ମହାକାଳପଡ଼ା, ୯ା୯ (ପ୍ରତାପ ଚନ୍ଦ୍ର ସ୍ବାଇଁ):କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ୍ ନଦୀନାଳ ଘେରା ବତିଘର ପଞ୍ଚାୟତରେ ୧୨ ହଜାର ଲୋକଙ୍କ ସ୍ବାସ୍ଥ୍ୟସେବା ଯୋଗାଇଦେବା ଅପହଞ୍ଚ ପାଲଟିଛି। ଏହି ଅଞ୍ଚଳକୁ ସଡ଼କ ପଥରେ ଯାତାୟାତ ବାଧାପ୍ରାପ୍ତ ହୋଇଥିବାରୁ ରୋଗୀମାନେ ବାଧ୍ୟହୋଇ ନଦୀ ପାର ହୋଇ ପାରାଦୀପ, ମହାକାଳପଡ଼ା ଓ କେନ୍ଦ୍ରାପଡ଼ା ଜିଲା ମୁଖ୍ୟ ଚିକିତ୍ସାଳୟକୁ ଯାଉଛନ୍ତି। ଏହି ଅଞ୍ଚଳରେ ରାଜ୍ୟ ସରକାରଙ୍କ ପକ୍ଷରୁ ୨୦୧୮-୧୯ଠାରୁ ଏକ ସ୍ବତନ୍ତ୍ର ବୋଟ୍ ଆମ୍ବୁଲାନ୍ସ ଯୋଗାଇ ଦେଉଛନ୍ତି। ଅଧିକ ଚିକିତ୍ସା ପାଇଁ ରୋଗୀମାନେ ବୋଟ୍ ଆମ୍ବୁଲାନ୍ସରେ ପାରାଦୀପ, ରାମନଗର, ମହାକାଳପଡ଼ାକୁ ଯାତାୟାତ କରିଥାନ୍ତି। ହେଲେ ସମୁଦ୍ର ଜୁଆର ପତ୍ତନ ପାଣି ମାଡ଼ିଲେ ଘାଟ କୂଳକୁ ଯାତାୟାତ ପ୍ରଭାବିତ ହେଉଛି। ଅପରପକ୍ଷରେ ଉତ୍ତର ଖୋଳା ନଦୀ ଆମ୍ବୁଲାନ୍ସ ଘାଟ କୂଳରେ ଆମ୍ବୁଲାନ୍ସ ରହୁଛି। ଫଳରେ ରୋଗୀମାନେ ଚିକିତ୍ସା ପାଇଁ ରାତି ହେଉ କି ଦିନରେ ଏହି ଘାଟକୁ ଯିବା ପାଇଁ ଅସୁବିଧାର ସମ୍ମୁଖୀନ ହେଉଛନ୍ତି ବୋଲି ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି।
୩ ଦିନ ପୂର୍ବେ ଜଣେ ଗୁରୁତର ଅବସ୍ଥାରେ ରୋଗୀଙ୍କୁ ବୋଟ୍ ଆମ୍ବୁଲାନ୍ସ ଯୋଗେ ନେବାକୁ ଘାଟ କୂଳକୁ ପରିବାର ଲୋକେ ନେଇଥିଲେ। ହେଲେ ଠିକାଦାର ଘାଟ କୂଳରେ ବାଲି,ଗୋଡ଼ି, ପଥର, ମୋରମ ଜମା କରିଥିବାରୁ ପରିବାର ଲୋକେ ରୋଗୀଙ୍କୁ ବାଧ୍ୟ ହୋଇ କାନ୍ଧ ଭାରରେ ବୋଟ୍ ଆମ୍ବୁଲାନ୍ସ ନେଇଥିବା ଦେଖିବକୁ ମିଳିଛି। ବତିଘର ପଞ୍ଚାୟତରେ ବିଭିନ୍ନ ସ୍ଥାନରେ କୋଠାବାଡ଼ି, ଘେରି ନଦୀବନ୍ଧ ନିର୍ମାଣ କାର୍ଯ୍ୟ ହେଉଥିବାରୁ ଠିକାଦାରମାନେ ଏହି ଆମ୍ବୁଲାନ୍ସ ଘାଟକୂଳରେ ସାମଗ୍ରୀ ରଖିଥିବା କୁହାଯାଇଛି। ତୁରନ୍ତ ଏହି ଘାଟକୂଳରୁ ସାମଗ୍ରୀଗୁଡିକୁ ହଟାଇବାକୁ ସ୍ଥାନୀୟ ଲୋକାମାନେ ଦାବି କରିଛନ୍ତି। ନଚେତ୍ ଜିଲା ପ୍ରଶାସନ ଓ ବିଧାୟକଙ୍କ ଦୃଷ୍ଟି ଆକର୍ଷଣ କରାଯିବ ବୋଲି ବୁଦ୍ଧିଜୀବୀ କହିଛନ୍ତି। ଏ ସମ୍ପର୍କରେ କେନ୍ଦ୍ରାପଡ଼ା ଜିଲା ମୁଖ୍ୟ ଚିକିତ୍ସା ଅଧିକାରୀ ଡା. ମନୋରଞ୍ଜନ ରାଉତଙ୍କୁ ପଚାରିବାରେ ମହାକାଳପଡ଼ା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଭାରପ୍ରାପ୍ତ ଅଧିକାରୀଙ୍କ ସହ ଆଲୋଚନା କରିବା ପରେ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି। ଏ ସଂକ୍ରାନ୍ତରେ କେନ୍ଦ୍ରାପଡ଼ା ଜିଲାପାଳ ରଘୁରାମ ଆର୍ ଆୟାରଙ୍କୁ ପଚାରିବାରେ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି।
