ଥୁଆମୂଳ ରାମପୁର,୧୧।୨(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକରେ ପୁଣି ଏକ ମର୍ମନ୍ତୁଦ ସଡ଼କ ଦୁର୍ଘଟଣା ହୋଇଛି । ତେବେ ଏଥରେ ଦୁଇ ବାଇକ ଆରୋହୀଙ୍କ ମୃତ୍ୟୁ ହୋଇଥିବା ନେଇ ଅଭିଯୋଗ ହୋଇଛି । ପରିବାରର ହସ ଖୁସି ଛଡାଇ ନେଇଛି ଦୁର୍ଘଟଣା। ମଙ୍ଗଳବାର ସନ୍ଧ୍ୟାରେ ଘଟିଥିବା ଏହି ଦୁର୍ଘଟଣାରେ ଡୁମେରପଦର ଗ୍ରାମର କେଶବ ମାଝୀ (୨୨) ଓ ବଡ଼ଦେରଲା ଗ୍ରାମର ବିନୋଦ ଗୌଡ଼ (୨୦)ଙ୍କର ଅକାଳ ବିୟୋଗ ଘଟିଛି ।
ଖବର ଅନୁସାରେ, ମଙ୍ଗଳବାର ସନ୍ଧ୍ୟା ପ୍ରାୟ ୬ଟା୩୦ ସମୟରେ କେଶବ ଓ ବିନୋଦ ଏକ କେଟିଏମ ଡ୍ୟୁକ ବାଇକ (OD-08-AA-2946) ଯୋଗେ ଥୁଆମୂଳ ରାମପୁରରୁ ଫେରୁଥିଲେ । କାଠକୁରା-ଥୁଆମୂଳ ରାମପୁର ମୁଖ୍ୟ ରାସ୍ତାର ସାହୁ ଜଙ୍ଗଲ ନିକଟସ୍ଥ ଏକ ପୋଲ ବୁଲାଣିରେ ଗାଡ଼ିଟି ଭାରସାମ୍ୟ ହରାଇବାରୁ ଦୁର୍ଘଟଣା ଘଟିଥିଲା। ଘଟଣାସ୍ଥଳରେ ହିଁ କେଶବଙ୍କର ପ୍ରାଣବାୟୁ ଉଡ଼ିଯାଇଥିବା ବେଳେ ବିନୋଦ ଗୁରୁତର ହୋଇଥିଲେ । ଅଭିଯୋଗ ଅନୁଯାୟୀ, ଦୁର୍ଘଟଣା ପରେ ଦୀର୍ଘ ସମୟ ପର୍ଯ୍ୟନ୍ତ ସରକାରୀ ଆମ୍ବୁଲାନ୍ସ ମିଳିପାରିନଥିଲା। ଶେଷରେ ଅଗ୍ନିଶମ ବାହିନୀ ସହାୟତାରେ ସ୍ଥାନୀୟ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଅଣାଯାଇଥିଲା।
ବିନୋଦଙ୍କ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ଭବାନୀପାଟଣା ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା। ସେଠାରେ ମଧ୍ୟ ସରକାରୀ ସହାୟତା ନମିଳିବାରୁ ପରିବାର ଲୋକେ ଘରୋଇ ଗାଡ଼ି ଯୋଗେ ବିନୋଦଙ୍କୁ ନେଇଥିଲେ ହେଁ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଠି । ଏହି ଦୁଃଖଦ ଘଟଣା ପରେ ସ୍ଥାନୀୟ ଅଞ୍ଚଳର ଯୁବ ସମାଜସେବୀ ତଥା ସାମ୍ବାଦିକ ଦୁର୍ଗା କୀର୍ତ୍ତି ଗଭୀର ଶୋକ ପ୍ରକାଶ କରିବା ସହ ଯୁବପିଢ଼ିଙ୍କୁ ହେଲମେଟ ପିନ୍ଧିବା ଓ ଦ୍ରୁତ ଗତିରୁ ନିବୃତ୍ତ ରହିବାକୁ ନିବେଦନ କରିଛନ୍ତି । ଅନ୍ୟପଟେ ସାହୁ ଜଙ୍ଗଲ ନିକଟସ୍ଥ ସେହି ନିର୍ଦ୍ଦିଷ୍ଟ ବୁଲାଣିରେ ବାରମ୍ବାର ଦୁର୍ଘଟଣା ଘଟୁଥିବାରୁ, ସେହି ସ୍ଥାନକୁ ‘Accident Zone’ ଘୋଷଣା କରି ସଚେତନତା ଫଳକ ଲଗାଇବାକୁ ଅଞ୍ଚଳବାସୀ ଦୃଢ଼ ଦାବି କରିଛନ୍ତି । ଥୁଆମୂଳ ରାମପୁର ଥାନାରେ ଏକ ଅପମୃତ୍ୟୁ ମାମଲା ରୁଜୁ ହୋଇଥିବା ବେଳେ, ଆଜି ବୁଧବାର ଶବ ବ୍ୟବଚ୍ଛେଦ ପ୍ରକ୍ରିୟା ଶେଷ ହୋଇଛି । ପୋଲିସ ମୃତଦେହକୁ ପରିବାର ଲୋକଙ୍କୁ ହସ୍ତାନ୍ତର କରିବା ପରେ ଗ୍ରାମରେ ଶୋକାକୁଳ ପରିବେଶ ମଧ୍ୟରେ ଶେଷକୃତ୍ୟ ସମ୍ପନ୍ନ ହୋଇଛି।
