ଖୁଣ୍ଟୁଣୀ,୨ା୭(ସଚ୍ଚିଦାନନ୍ଦ ପଣ୍ଡା):କଟକ ଜିଲା ଆଠଗଡ଼ ବ୍ଲକ ଅଧୀନ ଖୁଣ୍ଟୁଣୀ ସରକାରୀ ଡାକ୍ତରଖାନାର ନୂତନ ଗୃହ ନିର୍ମାଣ ପାଇଁ ସୋମବାର ଭୂମିପୂଜାବେଳେ ଭାଜପା ନେତା ଅଭୟ ବାରିକଙ୍କ ଉପସ୍ଥିତିକୁ ନେଇ ବିଜେଡି-ଭାଜପା କର୍ମୀ ମୁହାଁମୁହିଁ ହୋଇଥିଲେ। ଏପରି କି ବିଜେଡି କର୍ମୀଙ୍କୁ ଭାଜପା କର୍ମୀ ମାଡ ମାରିଥିବା ଅଭିଯୋଗ ହୋଇଛି। ମାଡ଼ ମାରିଥିବା ଭାଜପା କର୍ମୀଙ୍କୁ ଗିରଫ କରିବା ଦାବିରେ ବିଜେଡି ସମର୍ଥିତ ଖୁଣ୍ଟୁଣୀ ପଞ୍ଚାୟତର ସମିତିସଭ୍ୟ ଗଗନ ବିହାରୀ ପରିଡା ଜାତୀୟ ରାଜପଥ ଅବରୋଧ କରିଥିଲେ। ଖବରପାଇ ସ୍ଥାନୀୟ ପୋଲିସ ଓ ମାଜିଷ୍ଟ୍ରେଟ ଅଶୋକ କୁମାର ସ୍ବାଇଁ ପହଞ୍ଚତ୍ ପରିଡାଙ୍କୁ ବୁଝାସୁଝା କରିବା ସହ ରାସ୍ତା ଅବରୋଧରୁ ଉଠାଇଥିଲେ।
ମିଳିଥିବା ସୂଚନା ଅନୁଯାୟୀ, ଜାତୀୟ ସ୍ବାସ୍ଥ୍ୟ ମିଶନ ପକ୍ଷରୁ ୧ କୋଟି ଟଙ୍କା ବ୍ୟୟ ଅଟକଳରେ ଖୁଣ୍ଟୁଣୀ ସ୍ବାସ୍ଥ୍ୟକେନ୍ଦ୍ର ପରିସରରେ ନୂତନ ଗୃହ ନିର୍ମାଣ ପାଇଁ ସୋମବାର ପୂର୍ବାହ୍ନ ୧୦ଟାରେ ଭୂମିପୂଜା କରାଯାଇଥିଲା। ସେଠାରେ ସମିତିସଭ୍ୟ ପରିଡା ଓ ସରପଞ୍ଚ କୈଳାସ ଚନ୍ଦ୍ର ଦାସ ତାଙ୍କର କେତେଜଣ ସମର୍ଥକଙ୍କ ସହିତ ଉପସ୍ଥିତ ଥିଲେ। ଅପରପକ୍ଷେ ଠିକାଦାରଙ୍କଠାରୁ ସୂଚନା ପାଇ ମଧ୍ୟାହ୍ନ ପ୍ରାୟ ୧୨ଟାରେ ଆଠଗଡ଼ର ଭାଜପା ନେତା ଅଭୟ ବାରିକ ତାଙ୍କ ସମର୍ଥକଙ୍କ ସହିତ ଡାକ୍ତରଖାନାଠାରେ ପହଞ୍ଚିଥିଲେ। ଅଭୟଙ୍କ ଉପସ୍ଥିତି ଦେଖି ବିଜେଡି କର୍ମୀମାନେ ଅସନ୍ତୋଷ ପ୍ରକାଶ କରି ହୋହଲ୍ଲା କରିଥିଲେ। ଏହାକୁ ନେଇ ବିଜେଡି ଓ ଭାଜପା କର୍ମୀ ଠେଲାପେଲା ହେବା ସହ ମାରପିଟ୍ ହୋଇଥିଲେ। ଏଥିରେ ସମିତିସଭ୍ୟ ପରିଡ଼ା ଆହତ ହୋଇଥିଲେ। ଖୁଣ୍ଟୁଣୀ ଥାନା ଆଇଆଇସି ଭବାନୀ ଶଙ୍କର ଖୁଣ୍ଟିଆ ଓ ମାଜିଷ୍ଟ୍ରେଟ ଅଶୋକ ସ୍ବାଇଁ ପହଞ୍ଚି ଉଭୟ ପକ୍ଷର କର୍ମୀଙ୍କୁ ବୁଝାଶୁଝା କରିଥିଲେ। ପରେ ଗ୍ରାମ୍ୟ କମିଟି ସଦସ୍ୟ ଓ ପୋଲିସ ଉପସ୍ଥିତିରେ ସ୍ବାସ୍ଥ୍ୟସେବା କ୍ରିୟାନୁଷ୍ଠାନ କମିଟିର ଆବାହକ ଗୌରହରି ମହାନ୍ତିଙ୍କୁ ଭୂମିପୂଜା ପାଇଁ ଅଭୟ ନଡ଼ିଆ ଦେଇଥିଲେ। ଏହାପରେ ସେ ନଡ଼ିଆ ବାଡେଇ ଭୂମିପୂଜା କରିଥିଲେ। ଅଭୟ ଖୁଣ୍ଟୁଣୀ ଡାକ୍ତରଖାନାକୁ ସିଏଚ୍ସି ଓ ଟ୍ରମା କେୟାର ସେଣ୍ଟର ପାଇଁ ସରକାର ଅନୁମତି ଦେଇଥିବା କହି ସେଠାରୁ କର୍ମୀଙ୍କୁ ନେଇ ପଳାଇଥିଲେ। ଅପରପକ୍ଷରେ ବିଜେଡି କର୍ମୀଙ୍କୁ ଭାଜପା କର୍ମୀ ମାଡ ମାରିଥିବା ନେଇ ସମିତି ସଭ୍ୟ ପରିଡା ଥାନାରେ ଏତଲା ଦେଇଥିଲେ। ତୁରନ୍ତ ଭାଜପା କର୍ମୀଙ୍କୁ ଗିରଫ କରିବା ଦାବିରେ ପରିଡା ରାସ୍ତା ଅବରୋଧ କରିଥିଲେ। ଖୁବ୍ଶୀଘ୍ର ଅଭିଯୁକ୍ତଙ୍କୁ ଗିରଫ କରାଯିବ ବୋଲି ପୋଲିସ ପ୍ରତିଶ୍ରୁତି ଦେବା ପରେ ରାସ୍ତାରୋକୋ ହଟିଥିଲା। ଅପରପକ୍ଷରେ ଭାଜପା କର୍ମୀଙ୍କ ପକ୍ଷରୁ ଥାନାରେ ଏତଲା ଦିଆଯାଇଛି। ଠିକାଦାରଙ୍କଠାରୁ ସୂଚନା ପାଇଁ ଆମେ ସ୍ବାସ୍ଥ୍ୟକେନ୍ଦ୍ରକୁ ଆସିଥିଲୁ। ହେଲେ ସେଠାରେ ବିଜେଡି କର୍ମୀମାନେ ଅଯଥାରେ ଆମକୁ ଆକ୍ରମଣ କରିଥିଲେ ବୋଲି ଏତଲାରେ ଦର୍ଶାଯାଇଛି। ଉଭୟ ପକ୍ଷର ଅଭିଯୋଗକୁ ଭିତ୍ତିକରି ଥାନାରେ ୨ଟି ମାମଲା ରୁଜୁ ହୋଇଛି ବୋଲି ଆଇଆଇସି ଖୁଣ୍ଟିଆ କହିଛନ୍ତି।
