ଆରଡି, ୨୪।୧୧( ଡି.ଏନ.ଏ.): ଭଦ୍ରକ ଜିଲା ଧୂଷୁରୀ ଥାନା ଓ ଆରଡି ଫାଣ୍ଡି ଅଧୀନ ଆରଡି ବସ୍ଷ୍ଟାଣ୍ଡରେ ଥିବା ଏକ ଲଜ୍ରୁ ପୋଲିସ ଜଣେ ଯୁବକଙ୍କ ମୃତଦେହ ଜବତ କରିଛି। ମୃତକ ଜଣଙ୍କ ହେଲେ ଧାମରା ଅଞ୍ଚଳର ଦୋସିଙ୍ଗା, ବାଲିସାହିର ନାରଣ ସାହୁ (୨୫)। ସେ ସ୍ଥାନୀୟ ଗେଲ ଇଣ୍ଡିଆ କମ୍ପାନୀରେ କାମ କରୁଥିଲେ। ପୋଲିସ ସୂଚନା ମୁତାବକ, ସେ ଲଜ୍ରେ ୩ ମାସ ହେଲା ଭଡ଼ାରେ ରହିଆସୁଥିଲେ। ଗୁରୁବାର ଦିନ ୧୧ଟା ପର୍ଯ୍ୟନ୍ତ ତାଙ୍କ କବାଟ ବନ୍ଦ ରହିଥିଲା। ଲଜ କର୍ମଚାରୀଙ୍କ ସନ୍ଦେହ ହେବାରୁ କବାଟ ବାଡ଼େଇଥିଲେ ବି କୌଣସି ଉତ୍ତର ମିଳି ନ ଥିଲା। ଖବର ପାଇ ଆରଡ଼ି ଫାଣ୍ଡି ଅଧିକାରୀ ସୁରେନ୍ଦ୍ର ମଲ୍ଲ ଓ ଚାନ୍ଦବାଲି ଅତିରିକ୍ତ ତହସିଲଦାର ଦୀପ୍ତିରଞ୍ଜନ ଜେନାଙ୍କ ଉପସ୍ଥିତିରେ ସ୍ଥାନୀୟ ଯୁବକ କବାଟ ତାଡ଼ିଥିଲେ। ପୋଲିସ ମୃତଦେହ ଜବତ କରି ଭଦ୍ରକ ମୁଖ୍ୟ ଚିକିତ୍ସାଳୟକୁ ବ୍ୟବଚ୍ଛେଦ ପାଇଁ ପଠାଇଥିଲା। ମୃତଙ୍କ ପରିବାର ଲୋକ ସେଠାରେ ଉପସ୍ଥିତ ଥିଲେ। ମୃତକଙ୍କ ମୃତ୍ୟୁ ସନ୍ଦେହ ଜନକ, ବ୍ୟବଚ୍ଛେଦ ରିପୋର୍ଟ ଆସିବା ପରେ କାରଣ ଜଣାପଡ଼ିବ ବୋଲି ପୋଲିସ କହିଛି। ଏ ସଂକ୍ରାନ୍ତରେ ଧୂଷୁରୀ ଥାନାରେ କେଶ ନଂ. ୩୫/୨୨ରେ ଏକ ମାମଲା ରୁଜୁ ହୋଇଛି।
