ନୂଆଦିଲ୍ଲ,୨୦।୩(ପି.ଟି.): ଭାରତୀୟ ମହିଳା ବକ୍ସର ନିଖାତ ଜରିନ ଆଉ ଏକ ବିପର୍ଯ୍ୟୟ ଘଟାଇ ତୁର୍କୀର ଇସ୍ତାନବୁଲ୍ରେ ଚାଲିଥିବା ବୋସଫୋରସ ବକ୍ସିଂ ଟୁର୍ନାମେଣ୍ଟର ସେମିଫାଇନାଲରେ ପ୍ରବେଶ କରିଛନ୍ତି। ମହିଳା ୫୧ କେ.ଜି. ବର୍ଗରେ ଜରିନ ଶୁକ୍ରବାର ଦୁଇଥର ବିଶ୍ୱ ଚାମ୍ପିୟନଶିପ୍ ହାସଲ କରିଥିବା କାଜାଖସ୍ତାନର ନାଜିମ କିଜାଇବେଙ୍କୁ କ୍ୱାର୍ଟର ଫାଇନାଲରେ ହରାଇ ସେମିରେ ପ୍ରବେଶ କରିଛନ୍ତି। ଏହାପୂର୍ବରୁ ଜରିନ ପ୍ରି-କ୍ୱାର୍ଟରରେ ୨୦୧୯ ବିଶ୍ୱ ଚାମ୍ପିୟନ ରୁଷିଆର ପାଲ୍ଟସେଭା ଏକାଟେରିନାଙ୍କୁ ହରାଇଥିଲେ। ସେ ୪-୧ରେ କିଜାଇବେଙ୍କୁ ହରାଇଛନ୍ତି। କିଜାଇବେ ପୂର୍ବରୁ ୨୦୧୪ ଓ ୨୦୧୬ ବିଶ୍ୱ ଚାମ୍ପିୟନଶିପ୍ ହାସଲ କରିଥିଲେ। ସେମିକୁ ଉଠିଥିବାରୁ ଜରିନ ଅତିକମ୍ରେ ବ୍ରୋଞ୍ଜ୍ ପଦକ ହାସଲ କରିବା ନିଶ୍ଚିତ ହୋଇଛି।
ସେହିପରି ପୁରୁଷ ୫୭ କେ.ଜି. ବର୍ଗରେ ୨୦୧୮ ରାଜ୍ୟଗୋଷ୍ଠୀ କ୍ରୀଡ଼ା ସ୍ବର୍ଣ୍ଣ ପଦକ ବିଜେତା ଗୌରବ ସୋଲାଙ୍କି ମଧ୍ୟ ସେମିରେ ପ୍ରବେଶ କରି ପଦକ ନିଶ୍ଚିତ କରିଛନ୍ତି। ସେ ୪-୧ରେ ସ୍ଥାନୀୟ ଖେଳାଳି ଅଇକୋଲ ମିଜାନଙ୍କୁ ହରାଇ ସେମିକୁ ଉଠିଛନ୍ତି। ଅନ୍ୟପଟେ ମହିଳା ବର୍ଗରେ ସୋନିଆ ଲାଥର (୫୭ କେ.ଜି.), ପରବୀନ (୬୦ କେ.ଜି.) ଓ ଜ୍ୟୋତି (୬୯ କେ.ଜି.) କ୍ୱାର୍ଟର ଫାଇନାଲରେ ପରାସ୍ତ ହୋଇ ବିଦାୟ ନେଇଛନ୍ତି। ସେହିପରି ପୁରୁଷ ୬୩ କେ.ଜି. ବର୍ଗରେ ଶିବ ଥାପା ୧-୪ରେ ତୁର୍କୀର ହକନ ଡୋଗାନଙ୍କଠାରୁ ପରାସ୍ତ ହୋଇ ବିଦାୟ ନେଇଛନ୍ତି। ଟୁର୍ନାମେଣ୍ଟର ଚତୁର୍ଥ ଦିବସରେ ମହିଳା ଓ ପୁରୁଷ ବର୍ଗରେ ଦୁଇ ଭାରତୀୟ ଖେଳାଳି ସେମିରେ ଅବତୀର୍ଣ୍ଣ ହେବେ। ଜରିନ ସେମିରେ ୨୦୧୯ ବିଶ୍ୱ ଚାମ୍ପିୟନଶିପ୍ ରୌପ୍ୟ ପଦକ ବିଜୟିନୀ ତୁର୍କୀର ବୁସେନାଜ କାକିରୋଗ୍ଲୁଙ୍କୁ ଓ ସୋଲାଙ୍କି ସେମିରେ ଆର୍ଜେଣ୍ଟିନାର ନିର୍କୋ କୁଏଲୋଙ୍କୁ ଭେଟିବେ।
