ରାୟଗଡା,୧୯।୧(ଆଶିଷ ରଞ୍ଜନ ପଣ୍ଡା): ରାୟଗଡା ରେଳ ଡିଭିଜନ କାର୍ଯ୍ୟକ୍ଷମ ହୋଇଥିଲେ ହେଁ ଟ୍ରେନ ଯାତାୟାତ ସିଗନାଲ ବ୍ୟବସ୍ଥା ସମେତ ଅନ୍ୟାନ୍ୟ ଟେକ୍ନିକାଲ ବ୍ୟବସ୍ଥାର କଣ୍ଟ୍ରୋଲ ବର୍ତ୍ତମାନ ମଧ୍ୟ ୱାଲଟିୟର ରେଳ ଡିଭିଜନ ଅଧୀନରେ ରହିଛି । ତେଣୁ ରାୟଗଡା ଡିଆରଏମଙ୍କ ଅଧୀନରେ ବର୍ତ୍ତମାନ ଏହି ସବୁ ନିୟନ୍ତ୍ରଣ ପାଇଁ ୪ଟି କଣ୍ଟ୍ରୋଲ ବୋର୍ଡ ପାଇଁ ଇଷ୍ଟକୋଷ୍ଟ ରେଲୱେରୁ ଅନୁମତି ମିଳିଛି । ଏନେଇ ଗଣମାଧ୍ୟମକୁ ସୂଚନା ଦେଇଛନ୍ତି କୋରାପୁଟ ଏମ୍ପି ସପ୍ତଗିରି ଶଙ୍କର ଉଲାକା । ଏମପି ଉଲାକା ଏନେଇ ପୂର୍ବରୁ ବାରମ୍ବାର ଲୋକ ସଭା ଓ ରେଲୱେ କର୍ତ୍ତୃପକ୍ଷଙ୍କ ନିକଟରେ ଦାବି କରିଥିଲେ । କୋତାଭାଲସା-କୋରାପୁଟ, କୋରାପୁଟ-କିରାଣ୍ଡୁଲ ପାଇଁ ଦୁଇଟି ସ୍ବତନ୍ତ୍ର କଣ୍ଟ୍ରୋଲ ବୋର୍ଡ ବସିବ । ସେହିଭଳି ରାୟଗଡା ଏବଂ କୁନେରୁ-ରାୟଗଡା ପାଇଁ ସ୍ବତନ୍ତ୍ର ଗୋଟିଏ ଲେଖାଏ କଣ୍ଟ୍ରୋଲ ବୋର୍ଡ କାର୍ଯ୍ୟକ୍ଷମ କରାଯିବ। ଏତଦ୍ବ୍ୟତିତ ପାରଳାଖେମୁଣ୍ଡି-ଗୁଣପୁର ରେଳପଥ ପାଇଁ ମଧ୍ୟ ସ୍ବତନ୍ତ୍ର କଣ୍ଟ୍ରୋଲ ବୋର୍ଡ ବସିବା ନେଇ ରାୟଗଡା ରେଳ ଡିଭିଜନ ଡିଆରଏମ ଅମିତାଭ ସିଂଘଲ ସୂଚନା ଦେଇଛନ୍ତି।
