ନୂଆଦିଲ୍ଲୀ,୧୫।୧: ବାଂଲାଦେଶ କ୍ରିକେଟରେ ଏକ ବଡ଼ ଧରଣର ସଙ୍କଟ ଦେଖାଦେଇଛି। ‘ବାଂଲାଦେଶ ପ୍ରିମିୟର ଲିଗ୍’ (BPL) ୨୦୨୬ର ପ୍ରଥମ ମ୍ୟାଚ୍ ଖେଳାଳିଙ୍କ ବୟକଟ୍ ଯୋଗୁଁ ରଦ୍ଦ ହୋଇଯାଇଛି। ଏହାକୁ କେନ୍ଦ୍ର କରି ଢାକାସ୍ଥିତ ଶେର-ଏ-ବାଂଲା ନ୍ୟାସନାଲ ଷ୍ଟାଡିୟମ ବାହାରେ ଉତ୍ତେଜନା ପ୍ରକାଶ ପାଇବା ସହ କ୍ରୋଧିତ ପ୍ରଶଂସକମାନେ ବ୍ୟାପକ ଭଙ୍ଗାରୁଜା କରିଛନ୍ତି।
ଜାନୁଆରୀ ୧୫ରୁ ଆରମ୍ଭ ହେବାକୁ ଥିବା BPLର ପ୍ରଥମ ମ୍ୟାଚରେ ରାଜଶାହୀ ଏବଂ ସିଲହଟ୍ ଟାଇଟନ୍ସ ମୁହାଁମୁହିଁ ହେବାର ଥିଲା। ରେଫରି ଟସ୍ ପାଇଁ ପଡ଼ିଆକୁ ଆସିଥିଲେ ମଧ୍ୟ କୌଣସି ଦଳର ଅଧିନାୟକ କିମ୍ବା ଖେଳାଳି ପଡ଼ିଆକୁ ଓହ୍ଲାଇ ନଥିଲେ।
ବାଂଲାଦେଶ କ୍ରିକେଟ ବୋର୍ଡ (BCB) ନିର୍ଦ୍ଦେଶକ ନଜମୁଲ ଇସଲାମଙ୍କୁ ବହିଷ୍କାର ନକରାଗଲେ କୌଣସି ଖେଳାଳି ଲିଗ୍ ଖେଳିବେ ନାହିଁ ବୋଲି ‘ବାଂଲାଦେଶ କ୍ରିକେଟର୍ସ ୱେଲଫେୟାର ଆସୋସିଏସନ’ ଚେତାବନୀ ଦେଇଥିଲା।
ମ୍ୟାଚ୍ ରଦ୍ଦ ହେବା ଖବର ଶୁଣି ଷ୍ଟାଡିୟମ ବାହାରେ ଥିବା ଶହ ଶହ ପ୍ରଶଂସକ ଉଗ୍ର ରୂପ ଧାରଣ କରିଥିଲେ। ସୋସିଆଲ ମିଡିଆରେ ଭାଇରାଲ ହୋଇଥିବା ଭିଡିଓରେ ପ୍ରଶଂସକମାନେ ପୋଷ୍ଟର ଚିରିବା ସହ ଲାଠି ମାଧ୍ୟମରେ ଷ୍ଟାଡିୟମର ସମ୍ପତ୍ତି ନଷ୍ଟ କରୁଥିବା ଦେଖିବାକୁ ମିଳିଛି।
ଏହି ବିବାଦର ମୂଳ କାରଣ ହେଉଛି BCB ନିର୍ଦ୍ଦେଶକ ନଜମୁଲ ଇସଲାମଙ୍କ ଏକ ବିବାଦୀୟ ମନ୍ତବ୍ୟ। ସେ ବାଂଲାଦେଶର ପୂର୍ବତନ ଅଧିନାୟକ ତମିମ୍ ଇକବାଲଙ୍କୁ “ଇଣ୍ଡିଆନ ଏଜେଣ୍ଟ” କହି ପରିହାସ କରିଥିଲେ। ତମିମ୍ ବୋର୍ଡକୁ ପରାମର୍ଶ ଦେଇଥିଲେ ଯେ ବିନା ଚିନ୍ତାଧାରାରେ ମନ୍ତବ୍ୟ ଦେବାରୁ ବିରତ ରୁହନ୍ତୁ, ଯାହାର ଜବାବରେ ନଜମୁଲ ଏଭଳି ଅପମାନଜନକ ଭାଷା ପ୍ରୟୋଗ କରିଥିଲେ।
ଖେଳାଳିଙ୍କ ଦୃଢ଼ ଆଭିମୁଖ୍ୟ ଏବଂ ବଢୁଥିବା ଉତ୍ତେଜନାକୁ ଦୃଷ୍ଟିରେ ରଖି ବାଂଲାଦେଶ କ୍ରିକେଟ ବୋର୍ଡ ଶେଷରେ ନଜମୁଲ ଇସଲାମଙ୍କୁ ତାଙ୍କ ପଦବୀରୁ ହଟାଇ ଦେଇଛି।
