ମୁମ୍ବାଇ: ଦେଶରେ ଜାରି ରହିଥିବା କରୋନା ସଙ୍କଟ ଯୋଗୁ ଚଳିତ ଥର ସବୁ ପର୍ବପର୍ବାଣି ଫିକା ପଡ଼ିଯାଇଛି। ସେଥିମଧ୍ୟରୁ ଅନ୍ୟତମ ହେଉଛି ଗଣେଶ ପୂଜା। ଶନିବାର ସାରା ଦେଶ ବିଘ୍ନରାଜଙ୍କୁ ସ୍ବାଗତ କରିବାରେ ଲାଗିପଡ଼ିଛି। ଚଳିତ ଥର ଗଣେଶ ଚତୁର୍ଥୀ ଫିକା ପଡ଼ିଯାଇଥିବା ବେଳେ ସମସ୍ତେ ନିଜ ନିଜ ଘରେ ବିଘ୍ନବିନାଶକଙ୍କୁ ପୂଜା କରିଛନ୍ତି। ଏହି ସ୍ବତନ୍ତ୍ର ଅବସରରେ ବଲିଉଡ୍ ମହାନାୟକ ଅମିତାଭ ବଚ୍ଚନ ଥ୍ରୋବ୍ୟାକ୍ ଫଟୋ ଶେୟାର କରି ପ୍ରଶଂସକଙ୍କୁ ଶୁଭକାମନା ଜଣାଇଛନ୍ତି।
ବଲିଉଡ୍ ଅଭିନେତ୍ରୀ କଙ୍ଗନା ରଣାଓ୍ବତ ମଧ୍ୟ ଟୁଇଟ କରି ଲୋକଙ୍କୁ ଗଣେଶ ଚତୁର୍ଥୀର ଶୁଭେଚ୍ଛା ଜଣାଇଛନ୍ତି। ସେହିପରି ଅଜୟ ଦେବଗନ ଗଣପତି ସେଲିବ୍ରେସନର ଏକ ଭିଡିଓ ଶେୟାର କରି ପ୍ରଶଂସକଙ୍କୁ ଶୁଭେଚ୍ଛା ଜଣାଇଥିବା ବେଳେ ପ୍ରତିବର୍ଷ ଭଳି ଚଳିତ ଥର ମଧ୍ୟ ବିବେକ ଓବରୟ ନିଜ ଘରେ ଗଣେଶଙ୍କ ମୂର୍ତ୍ତି ସ୍ଥାପନା କରି ପୂଜାର୍ଚ୍ଚନା କରିଛନ୍ତି। ବିବେକଙ୍କ ପତ୍ନୀ ଆଳତୀ କରିଥିବା ବେଳେ ତାଙ୍କ ଝିଅ ନଡ଼ିଆ ଭାଙ୍ଗି ଗଣେଶଙ୍କୁ ସ୍ବାଗତ କରିଥିଲେ। ଏହାର ଏକ ଭିଡିଓକୁ ବିବେକ ଇନ୍ଷ୍ଟାଗ୍ରାମ୍ରେ ଶେୟାର କରିଛନ୍ତି। ସେହିଭଳି ଶିଳ୍ପା ସେଟ୍ଟୀଙ୍କ ଘରେ ବି ଗଣେଶ ଉତ୍ସବର ମାହୋଲ ଦେଖିବାକୁ ମିଳିଛି। ଏହାର ଏକ ଭିଡିଓ ସେ ଇନ୍ଷ୍ଟାଗ୍ରାମରେ ଶେୟାର କରିଛନ୍ତି। ଯେଉଁଥିରେ ସେ ପୂଜାର୍ଚ୍ଚନା କରିବା ପରେ ଗଣପତି ବାପ୍ପାଙ୍କ ଆର୍ଶୀବାଦ ଭିକ୍ଷା କରିଥିବା ନଜର ଆସିଛନ୍ତି।
