ବର୍ମିଂହାମ,୩୧।୭: ରାଜ୍ୟଗୋଷ୍ଠୀ କ୍ରୀଡାରେ ଭାରତକୁ ୪ର୍ଥ ପଦକ। ବିନ୍ଦ୍ୟାରାଣୀ ଦେବୀ ମହିଳା ଭାରୋତ୍ତୋଳନର ୫୫ କିଗ୍ରା ବର୍ଗରେ ଭାରତ ପାଇଁ ଜିତିଛନ୍ତି ରୌପ୍ୟ ପଦକ। ମୋଟ ୨୦୨ କିଗ୍ରା ଓଜନ ଉଠାଇ ସେ ରୋପ୍ୟ ନିଜ ନାମରେ କରିଛନ୍ତି।
ରୋପ୍ୟ ଜିତିବା ପରେ ନିଜ ଖୁସିବ୍ୟକ୍ତ କରି ବିନ୍ଦ୍ୟାରାଣୀ କହିଛନ୍ତି, ମୁଁ ପ୍ରଥମ ଥର ଲାଗି ରାଜ୍ୟଗୋଷ୍ଠୀ କ୍ରୀଡାରେ ଭାଗ ନେଇଛି। ଏଥିରେ ରୋପ୍ୟ ଜିତି ମୁଁ ବହୁତ ଖୁସି। ଆଜି ମୋ’ ଜୀବନର ସବୁଠାରୁ ଭଲ ପ୍ରଦର୍ଶନ ଥିଲା। ହେଲେ ସ୍ବର୍ଣ୍ଣ ଜିତି ପାରିଲି ନାହିଁ। ଆଗାମୀ ଦିନରେ ଆହୁରୀ ଭଲ କରିବାକୁ ଚେଷ୍ଟା କରିବି ବୋଲି ସେ କହିଛନ୍ତି।
ପ୍ରକାଶ ଯେ, ଏଯାବତ ରାଜ୍ୟଗୋଷ୍ଠୀ କ୍ରୀଡ଼ାରେ ଭାରତ ୪ ପଦକ ଜିତିଥିବା ବେଳେ ସବୁ ଭାରୋତ୍ତୋଳନରୁ ଆସିଛି। ଦେଶ ପାଇଁ ଭାରୋତ୍ତୋଳକ ସଙ୍କେତ ମହାଦେବ ସାଗର ପ୍ରଥମ ପଦକ(ରୌପ୍ୟ) ଜିତିଥିଲେ । ଏହା ପରେ ପୁରୁଷ ୬୧ କେଜି ବର୍ଗରେ ଗୁରୁରାଜ ପୂଜାରୀ ଦେଶ ପାଇଁ ବ୍ରୋଞ୍ଜ ପଦକ ଜିତିଥିଲେ। ଭାରୋତ୍ତୋଳନରେ ଦେଶ ପାଇଁ ତୃତୀୟ ପଦକ ଜିତିଥିଲେ ଟୋକିଓ ଅଲିମ୍ପିକ୍ସରେ ରୌପ୍ୟ ପଦକ ଜିତିଥିବା ମୀରାବାଈ ଚାନୁ। ସେ ସ୍ବର୍ଣ୍ଣ ପଦକ ଜିତିବା ସହ ଏହି କ୍ରୀଡାରେ ରେକର୍ଡ କରିଥିଲେ।
