ନୟାଗଡ଼ ଅଫିସ,୧୮ା୧୦: ନୟାଗଡ଼ ସହର ବିଜୁ ମାର୍କେଟର ଦୋକାନ ଘରେ ଗୋଦାମ ସଂଖ୍ୟା ବଢ଼ିବା ପରେ ଖୁଚୁରା ବ୍ୟବସାୟୀ ଚିନ୍ତାରେ ଅଛନ୍ତି। ସେମାନଙ୍କ ବ୍ୟବସାୟ ଦିନକୁ ଦିନ କମିବାରେ ଲାଗିଛି। ପୁଣି ବଜାରରେ ପାର୍କିଂ ବ୍ୟବସ୍ଥା, ଦୋକାନୀ ଓ ଗ୍ରାହକଙ୍କ ପାଇଁ ଶୌଚାଳୟ, ପରିସ୍ରାଗାର ପରି ସର୍ବନିମ୍ନ ସୁବିଧା ଉପଲବ୍ଧ ନାହିଁ। ଗୋଦାମ ହଟାଇବା ଓ ସର୍ବନିମ୍ନ ସୁବିଧା ଯୋଗାଇବା ନେଇ ସେମାନେ ବିଭିନ୍ନ ସମୟରେ ପୌର ନିର୍ବାହୀ ଅଧିକାରୀ ଓ ଜିଲାପାଳଙ୍କୁ ଅବଗତ କରାଇଥିଲେ ମଧ୍ୟ ସୁଫଳ ପାଇନାହାନ୍ତି। ଏବେ ପୁଣି ଥରେ କେତେଜଣ ବ୍ୟବସାୟୀ ଜିଲାପାଳ ଓ ନିର୍ବାହୀ ଅଧିକାରୀଙ୍କୁ ଭେଟି ବଜାରର ସମସ୍ୟା ଅବଗତ କରିବାକୁ ନିଷ୍ପତ୍ତି ନେଇଛନ୍ତି।
ସୂଚନା ଅନୁସାରେ ଉଠାଦୋକାନୀଙ୍କ ସଂଖ୍ୟା ହ୍ରାସ, ବେକାରଙ୍କୁ କର୍ମନିଯୁକ୍ତି ଦେବା ଓ ଟ୍ରାଫିକ ସମସ୍ୟା ଏଡାଇବା ପାଇଁ ପ୍ରାୟ ୨୦ବର୍ଷ ତଳେ ନୟାଗଡ଼ ଏନ୍ଏସି ପକ୍ଷରୁ ବିଜୁ ମାର୍କେଟ କରାଯାଇ ୧୦୦ରୁ ଊର୍ଦ୍ଧ୍ୱ ଦୋକାନ ଘର ଲିଜ୍ ସୂତ୍ରରେ ଦିଆଯାଇଥିଲା। ଏ ବାବଦରେ ପ୍ରତି ମାସରେ ଏନ୍ଏସି ଭଡ଼ା ଆଦାୟ କରୁଥିଲା। ତେବେ ଦୋକାନ ନିର୍ମାଣ ସମୟରେ ଶୌଚାଳୟ, ପରିସ୍ରାଗାର, ପାର୍କିଂ ବ୍ୟବସ୍ଥା କରାଯାଇ ନ ଥିଲା। ୨୦ବର୍ଷ ପରେ ବି ଏହି ସୁବିଧା କରାଯାଇ ନାହିଁ। ଏହି ବଜାରରେ ଗୋଦାମ ଘର ଅଧିକ ଓ ଦୋକାନ ସଂଖ୍ୟା କମିଚାଲିଛି। ମାଲିକମାନେ ଗୋଦାମରୁ ଅଧିକ ଭଡ଼ା ପାଉଥିବାରୁ ଦୋକାନ ପାଇଁ ଭଡ଼ା ନ ଦେଇ ଗୋଦାମକୁ ଭଡ଼ା ଦେଉଛନ୍ତି। ଏହା ଦ୍ୱାରା ଲିଜ୍ ନେଇଥିବା ମାଲିକମାନେ ଲାଭରେ ରହୁଥିବାବେଳେ ହାତଗଣତି ଯେଉଁ ଦୋକାନୀ ଅଛନ୍ତି ସେମାନଙ୍କ ବ୍ୟବସାୟ କମିବାରେ ଲାଗିଛି। ଗୋଦାମ ହେବାରୁ ବଜାର ରାସ୍ତାରେ ଯାନବାହନ ରହି ସବୁବେଳେ ଜାମ୍ ରହୁଛି। ଫଳରେ ଗ୍ରାହକମାନେ ବଜାର ଭିତରକୁ ଆସିବାରେ ହଇରାଣ ହେଉଛନ୍ତି। ପୁଣି ବର୍ଷା ହେଲେ ବଜାର ପରିସର କର୍ଦ୍ଦମାକ୍ତ ହୋଇପଡୁଛି। ସେହିପର ସିମେଣ୍ଟ ପ୍ଲାଷ୍ଟର ଖସିବା ଦ୍ୱାରା ଦୋକାନ ଘରଗୁଡିକ ଅସୁରକ୍ଷିତ ହୋଇ ପଡିଲାଣି। ଇତିମଧ୍ୟରେ ନୟାଗଡ଼ ଏନ୍ଏସି ମ୍ୟୁନିସିପାଲିଟି ହୋଇସାରିଲାଣି। ତେବେ ବିଜୁ ମାର୍କେଟର ପରିବର୍ତ୍ତନ ହେଲା ନାହିଁ। ଜଣେ ଦୋକାନୀ ନିଜ ନଁା ଗୋପନ ରଖି କହିଛନ୍ତି, ୧୦୫ଟି ଘରକୁ ଦୋକାନ ପାଇଁ ଲିଜ୍ ଦିଆଯାଇଛି। ଏଥିରୁ ୧୫ ପ୍ରତିଶତ ବ୍ୟକ୍ତି ନିଜେ ମାଲିକ ହୋଇ ଦୋକାନ କରିଛନ୍ତି। ଆଉ ୩୫ ପ୍ରତିଶତ ଲୋକ ଦୋକାନକୁ ଭଡ଼ା ଦେଇଛନ୍ତି। ବଳକା ୫୦ ପ୍ରତିଶତ ଘର ଗୋଦାମ ହୋଇଛି। ଗୋଦାମ କଲେ ଦେଢ଼ ହଜାରରୁ ସାଢ଼େ ୩ ହଜାର ଟଙ୍କା ଭଡ଼ା ମିଳୁଛି। କିନ୍ତୁ ଦୋକାନ ହେଲେ ୧ ହଜାରରୁ ଅଢ଼େଇ ହଜାର ଟଙ୍କା ଭଡ଼ା ମିଳେ। ଟଙ୍କା ଅଧିକ ମିଳୁଥିବାରୁ ଦୋକାନ ମାଲିକ ଗୋଦାମ ପାଇଁ ଘର ଦେବାକୁ ଆଗ୍ରହ ପ୍ରକାଶ କରୁଛନ୍ତି। ଏ ସମ୍ପର୍କରେ ମ୍ୟୁନିସିପାଲିଟି ନିର୍ବାହୀ ଅଧିକାରୀ ସନ୍ତୋଷ କୁମାର ଜେନା କୁହନ୍ତି, ଦୋକାନ ପାଇଁ ଲିଜ୍ ନେଇଛନ୍ତି। ଯଦି ଗୋଦାମ ହେଉଛି ତେବେ ଅନୁଧ୍ୟାନ କରି ପଦକ୍ଷେପ ନିଆଯିବ।
