ଖୋର୍ଦ୍ଧା ଅଫିସ,୨୧।୫: ଲକ୍ଡାଉନ ଓ ଶଟ୍ଡାଉନ ମଧ୍ୟରେ କଂସାପିତ୍ତଳ କାରିଗରଙ୍କ ଜୀବିକା ପ୍ରଭାବିତ ହୋଇଛି। ବିକ୍ରିବଟା ବନ୍ଦ ଥିବାବେଳେ କଞ୍ଚାମାଲ ଅଭାବରୁ କାମ ଧିମେଇଛି। ଫଳରେ ପରିବାର ଚଳାଇବା ସେମାନଙ୍କ ପାଇଁ କଷ୍ଟକର ହୋଇପଡ଼ିଛି। ବିଶେଷକରି ଖୋର୍ଦ୍ଧା ବ୍ଲକ ମଲ୍ଲିପୁର ପଞ୍ଚାୟତ ଅଧୀନ ମୁକ୍ତାପୁର ଗ୍ରାମର କଂସା ପିତ୍ତଳ କାରିଗରଙ୍କ ଅବସ୍ଥା ଦୁର୍ବିଷହ ହୋଇଛି।
ଦିନ ଥିଲା, କଂସା ପିତ୍ତଳ କାରିଗରଙ୍କ ହାତଗଢ଼ା ସାମଗ୍ରୀର ଢ଼େର୍ ଚାହିଦା ଥିଲା। ରାଜ୍ୟର ବିଭିନ୍ନ ଅଞ୍ଚଳରୁ ବେପାରୀମାନେ ଆସି ସାମଗ୍ରୀ କିଣି ନେଉଥିଲେ। ବେପାର ଭଲ ଚାଲିଥିଲା। ମାତ୍ର ବଜାରରେ ଷ୍ଟିଲ, ପ୍ଲାଷ୍ଟିକ୍ ଓ ଫାଇବର ସାମଗ୍ରୀ ପ୍ରବେଶ କରିବା ପରଠୁ ପିତ୍ତଳ ଶିଳ୍ପ ପାଇଁ ଏକପ୍ରକାର ବିପଦ ମାଡ଼ି ଆସିଛି। କଞ୍ଚାମାଲ ଓ କାଠ କୋଇଲା ଅଭାବ ଯୋଗୁ କୌଳିକ ବୃତ୍ତିକୁ ଛାଡ଼ି ଅନେକ କାରିଗର ଏବେ ମୂଲ ଲାଗିଲେଣି। ପୂର୍ବରୁ ୫୦ରୁ ଊର୍ଦ୍ଧ୍ୱ ପରିବାର କମାରଶାଳ କରି ଗୁଜରାଣ ମେଣ୍ଟାଉଥିବାବେଳେ ଏବେ କେତେଜଣ ହାତଗଣତି କାରିଗର ନିଜ ବୃତ୍ତିକୁ ଜାବୁଡ଼ି ଧରିଛନ୍ତି। ତେବେ କଞ୍ଚାମାଲ୍ର ଅଭାବ ଓ ମୂଲ୍ୟ ବୃଦ୍ଧି ସାଙ୍ଗକୁ ସରକାରୀ ପ୍ରୋତ୍ସାହନ ନାହିଁ। ତେଣୁ ବୃତ୍ତିଠାରୁ ଯୁବପିଢ଼ି ଦୂରେଇ ଯାଉଥିବାରୁୁ ଏହି ଶିଳ୍ପର ଭବିଷ୍ୟତ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। କାରିଗର ଅଭିରାମ ମହାରଣା କହିଛନ୍ତି, ପ୍ରଥମେ ପିତ୍ତଳକୁ ତରଳାଇ ୨୦୦ ଗ୍ରାମ, ୫୦୦ ଗ୍ରାମ, ୧ କେଜି ପ୍ରଭୃତି ଓଜନର ଧାତୁ କରାଯାଏ। ଏହାପରେ ଗରମ ଧାତୁକୁ ବାଡ଼େଇ ବାଡ଼େଇ ସାମଗ୍ରୀ ତିଆରି କରାଯାଏ। କଂସାରି ସଂଘ ସମ୍ପାଦକ ବନମାଳି ଦାସ କହିଛନ୍ତି, ଦିନ ଥିଲା, ବିବାହ ବ୍ରତ ପ୍ରଭୃତି ବିଭିନ୍ନ ମାଙ୍ଗଳିକ କାର୍ଯ୍ୟରେ କଂସା ପିତ୍ତଳ ସାମଗ୍ରୀର ବହୁଳ ବ୍ୟବହାର ହେଉଥିଲା। କିନ୍ତୁ ଏବେ ଧିରେ ଧିରେ ତାହା ଲୋପ ପାଇବାକୁ ବସିଲାଣି। ସେହିପରି ପରିଶ୍ରମ ଅନୁଯାୟୀ ଫଳ ପାଉ ନ ଥିବା ପ୍ରମୋଦ ଦାସ ଓ ପ୍ରଫୁଲ୍ଲ ଦାସ ପ୍ରମୁଖ କହିଛନ୍ତି। ସରପଞ୍ଚ ବିଜୟ କୁମାର ଦାସ କହିଛନ୍ତି, ଏହି ଶିଳ୍ପର ବିକାଶ ଲାଗି ସରକାର ବିଶେଷ ଗୁରୁତ୍ୱ ଦେବା ଉଚିତ। ଏମାନଙ୍କ ଦକ୍ଷତା ବିକାଶ, ଆଧୁନିକ ଜ୍ଞାନକୌଶଳରେ ସାମଗ୍ରୀ ନିର୍ମାଣ ପାଇଁ ତାଲିମ ବ୍ୟବସ୍ଥା ସହ ପ୍ରୋସାହନ ଯୋଗାଇ ଦିଆଗଲେ ଏହି ଶିଳ୍ପର ପୁନରୁଦ୍ଧାର ହୋଇପାରିବ। ଯୁବପିଢି ମଧ୍ୟ ଏଥିପ୍ରତି ଆକୃଷ୍ଟ ହେବେ।
