ନୂଆଦିଲ୍ଲୀ, ୧୭।୮: ଭାରତର ଉପରାଷ୍ଟ୍ରପତି ପଦ ପାଇଁ ନିର୍ବାଚନ ଆସନ୍ତା ସେପ୍ଟେମ୍ବର ୯ ତାରିଖରେ ଅନୁଷ୍ଠିତ ହେବ। ଏହି ନିର୍ବାଚନ ପୂର୍ବତନ ଉପରାଷ୍ଟ୍ରପତି ଜଗଦୀପ ଧନଖରଙ୍କ ଅଚାନକ ଇସ୍ତଫା ପରେ ଆବଶ୍ୟକ ହୋଇଛି। ଜଗଦୀପ ଧନଖର ଗତ ଜୁଲାଇ ୨୧ ତାରିଖରେ ସ୍ବାସ୍ଥ୍ୟଗତ କାରଣ ଦର୍ଶାଇ ପଦରୁ ଇସ୍ତଫା ଦେଇଥିଲେ। ତାଙ୍କ କାର୍ଯ୍ୟକାଳ ୨୦୨୭ ଅଗଷ୍ଟ ପର୍ଯ୍ୟନ୍ତ ରହିଥାନ୍ତା। ରିପୋର୍ଟରୁ ଜଣାପଡିଛି ଯେ, ଧନଖରଙ୍କ ଇସ୍ତଫା ପଛରେ କେନ୍ଦ୍ର ସରକାର ସହ କିଛି ଫାଟ କିମ୍ବା ଅବିଶ୍ୱାସ ମଧ୍ୟ ଥାଇପାରେ। ବିଶେଷତଃ ନ୍ୟାୟାଧୀଶ ଯଶୱନ୍ତ ବର୍ମାଙ୍କ ଅଭିସଂଶନ ପ୍ରସ୍ତାବ ଉପରେ ସରକାରଙ୍କ ସହ ମତାନ୍ତର ଏହାର ଏକ ପ୍ରମୁଖ କାରଣ ଥାଇପାରେ।
ଭାରତୀୟ ଜନତା ପାର୍ଟି ଏବଂ ଏହାର ନେତୃତ୍ୱାଧୀନ ଜାତୀୟ ଗଣତାନ୍ତ୍ରିକ ମେଣ୍ଟ (ଏନଡିଏ) ର୍ନିବାଚନ ପାଇଁ ପ୍ରାର୍ଥୀ ଚୟନ ପ୍ରକ୍ରିୟା ଆରମ୍ଭ କରିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଭାଜପା ସଭାପତି ଜେ.ପି. ନଡ୍ଡାଙ୍କୁ ପ୍ରାର୍ଥୀ ଚୟନର ଦାୟିତ୍ୱ ଦିଆଯାଇଛି। ସୂତ୍ର ଅନୁସାରେ, ଭାଜପା ଏକ ଅଣ-ବିବାଦୀୟ ଏବଂ ଦଳୀୟ ଆଦର୍ଶ ଏବଂ ରାଷ୍ଟ୍ରୀୟ ସୱୟଂସେବକ ସଂଘ (ଆରଏସଏସ) ସହ ଗାଢ଼ ସମ୍ପର୍କ ଥିବା ଜଣେ ନେତାଙ୍କୁ ଚୟନ କରିବାକୁ ଚାହୁଁଛି।
ଭାଜପାର ସମ୍ଭାବ୍ୟ ପ୍ରାର୍ଥୀଙ୍କ ମଧ୍ୟରେ ଅନେକ ବରିଷ୍ଠ ନେତା ଏବଂ ରାଜ୍ୟପାଳଙ୍କ ନାମ ଚର୍ଚ୍ଚାରେ ରହିଛି। ସେମାନେ ହେଲେ:
ଭି.କେ. ସାକ୍ସେନା: ଦିଲ୍ଲୀର ଲେଫ୍ଟନାଣ୍ଟ ଗଭର୍ଣ୍ଣର। ସେ ରାଜନୈତିକ କ୍ଷେତ୍ରରେ ନିଜର ଦୃଢ଼ ଉପସ୍ଥିତି ଏବଂ ଆମ ଆଦମୀ ପାର୍ଟି (ଏଏପି) ସରକାରଙ୍କ ସହ ମତଭେଦ ମାଧ୍ୟମରେ ଚର୍ଚ୍ଚାରେ ରହିଛନ୍ତି।
ଆରିଫ ମହମ୍ମଦ ଖାନ: ବିହାରର ରାଜ୍ୟପାଳ। ତାଙ୍କର ରାଜନୈତିକ ଅଭିଜ୍ଞତା ଏବଂ ଭାଜପା ସହ ସମ୍ପର୍କ ତାଙ୍କୁ ଏକ ଶକ୍ତିଶାଳୀ ପ୍ରାର୍ଥୀ କରିଛି।
ଥାୱାରଚାନ୍ଦ ଗେହଲୋଟ: କର୍ନାଟକର ରାଜ୍ୟପାଳ ଏବଂ ଭାଜପାର ଜଣେ ବରିଷ୍ଠ ନେତା। ତାଙ୍କର ଦୀର୍ଘ ରାଜନୈତିକ କ୍ୟାରିୟର ଏହି ପଦ ପାଇଁ ତାଙ୍କୁ ଯୋଗ୍ୟ କରୁଛି।
ମନୋଜ ସିହ୍ନା: ଜମ୍ମୁ ଓ କଶ୍ମୀରର ଲେଫ୍ଟନାଣ୍ଟ ଗଭର୍ନର। ଧାରା ୩୭୦ ରଦ ପରେ ସେ ଅଞ୍ଚଳରେ ସ୍ଥିରତା ଆଣିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି।
ଅଚାର୍ଯ୍ୟ ଦେବବ୍ରତ: ଗୁଜରାଟର ରାଜ୍ୟପାଳ। ତାଙ୍କ ନାମ ମଧ୍ୟ ଚର୍ଚ୍ଚାରେ ରହିଛି।
ଓମ ମାଥୁର: ସିକ୍କିମର ରାଜ୍ୟପାଳ ଏବଂ ଭାଜପାର ଜଣେ ପ୍ରମୁଖ ନେତା।
ଶେଷାଦ୍ରୀ ଚାରୀ: ଆରଏସଏସର ଜଣେ ବରିଷ୍ଠ ବୁଦ୍ଧିଜୀବୀ। ତାଙ୍କ ନାମ ମଧ୍ୟ ଭାଜପାର ଚର୍ଚ୍ଚାରେ ରହିଛି।
ହରିବଂଶ ସିଂହ: ବର୍ତ୍ତମାନର ରାଜ୍ୟ ସଭା ଉପାଧ୍ୟକ୍ଷ। ବିହାର ନିର୍ବାଚନକୁ ଦୃଷ୍ଟିରେ ରଖି ତାଙ୍କ ନାମ ଏକ ଶକ୍ତିଶାଳୀ ବିକଳ୍ପ ଭାବେ ବିଚାର କରାଯାଉଛି।
ଉପରାଷ୍ଟ୍ରପତି ର୍ନିବାଚନ ଲୋକ ସଭା ଏବଂ ରାଜ୍ୟ ସଭାର ସଦସ୍ୟମାନଙ୍କ ଦ୍ୱାରା ଅନୁଷ୍ଠିତ ହୁଏ, ଯେଉଁଥିରେ ରାଜ୍ୟ ସଭାର ମନୋନୀତ ସଦସ୍ୟମାନେ ମଧ୍ୟ ଭୋଟ ଦେଇପାରନ୍ତି। ର୍ନିବାଚନ ଏକକ ସ୍ଥାନାନ୍ତରଣୀୟ ଭୋଟ ପ୍ରଣାଳୀ ମାଧ୍ୟମରେ ଗୁପ୍ତ ବାଲଟ ଦ୍ୱାରା ହୁଏ। ବର୍ତ୍ତମାନ ଉଭୟ ସଦନର ମୋଟ ସଦସ୍ୟ ସଂଖ୍ୟା ୭୮୬, ଏବଂ ଜିତିବା ପାଇଁ ଜଣେ ପ୍ରାର୍ଥୀଙ୍କୁ ଅତି କମରେ ୩୯୪ ଭୋଟ ଆବଶ୍ୟକ। ଏନଡିଏ ପାଖରେ ୪୨୨ ସଦସ୍ୟଙ୍କ ସମର୍ଥନ ରହିଛି, ଯାହା ସେମାନଙ୍କୁ ଏକ ସ୍ପଷ୍ଟ ସଂଖ୍ୟାଗରିଷ୍ଠତା ପ୍ରଦାନ କରୁଛି।
ଭାଜପା ଆଜି ଏକ ବଡ଼ ବୈଠକ ଆୟୋଜନ କରିବାକୁ ଯୋଜନା କରୁଛି, ଯେଉଁଥିରେ ଦଳର ଶୀର୍ଷ ନେତା ଏବଂ ଏନଡିଏର ମେଣ୍ଟସଭ୍ୟମାନେ ଉପସ୍ଥିତ ରହିବେ। ପ୍ରଧାନମନ୍ତ୍ରୀ ମୋଦି ଏହି ବୈଠକରେ ଏମପିମାନଙ୍କୁ ସମ୍ବୋଧିତ କରିପାରନ୍ତି। ଧନଖରଙ୍କ ଇସ୍ତଫା ପରେ ଭାଜପା ଅତ୍ୟନ୍ତ ସତର୍କତାର ସହ ପ୍ରାର୍ଥୀ ଚୟନ କରୁଛି, ଯାହା ଦ୍ୱାରା ପୂର୍ବ ଅନୈତିକ ସ୍ଥିତିର ପୁନରାବୃତ୍ତି ହେବ ନାହିଁ।
ଉପରାଷ୍ଟ୍ରପତି ଭାରତର ଦ୍ୱିତୀୟ ସର୍ବୋଚ୍ଚ ସାମ୍ବିଧାନିକ ପଦ ଏବଂ ରାଜ୍ୟ ସଭାର ଅଧ୍ୟକ୍ଷ ଭାବେ କାର୍ଯ୍ୟ କରନ୍ତି। ଏହି ପଦରେ ନିଯୁକ୍ତ ବ୍ୟକ୍ତିଙ୍କୁ ଭାରତୀୟ ନାଗରିକ ହେବା ଆବଶ୍ୟକ, ସେ ଅତି କମରେ ୩୫ ବର୍ଷ ବୟସର ହେବା ଉଚିତ ଏବଂ ରାଜ୍ୟ ସଭାର ସଦସ୍ୟ ହେବା ପାଇଁ ଯୋଗ୍ୟ ହେବା ଆବଶ୍ୟକ। ଏହା ବ୍ୟତୀତ, ସେ କେନ୍ଦ୍ର କିମ୍ବା ରାଜ୍ୟ ସରକାର ଅଧୀନରେ କୌଣସି ଲାଭଜନକ ପଦବୀରେ ନ ରହିବା ଉଚିତ।
