ଜ୍ୟୋତିଷଶାସ୍ତ୍ର ଅନୁଯାୟୀ, ରାଖୀପୂର୍ଣ୍ଣିମା ଦିନ ଯଦି ଭଉଣୀଟିଏ ତା’ ଭାଇର ରାଶିକୁ ସୁହାଇଲା ଭଳି ଠିକ୍ ରଙ୍ଗର ରାଖୀ ଚୟନ କରି ହାତରେ ବାନ୍ଧିଦେଇ ଥାଏ, ତା’ହେଲେ ସେହି ରାଖୀ ଭାଇ ଜୀବନରେ ସୁଖସମୃଦ୍ଧି ଭରିଦେଇଥାଏ ବୋଲି ବିଶ୍ୱାସ କରାଯାଏ। ଯେମିତିକି ମେଷ ରାଶି ଥିବା ଭାଇମାନଙ୍କ ହାତରେ ନାଲିରଙ୍ଗର ରାଖୀ ବାନ୍ଧିଲେ ସେମାନଙ୍କ ଜୀବନରେ ଶାନ୍ତି ବଜାୟ ରହିବା ସହ ସର୍ବଦା ଉର୍ଜ୍ଜାବାନ ରହିଥାନ୍ତି। ସେହି ଦୃଷ୍ଟିରୁ ଦେଖିଲେ ବୃଷ ରାଶି ପାଇଁ ଧଳା, ମିଥୁନ ରାଶି ସବୁଜ, କର୍କଟ ରାଶି ଧଳା କିମ୍ବା ହଳଦିଆ, ସିଂହ ରାଶି ପାଇଁ ନାଲି କିମ୍ବା ହଳଦିଆ ରଙ୍ଗର ରାଖୀ ଶୁଭ ବୋଲି ବିବେଚନା କରାଯାଇଥାଏ। ସେହିପରି ଯେଉଁ ଭାଇମାନଙ୍କର କନ୍ୟା ରାଶି ସେମାନଙ୍କୁ ସବୁଜ, ତୁଳା ରାଶିର ଭାଇଙ୍କୁ ନୀଳ କିମ୍ବା ଧଳା ରଙ୍ଗର, ବିଛା ରାଶି ନାଲି କିମ୍ବା ଗୋଲାପୀ, ଧନୁ ରାଶି ପାଇଁ ସୁନେଲି ଅବା ହଳଦିଆ ରଙ୍ଗର ରାଖୀ ବାନ୍ଧିବା ଶୁଭ ହୋଇଥାଏ। କୁହାଯାଏ, ଏହାଦ୍ୱାରା ଭାଇଭଉଣୀଙ୍କ ଭିତରେ ସମ୍ପର୍କ ଦୃଢ଼ ହେବା ସହ ଭଲପାଇବା ବଢ଼ିଥାଏ। ତା’ଛଡ଼ା ମକର ଓ କୁମ୍ଭ ରାଶିର ଭାଇମାନଙ୍କ ପାଇଁ ଗାଢ଼ ନୀଳ ହେଉ ଅବା ହାଲୁକା ନୀଳ ରଙ୍ଗର ରାଖୀ ବାନ୍ଧିବା ଉତ୍ତମ ହୋଇଥାଏ। ଅନ୍ୟପକ୍ଷେ ମୀନ ରାଶିଙ୍କ ପାଇଁ ଚକଚକିଆ ହଳଦିଆ କିମ୍ବା ସବୁଜ ରଙ୍ଗର ରାଖୀ ସର୍ବଶ୍ରେଷ୍ଠ ହୋଇଥାଏ; କାରଣ ଏହା ସେମାନଙ୍କୁ ସୁଖଶାନ୍ତି ପ୍ରଦାନ କରିଥାଏ ବୋଲି ଜ୍ୟୋତିର୍ବିଦ୍ମାନେ ମତ ଦେଇଥାନ୍ତି।
