ନୂଆଦିଲ୍ଲୀ,୧।୧୦: ଆସନ୍ତା ଲୋକ ସଭା ନିର୍ବାଚନ ପାଇଁ ବିଏସପି ସୁପ୍ରିମୋ ମାୟାବତୀ କୌଣସି ଦଳ ସହ ମେଣ୍ଟ କରିବେ ନାହିଁ ବୋଲି ପୂର୍ବରୁ ଘୋଷଣା କରିସାରିଛନ୍ତି। ରବିବାର ପୁଣି ଦଳ ପକ୍ଷରୁ ଏକଥା ଦୋହରାଯାଇଛି। ଲକ୍ଷ୍ନୌର ପାର୍ଟି କାର୍ଯ୍ୟାଳୟରେ ଲୋକ ସଭା ନିର୍ବାଚନ ପାଇଁ ପ୍ରସ୍ତୁତି ପାଇଁ ବିଏସପି ଏକ ସମୀକ୍ଷା ବୈଠକ ଡାକିଥିଲା। ବୈଠକ ପରେ ଜାରି କରାଯାଇଥିବା ପ୍ରେସ ବିଜ୍ଞପ୍ତିରେ କୁହାଯାଇଛି ଯେ, ବିଏସପି ଉଭୟ ଏନ୍ଡିଏ ଏବଂ ମିଳିତ ମେଣ୍ଟ ‘ଇଣ୍ଡିଆ’ଠାରୁ ନିଜକୁ ଦୂରେଇ ରଖି ଲୋକ ସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବ। ମାୟାବତୀ ନେତାମାନଙ୍କୁ ମିଳିତ ମେଣ୍ଟରେ ଯୋଗଦାନକୁ ନେଇ ବିଭ୍ରାନ୍ତିକର ଖବରକୁ ନେଇ ସତର୍କ ରହିବାକୁ ଦଳୀୟ ନେତାମାନଙ୍କୁ ସତର୍କ କରାଇଦେଇଛନ୍ତି। ସେ କହିଛନ୍ତି ଯେ, ବିଏସପି ବିରୋଧୀ ବାହିନୀ ମିଥ୍ୟା ପ୍ରଚାର କରୁଛନ୍ତି। ମୁଦ୍ରାସ୍ଫୀତି, ଦାରିଦ୍ର୍ୟ, ବେକାରୀ, ଆୟ ହରାଇବା, ଖରାପ ରାସ୍ତା, ଆଇନ ଶୃଙ୍ଖଳା, ସ୍ବାସ୍ଥ୍ୟ ସମସ୍ୟା ନିଶ୍ଚିତ ଭାବରେ ଆସନ୍ତା ନିର୍ବାଚନର ଏଜେଣ୍ଡା ହେବ। ଜନସାଧାରଣଙ୍କ ସ୍ବାର୍ଥ ଏବଂ କଲ୍ୟାଣ ଉପରେ ଭାଜପା ଏବଂ କଂଗ୍ରେସର ମନୋଭାବ ସମାନ।
ଏହି ବୈଠକରେ ମାୟାବତୀ ବୁଲଡୋଜର କାର୍ଯ୍ୟକଳାପ ଉପରେ ମଧ୍ୟ ପ୍ରଶ୍ନ ଉଠାଇଥିଲେ। ସେ କହିଛନ୍ତି ଯେ, ଜଣେ ବ୍ୟକ୍ତିର ଦଣ୍ଡ ଘୋଷଣା କରିବା ପୂର୍ବରୁ ସମଗ୍ର ପରିବାରକୁ ଦଣ୍ଡ ଦେବା ହେଉଛି ଲୋକ ବିରୋଧୀ ପଦକ୍ଷେପ। ଏହି କାରଣରୁ ସାଧାରଣ ଜୀବନ ପ୍ରଭାବିତ ହେଉଛି ଏବଂ ଲୋକଙ୍କ ସମସ୍ୟା ବଢୁଛି।
