କଟକ,୩ା୧୧(ସୁପ୍ରିୟା ପ୍ରିୟଦର୍ଶିନୀ): ସରକାରଙ୍କ ଅଧୀନକୁ ଯିବ କଟକ ବଜ୍ରକବାଟିସ୍ଥିତ ବୋର୍ଡ ଅଫ୍ ସେକେଣ୍ଡାରୀ ହାଇସ୍କୁଲ। ୧୯୫୯ରେ ସ୍ଥାପିତ ସହରର ଏହି ପୁରାତନ ବିଦ୍ୟାଳୟର ପରିଚାଳନା ଦାୟିତ୍ୱ ମାଧ୍ୟମିକ ଶିକ୍ଷା ପରିଷଦ (ବୋର୍ଡ) ନିର୍ବାହ କରିଆସୁଥିଲା। ହେଲେ ଏବେ ବିଦ୍ୟାଳୟର ପରିଚାଳନା ଦାୟିତ୍ୱ ସ୍କୁଲ ଓ ଗଣଶିକ୍ଷା ବିଭାଗ ନେବା ପାଇଁ ପ୍ରସ୍ତୁତି ଚାଲିଛି। ଏଥିପାଇଁ ଗୁରୁବାର ଲୋକସେବା ଭବନରେ ଉଚ୍ଚସ୍ତରୀୟ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି। ମୁଖ୍ୟ ଶାସନ ସଚିବ ପ୍ରଦୀପ ଜେନାଙ୍କ ସମେତ ବିଦ୍ୟାଳୟ ଓ ଗଣଶିକ୍ଷା ବିଭାଗ ସଚିବ ଏବଂ ବୋର୍ଡ ଅଧିକାରୀ ଉପସ୍ଥିତ ରହି ବୋର୍ଡ ସ୍କୁଲ୍ ସରକାରଙ୍କ ଅଧୀନକୁ ଆଣିବା ପ୍ରସ୍ତାବ ସମ୍ପର୍କରେ ଆଲୋଚନା କରିଥିଲେ। ସ୍କୁଲ ସରକାରଙ୍କ ଅଧୀନକୁ ଆଣିବା ପାଇଁ କିଛି ଲିଗାଲ ପ୍ରୋସିଜିଅର ରହିଛି। ଏହା ସରିବା ପରେ କାର୍ଯ୍ୟ ଆଗକୁ ବଢ଼ିବ ବୋଲି ବୋର୍ଡ ସେକ୍ରେଟାରି ସୁମିତା ସରକାର କହିଛନ୍ତି।
ବୋର୍ଡ ଅଫ୍ ସେକେଣ୍ଡାରୀ ସ୍କୁଲ୍ରେ ଏବେ ଅନେକ ଶିକ୍ଷକ ଏବଂ କେତେକ କର୍ମଚାରୀ ପଦବୀ ଖାଲି ପଡ଼ିଛି। ଏହି ପଦବୀ ପୂରଣ ଦାୟିତ୍ୱ ବୋର୍ଡ କର୍ତ୍ତୃପକ୍ଷଙ୍କର ହୋଇଥିଲେ ହେଁ ତାହା ଠିକ୍ ଭାବେ କାର୍ଯ୍ୟକାରୀ ହୋଇପାରୁନାହିଁ। ସେହିପରି ସ୍କୁଲ ପରିଚାଳନା ନେଇ ବୋର୍ଡକୁ ଆର୍ଥିକ ସମସ୍ୟାର ସମ୍ମୁଖୀନ ହେବାକୁ ପଡୁଥିଲା। ବୋର୍ଡ ଏକ ସ୍ବୟଂଚାଳିତ ସଂସ୍ଥା। ଉକ୍ତ ସଂସ୍ଥା ଅଧୀନରେ ବୋର୍ଡ ସ୍କୁଲ୍ ରହିଛି। ଷଷ୍ଠରୁ ୧୦ମ ଶ୍ରେଣୀ ପର୍ଯ୍ୟନ୍ତ ପଢ଼ାଯାଉଥିବା ଏହି ସ୍କୁଲ ରାଜ୍ୟର ପ୍ରତିଷ୍ଠିତ ଶିକ୍ଷାନୁଷ୍ଠାନ ଭାବେ ଖ୍ୟାତି ରହିଛି। ଏଠାରେ ଶିକ୍ଷକ, କର୍ମଚାରୀ ନିଯୁକ୍ତିଠାରୁ ଆରମ୍ଭ କରି ଦରମା ପ୍ରଦାନ, ଭିତ୍ତିଭୂମି ନିର୍ମାଣ, ଅବସରପ୍ରାପ୍ତ କର୍ମଚାରୀଙ୍କୁ ପେନ୍ସନ୍ ପ୍ରଦାନ, ଆର୍ଥିକ ବ୍ୟୟବରାଦ ବୋର୍ଡ କର୍ତ୍ତୃପକ୍ଷ ହିଁ କରିଥାନ୍ତି। ଏଥିପାଇଁ ବୋର୍ଡ ପକ୍ଷରୁ ବାର୍ଷିକ ପ୍ରାୟ ୩ କୋଟି ଟଙ୍କା ଖର୍ଚ୍ଚ କରାଯାଇଥାଏ। ମାଟ୍ରିକ୍ ପରୀକ୍ଷା, ଓଟିଇଟି, ଅନ୍ୟ ପରୀକ୍ଷା, ପାଠ୍ୟପୁସ୍ତକ ବିକ୍ରି କରି ଯାହା ରୋଜଗାର ହୁଏ ତାହାର ସିଂହଭାଗ ଶିକ୍ଷକଙ୍କ ଦରମା ଏବଂ ଅବସରପ୍ରାପ୍ତ କର୍ମଚାରୀଙ୍କୁ ପେନ୍ସନ୍ ପ୍ରଦାନରେ ଖର୍ଚ୍ଚ ହୋଇଥାଏ। ବୋର୍ଡ ସ୍କୁଲ୍ର ବାର୍ଷିକ ଖର୍ଚ୍ଚ ବୃଦ୍ଧି ପାଉଥିବାରୁ କର୍ତ୍ତୃପକ୍ଷ ଚିନ୍ତାରେ ଥିଲେ। ଏହି ସ୍କୁଲ୍ର ପରିଚାଳନା ଦାୟିତ୍ୱ ସରକାରଙ୍କ ଅଧୀନରେ ରହୁ ବୋଲି ପୁରାତନ ଛାତ୍ର ସଂସଦ ପକ୍ଷରୁ ଏକ ପ୍ରସ୍ତାବ ଦିଆଯାଇଥିଲା। ଏହି ପ୍ରସ୍ତାବକୁ ବିଦ୍ୟାଳୟ ଓ ଗଣଶିକ୍ଷା ବିଭାଗ ତର୍ଜମା କରିଥିଲା। ଏହାପରେ ବିଭାଗର ନିର୍ଦ୍ଦେଶକ୍ରମେ ଜିଲା ଶିକ୍ଷାଧିକାରୀଙ୍କ ସମେତ ବିଭାଗର ଅନ୍ୟ ଅଧିକାରୀମାନେ ବିଦ୍ୟାଳୟ ସ୍ଥିତି ଅନୁଧ୍ୟାନ କରିଥିଲେ। ପରବର୍ତ୍ତୀ ସମୟରେ ଏ ସଂକ୍ରାନ୍ତୀୟ ଏକ ବିସ୍ତୃତ ରିପୋର୍ଟ ପ୍ରସ୍ତୁତ କରି ବିଭାଗକୁ ପଠାଇଥିଲେ। ବିଭାଗ ରିପୋର୍ଟକୁ ତର୍ଜମା କରି ଉକ୍ତ ସ୍କୁଲ୍ର ପରିଚାଳନା ଦାୟିତ୍ୱ ନିଜ ନିୟନ୍ତ୍ରଣକୁ ଆଣିବା ପାଇଁ ଯୋଜନା କରିଛି। ଏହି ସ୍କୁଲ ସରକାରଙ୍କ ନିୟନ୍ତ୍ରଣକୁ ଆସିବା ପରେ ଭିତ୍ତିଭୂମି ଆହୁରି ଅଧିକ ସୁଦୃଢ ହେବା ସହ ମାନବ ସମ୍ବଳ ବୃଦ୍ଧି ହୋଇପାରିବ ବୋଲି ବୁଦ୍ଧିଜୀବୀମାନେ ମତ ଦେଇଛନ୍ତି।
