କଣାସ,୨୨।୮(ଡି.ଏନ.ଏ): ଗଡ଼ିଶାଗୋଦା ଥାନା ଅଧୀନ କରମଳା ଗ୍ରାମର ବଜାରରେ ଗୁରୁବାର ରାତିରେ ପୂର୍ବ ଶତ୍ରୁତାରୁ ବୋମାମାଡ଼ ହୋଇଛି। ଖବରପାଇ ପୋଲିସ ପହଞ୍ଚି ୨ଟି ବୋମା ଓ ୨ ବାଇକ୍ ଜବତ କରିଛି। ଏହି ଘଟଣାରେ ସମ୍ପୃକ୍ତ କରମଳା ଗ୍ରାମର ସଜନୀ ସାହୁଙ୍କୁ ପୋଲିସ ଗିରଫ କରି ଶୁକ୍ରବାର କୋର୍ଟଚାଲାଣ କରିଛି। ଏହି ଗ୍ରାମର ପଦ୍ମଚରଣ ବିଶ୍ୱାଳ ଓ ଡମ୍ବୁରଧରଙ୍କ ମଧ୍ୟରେ ଜମିବାଡି ବିବାଦ ରହିଥିଲା। ଗୁରୁବାର ରାତିରେ ପଦ୍ମଚରଣ ବଜାରକୁ ସାମଗ୍ରୀ କିଣିବାକୁ ଯାଇଥିଲେ। ଏହି ସମୟରେ ଡମ୍ବରୁଧରଙ୍କ ପୁଅ ସୁମନ୍ତ ଓ ୩ଜଣ ସହଯୋଗୀ ବାଇକ୍ରେ ଆସି ପଦ୍ମଚରଣଙ୍କ ଉପରକୁ ବୋମା ମାଡ଼ କରିଥିଲେ। ଏଥିରେ ପଦ୍ମଚରଣ ଓ କେତେଜଣ ଲୋକେ ଆହତ ହୋଇଥିଲେ। ଏ ନେଇ ଥାନାରେ ମାମଲା (ନଂ.୧୦୯/୨୦)ରୁଜୁ ହୋଇଛି।
