେ ଏକ ବୁଝାମଣାପତ୍ର ସ୍ବାକ୍ଷରିତ ହୋଇଥିଲା। ପୃଥକ୍ ପୃଥକ୍ ସହର ପାଇଁ ଦୁଇ ଅଲଗା କଠିନ କ୍ୱାରାଣ୍ଟାଇନ୍ ନିୟମ ସମ୍ପର୍କରେ ଏଥିରେ କୌଣସି ସର୍ତ୍ତ ନ ଥିଲା। ବ୍ରିସ୍ବେନ ଟେଷ୍ଟ ଜାନୁୟାରୀ ୧୫ରୁ ଆରମ୍ଭ ହେବ। ଏହି ସହର ପାଇଁ ହୋଇଥିବା କ୍ୱାରାଣ୍ଟାଇନ୍ ନିୟମ ଅନୁସାରେ ପ୍ରତ୍ୟେକ ଦିନ ଖେଳ ଶେଷ ହେବା ପରେ ଖେଳାଳିମାନଙ୍କୁ ସେମାନଙ୍କ ହୋଟେଲ ରୁମ୍ରେ ରହିବାକୁ ପଡ଼ିବ। ଦୁଇ ଦେଶର କ୍ରିକେଟ ବୋର୍ଡ ମଧ୍ୟରେ ଆଲୋଚନା ଜାରି ରହିଥିଲେ ମଧ୍ୟ ବିସିସିଆଇ ଏକ ଆନୁଷ୍ଠାନିକ ଚିଠି ପଠାଇବା ଲାଗି ନିଷ୍ପତ୍ତି ନେଇଥିଲା। ବିସିସିଆଇ ତରଫରୁ ଯେଉଁ ଦାବି କରାଯାଇଛି ତାହା ଅତି ସାଧାରଣ। ଖେଳାଳିମାନଙ୍କୁ ବାୟୋ-ବବଲ ହୋଟେଲ ଭିତରେ ପରସ୍ପର ସହ ମିଶିବାକୁ ଅନୁମତି ଦିଆଯାଉ। ହୋଟେଲ ଭିତରେ ସେମାନଙ୍କୁ ଏକତ୍ର ଖାଇବାକୁ ଅନୁମତି ମିଳୁ ଠିକ୍ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ କରାଯାଇଥିବା ବ୍ୟବସ୍ଥା ଭଳି। ଅନ୍ୟ ପକ୍ଷରେ କ୍ରିକେଟ ଅଷ୍ଟ୍ରେଲିଆ ତରଫରୁ କୁହାଯାଇଛି ଯେ, ହେଟେଲର ସମାନ ଫ୍ଲୋର୍ରେ ଅବସ୍ଥାନ କରୁଥିବା ଖେଳାଳିମାନେ ପରସ୍ପର ସହ ମିଳାମିଶା କରିପାରିବେ। କିନ୍ତୁ ଦୁଇ ପୃଥକ ଫ୍ଲୋରର ଖେଳାଳିମାନେ ଏକାଠି ହୋଇ ପାରିବେ ନାହିଁ। ଏହାକୁ ଅନେକ ହସ୍ୟାସ୍ପଦ ବୋଲି କହୁଛନ୍ତି।
