ଅମରପାଲି,୧।୧୨(ପୀତାମ୍ବର ସାହୁ): ସୁବର୍ଣ୍ଣପୁର ବନଖଣ୍ଡ ଅଧିନସ୍ଥ ବୀରମହାରାଜପୁର ରେଞ୍ଜ ହାତିଲିମୁଣ୍ଡା ଫରେଷ୍ଟ ବିଟ୍ର ବରଘାଟ ଦାଦର ଓ ବ୍ରାହ୍ମଣୀପାଲି ମଝିରେ ଥିବା ଜଙ୍ଗଲରେ ଏକ ଦନ୍ତାହାତୀର ମୃତଦେହ ଠାବ ହୋଇଛି। ସୂଚନା ଅନୁସାରେ, ବୀରମହାରାଜପୁର ବ୍ଲକ ଅନ୍ତର୍ଗତ ଦୁର୍ଜନତୈଲା ପଞ୍ଚାୟତର ବରଘାଟ ଦାଦର ଜଙ୍ଗଲରେ ସୋମବାର ସକାଳୁ ଏକ ଦନ୍ତା ହାତୀର ମୃତଦେହ ପଡ଼ିଥିବା କେତେକ ବ୍ୟକ୍ତି ଦେଖିଥିଲେ। ଖବରପାଇ ବନବିଭାଗ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲେ। ଖବରପାଇ ହାତୀର ମୃତଦେହ ଦେଖିବାକୁ ଶତାଧିକ ଲୋକଙ୍କ ସମାଗମ ହୋଇଥିଲା। ମାତ୍ର ବନ ବିଭାଗ କୌଣସି ଲୋକଙ୍କୁ ହାତୀର ମୃତଦେହ ପାଖକୁ ଛାଡ଼ି ନ ଥିଲେ। ହାତୀର ମୃତଦେହକୁ ଚାରିପଟୁ ଘୋଡ଼େଇ ଦେଇଥିଲେ। ଭବାନୀପାଟଣା ଡିଭିଜନର ଆରସିସିଏଫ ସନ୍ତୋଷ ଯୋଶୀ, ସୁବର୍ଣ୍ଣପୁର ବନଖଣ୍ଡ ଅଧିକାରୀ ମଦନଲାଲ ଶର୍ମା ମଧ୍ୟ ଘଟଣାସ୍ଥଳକୁ ଆସି ସ୍ଥିତି ନିରୀକ୍ଷଣ କରିଛନ୍ତି। ସୂଚନା ଅନୁସାରେ ଦୁଇଦିନ ପୂର୍ବରୁ ରେଢାଖୋଲ ବନଖଣ୍ଡ ଅଧିନସ୍ଥ କୁଆଖୋଲ ସଂରକ୍ଷିତ ଜଙ୍ଗଲରୁ ୫ ରୁ ୬ ଟି ହାତୀଥିବା ଏକ ହାତୀପଲ ହାତିଲିମୁଣ୍ଡା ସଂରକ୍ଷିତ ଜଙ୍ଗଲକୁ ଆସିଥିଲେ। ଏବେ ଧାନ ଅମଳର ସମୟ ହୋଇଥିବାରୁ ସନ୍ଧ୍ୟା ହେବାରୁ ହାତୀପଲ ଭାଲୁଡୁଙ୍ଗୁରୀ ଜଙ୍ଗଲ ଦେଇ ଅମରପାଲି ଓ ଗୁଦୁଗୁଦା ଅଞ୍ଚଳକୁ ଆସିଥିଲେ। ସ୍ଥାନୀୟ ଅଞ୍ଚଳର ଲୋକେ ହାତୀ ଘଉଡ଼ାଇଥିଲେ। ବୀରମହାରାଜପୁର ବନବିଭାଗ ମଧ୍ୟ ଶନିବାର ରାତିସାରା ଡ୍ରୋନ ସାହାଯ୍ୟରେ ହାତୀପଲକୁ ଘଉଡ଼ାଇବା ସହିତ ଏମାନଙ୍କର ଗତିବିଧି ଉପରେ ନଜର ରଖିବା ଦେଖିବାକୁ ମିଳିଥିଲା। ତେବେ ଏହି ପଲରୁ ଗୋଟିଏ ଦନ୍ତା ହାତୀ ଗୋଠ ଛଡ଼ା ହୋଇ ବଡ଼ମାଳ, କାଞ୍ଚନପାଲ ଜଙ୍ଗଲ ଦେଇ ବ୍ରାହ୍ମଣୀପାଲି – ବରଘାଟ ଦାଦର ଜଙ୍ଗଲ ଅଞ୍ଚଳକୁ ଯାଇଥିବା ସ୍ଥାନୀୟ ଲୋକେ ପ୍ରକାଶ କରିଛନ୍ତି। ତେବେ ବନ ବିଭାଗ ମଧ୍ୟ ଏହି ଦନ୍ତାର ଟ୍ରାକିଙ୍ଗ କରୁଥିବା ବେଳେ ସୋମବାର ସକାଳୁ ଏହାର ମୃତଦେହ ପାଇଥିଲା। ସ୍ଥାନୀୟ ଲୋକେ ଦାନ୍ତ ପାଇଁ ହାତୀକୁ ହତ୍ୟା କରାଯାଇଥିବା ଅଭିଯୋଗ କରିଛନ୍ତି। ଦନ୍ତା ହାତୀର ମୃତଦେହ ଯେଉଁଠାରେ ପଡ଼ିଛି ସେଠାରୁ ପ୍ରାୟ ଶହେ ମିଟର ଦୂର ରେ ୧୧ କେଭିର ବିଦ୍ୟୁତ ତାର ଯାଇଛି। ସେଠାରୁ ଶିକାରୀମାନେ ବିଦ୍ୟୁତ ତାର ଲଗାଇ ଜନ୍ତୁ ଶିକାର କରୁଥିବା ବିଦ୍ୟୁତ ତାର ସଂସ୍ପର୍ଶରେ ଆସି ଦନ୍ତାର ମୃତ୍ୟୁ ହୋଇଥିବା ପ୍ରାଥମିକ ତଦନ୍ତରୁ ଅନୁମାନ କରାଯାଉଛି। ହାତୀର ମୃତ୍ୟୁ ପରେ ସେଠାରେ ବିଛାଯାଇଥିବା ବିଦ୍ୟୁତ ତାରକୁ ଶିକାରୀମାନେ ନେଇଯାଇଥିବା ଅନୁମାନ କରାଯାଉଛି। ବିଦ୍ୟୁତ ସଂସ୍ପର୍ଶରେ ଆସବା ପରେ ପ୍ରାୟ ୫୦ ମିଟର ପର୍ଯ୍ୟନ୍ତ ଯାଇ ମୁହଁ ମାଡ଼ି ପଡ଼ି ହାତୀର ମୃତ୍ୟୁ ହୋଇଥିବା କୁହାଯାଉଛି। ଭବାନୀପାଟନା ସର୍କଲର ଆରସିସିଏଫ ସନ୍ତୋଷ ଯୋଶୀ ଘଟଣାସ୍ଥଳକୁ ଆସି ବିଦ୍ୟୁତ ବିଭାଗର କର୍ମଚାରୀଙ୍କ ସହିତ ଆଲୋଚନା କରୁଥିବାର ଦେଖିବାକୁ ମିଳିଥିଲା। ସୋମବାର ସନ୍ଧ୍ୟା ହୋଇଯାଇବାରୁ ମୃତଦେହକୁ ବ୍ୟବଚ୍ଛେଦ କରାଯାଇ ପାରି ନାହିଁ। ମଙ୍ଗଳବାର ଭୁବନେଶ୍ୱରରୁ ଏକ ବୈଷୟିକ ଦଳ ଓ ଫ୍ୟାକ୍ଟ ଫାଇଣ୍ଡିଙ୍ଗ ଟିମ ଆସି ସ୍ଥିତି ନିରୀକ୍ଷଣ କରିବା ସହିତ ହାତୀର ମୃତଦେହ ଓ ମୃତ୍ୟୁର କାରଣ ବିଷୟରେ ତଦନ୍ତ କରିବା ପରେ ବ୍ୟବଚ୍ଛେଦ କରାଯିବ ବୋଲି ବନବିଭାଗ ସୂଚନା ଦେଇଛି।
ବୀରମହାରାଜପୁର ରେଞ୍ଜ ଉପାନ୍ତ ଏହି ଅଞ୍ଚଳରେ ଅଧିକାଂଶ ସମୟରେ ଜନ୍ତୁ ଶିକାର ହୋଇଥାଏ। ଜନ୍ତୁ ଶିକାରୀ ମାନେ ବେଆଇନ ଭାବେ ଜଙ୍ଗଲରେ ବିଦ୍ୟୁତ ତାର ବିଛାଇ ଜନ୍ତୁ ଶିକାର କରିଥାନ୍ତି। ଏହି ଅଞ୍ଚଳରୁ ଜନ୍ତୁ ମାଂସ କୁ ବିଭିନ୍ନ ଅଞ୍ଚଳକୁ ପଠାଯାଉ ଥିବା ସ୍ଥାନୀୟ ଲୋକେ ଅଭିଯୋଗ କରୁଛନ୍ତି। ପୂର୍ବରୁ ଏହି ଅଞ୍ଚଳର ସୀମାରେ ଥିବା ସୁନାପାଲି ଜଙ୍ଗଲରେ ମଧ୍ୟ ଜନ୍ତୁ ଶିକାର ପାଇଁ ବିଛାଯାଇଥିବା ବିଦ୍ୟୁତ ତାରରେ ଲାଗି ଏକ ଦନ୍ତା ହାତୀର ମୃତ୍ୟୁ ହୋଇଥିଲା। ପରେ ସେହି ହାତୀର ଦାନ୍ତକୁ କାଟି ମାଫିଆମାନେ ଲୁଟ କରିନେଇଥିବା ନଜିର ରହିଛି।
ଦନ୍ତା ହାତୀର ମୃତ୍ୟୁକୁ ନେଇ ସୁବର୍ଣ୍ଣପୁର ବାନଖଣ୍ଡ ଅଧିକାରୀ ମଦନଲାଲ ଶର୍ମାଙ୍କୁ ପଚାରିବାରୁ ଦନ୍ତାର ମୃତ୍ୟୁର କାରଣ ଅସ୍ପଷ୍ଟ ବୋଲି କହିଛନ୍ତି। ତେବେ ତଦନ୍ତ ପରେ ମୃତ୍ୟୁର କାରଣ ଜଣାପଡିବ ବୋଲି କହିଛନ୍ତି। ଘଟଣାସ୍ଥଳରେ ଅନ୍ୟମାନଙ୍କ ମଧ୍ୟରେ ବୀରମହାରାଜପୁର ଏସିଏଫ ତଥା ଅତିରିକ୍ତ ରେଞ୍ଜ ଅଧିକାରୀ ଦାୟିତ୍ୱରେ ଥିବା ଅବିନାଶ ବରିହା, ଏସିଏଫ ଗିରିଧାରୀ ନାଗ, ଉଲୁଣ୍ଡା ରେଞ୍ଜଅଧିକାରୀ ଦେବରାଜ ଛତ୍ରିଆ, ବୀରମହାରାଜପୁର ଡେପୁଟି ରେଞ୍ଜର ଜଗବନ୍ଧୁ ବାରିକ, ହାତିଲିମୁଣ୍ଡା ବନପାଳ ଶଙ୍କର ବାଘ, ଯାଲୋଏ ବନପାଳ ପ୍ରଦୀପ କୁମାର ଜେନାଙ୍କ ସମେତ ବନବିଭାଗ କର୍ମଚାରୀ , ଠେଙ୍ଗୋ ଡ୍ୟାମ ଫାଣ୍ଡି ଅଧିକାରୀ ବିଭୁନ୍ଦ୍ର ବରାଳ ଙ୍କ ସହ ପୋଲିସ ଟିମ ଘଟଣାସ୍ଥଳରେ ଉପସ୍ଥିତ ଅଛନ୍ତି।
