ପ୍ରୀତିପୁର,୨୩ା୮(ସୁଶାନ୍ତ ବେହୁରିଆ): ବିଞ୍ଝାରପୁର ବ୍ଲକ ଅନ୍ତର୍ଗତ ପ୍ରସିଦ୍ଧ ବରୁଣେଶ୍ୱର କ୍ଷେତ୍ରର ରୂପାନ୍ତରୀକରଣ କାର୍ଯ୍ୟ ବିଳମ୍ବକୁ ନେଇ ଅଞ୍ଚଳରେ ଅସନ୍ତୋଷ ବଢ଼ିବାରେ ଲାଗିଛି। ଏହି ପୀଠର ବିକାଶ ପାଇଁ ତତ୍କାଳୀନ ସରକାର ଘୋଷଣା କରିବା ପରେ ଅଞ୍ଚଳରେ ଆନନ୍ଦ ପ୍ରକାଶ ପାଇଥିଲା। ପୂର୍ତ୍ତ ଓ ଗୃହ ନିର୍ମାଣ ବିଭାଗ ପକ୍ଷରୁ ଏଥିନିମନ୍ତେ ଟେଣ୍ଡର କରାଯାଇ ବିଶ୍ୱନାଥ ସାହୁ ନାମକ ଠିକାଦାରଙ୍କୁ କାର୍ଯ୍ୟାଦେଶ ପ୍ରଦାନ କରାଯାଇଥିଲା। ପ୍ରାଥମିକ ପର୍ଯ୍ୟାୟରେ ଏଥିନିମନ୍ତେ ୩.୩ କୋଟି ଟଙ୍କାର ବ୍ୟୟ ଅଟକଳ କରାଯାଇଥିଲା। ଏହି ଅର୍ଥରେ ବରୁଣେଶ୍ୱର ପୀଠ ଚତୁଃପାର୍ଶ ପାଚେରି, ପୁଷ୍କରିଣୀ, ରୋଷଘର, ଶୌଚାଳୟ ସମେତ ମୁଖ୍ୟମନ୍ଦିରକୁ ଭଙ୍ଗାଯାଇ ସୁଉଚ୍ଚ ମନ୍ଦିର କରାଯିବାକୁ ଡିଜାଇନ ପ୍ରସ୍ତୁତ ହୋଇଥିଲା। ମାତ୍ର ପ୍ରଥମେ ଜାଗା ମାପଚୁପ କରାଯାଇ ପାଚେରି ନିର୍ମାଣ କରାଯିବାକୁ ସ୍ଥାନୀୟ ସରପଞ୍ଚଙ୍କ ସମେତ ଅଞ୍ଚଳବାସୀ ଦାବିକରିବାରୁ କାର୍ଯ୍ୟ ବିଳମ୍ବ ହୋଇଥିଲା। ଏହାପରେ ସାଧାରଣ ନିର୍ବାଚନ ହୋଇଥିଲା। ସରକାର ପରିବର୍ତ୍ତନ ହେବାରୁ ସମ୍ପୃକ୍ତ ଠିକାଦାର କାର୍ଯ୍ୟ କରିବାକୁ ଅମଙ୍ଗ ହୋଇଥିଲେ। ରାଜ୍ୟରେ ନୂଆ ସରକାର ୫-ଟି ବ୍ୟବସ୍ଥାକୁ ରଦ୍ଦ କରିବା ଦ୍ୱାରା ବରୁଣେଶର କ୍ଷେତ୍ରର ରୂପାନ୍ତୀକରଣ ବନ୍ଦ ହୋଇଯିବା ନେଇ ଚର୍ଚ୍ଚା ଜୋର ଧରିଥିଲା। ଏତିକିବେଳେ ଭାଜପା ନେତ୍ରୀ ବବିତା ମଲିକ କାର୍ଯ୍ୟ ବିଳମ୍ବ ପଛରେ ପିସି କାରବାର ଓ ସ୍ଥାନୀୟ ବିଧାୟିକାଙ୍କୁ ଦାୟୀ କରିଛନ୍ତି। ଅନ୍ୟପକ୍ଷରେ ଖୁବ୍ଶୀଘ୍ର ମନ୍ଦିର ରୂପାନ୍ତରିକରଣ କାର୍ଯ୍ୟ ଆରମ୍ଭ ହେବ ବୋଲି ବିଜେଡି ଖବରଦାତା ସମ୍ମିଳନୀ କରି ଦୃଢ଼ୋକ୍ତି ପ୍ରକାଶ କରିଛି। ଏ ସମ୍ପର୍କରେ ପୂର୍ତ୍ତ ଓ ଗୃହନିର୍ମାଣ ବିଭାଗ ସହକାରୀ ଅଧୀକ୍ଷଣ ଯନ୍ତ୍ରୀ ରାମଚନ୍ଦ୍ର ମଲ୍ଲିକଙ୍କୁ ପଚାରିବାରେ ସେ କହିଛନ୍ତି, ଠିକାଦାରଙ୍କୁ କାର୍ଯ୍ୟ ଆରମ୍ଭ କରିବା ନିମନ୍ତେ ତାଗିଦ କରାଯାଇଛି। ଯଦି ସେ କାର୍ଯ୍ୟ ଆରମ୍ଭ ନ କରନ୍ତି ତେବେ ପୁନର୍ବାର ଟେଣ୍ଡର କରିଯିବ। ବିଞ୍ଝାରପୁର ତହସିଲଦାରଙ୍କୁ ପଚାରିବାରେ ଶୁକ୍ରବାର ବରୁଣେଶ୍ୱର ପୀଠରେ ଥିବା ସରକାରୀ ଜମି ମାପଚୁପ କରାଯିବ ବୋଲି କହିଛନ୍ତି।
ବାବା ବରୁଣେଶ୍ୱର ପୀଠର ବିକାଶ ନିମନ୍ତେ ଦଳ ମତ ନିର୍ବିଶେଷରେ ସମସ୍ତେ ଏକଜୁଟ ହୋଇ ସହଯୋଗ କରିବାର ଆବଶ୍ୟକତା ରହିଛି ବୋଲି ଯୁବ ବିଜେଡି ନେତା ଜିତେନ୍ଦ୍ର ପ୍ରଧାନ କହିଛନ୍ତି। ପୀଠର ବିକାଶ ନିମନ୍ତେ ସ୍ଥାନୀୟ ବିଧାୟିକାଙ୍କ ପିସି କାରବାର ହିଁ ପ୍ରମୁଖ ପ୍ରତିବନ୍ଧକ ବୋଲି ଭାଜପା ନେତା ନିରଞ୍ଜନ ବେହୁରିଆ ମତ ରଖିଛନ୍ତି। ସେହିପରି ବରୁଣେଶ୍ୱର ପୀଠର ବିକାଶ ନିମନ୍ତେ ରାଜ୍ୟସରକାରଙ୍କ ପକ୍ଷରୁ ସମସ୍ତ ସହଯୋଗ ଯୋଗାଇ ଦିଆଯିବ ଭାଜପା ନେତ୍ରୀ ବିବିତା କହିଛନ୍ତି। ତେବେ ବରୁଣେଶ୍ୱର ପୀଠର ରୂପାନ୍ତୀକରଣ କାର୍ଯ୍ୟ ଖୁବଶୀଘ୍ର ଆରମ୍ଭ କରିବାକୁ ଅଞ୍ଚଳବାସୀଙ୍କ ପକ୍ଷରୁ ନୂତନ ଜିଲାପାଳଙ୍କ ନିକଟରେ ଦାବି ହୋଇଛି।
