କୋରାପୁଟ,୭।୫(ଅମିତାଭ ବେହେରା): କାଳବୈଶାଖୀ ପ୍ରଭାବରେ ପାଗରେ ବଡ଼ ପରିବର୍ତ୍ତନ ଘଟିଛି। ମଙ୍ଗଳବାର କୋରାପୁଟ ଜିଲାରେ ୨୧୬.୫ ମିମି ବର୍ଷା ହୋଇଥିବା ରେକର୍ଡ କରାଯାଇଛି। ଜିଲାର ସେମିଳିଗୁଡା ବ୍ଲକରେ ସର୍ବାଧିକ ୪୨ମି.ମି ବର୍ଷା ହୋଇଛି। ଏପରି କି ଦଶମନ୍ତପୁର ବ୍ଳକରେ ସର୍ବନିମ୍ନ ୨ମିମି ବର୍ଷା ହୋଇଥିବା ଜିଲା ଜରୁରୀ ବିଭାଗ ପକ୍ଷରୁ ସୂଚନା ମିଳିଛି।
ସେହିପରି ଜିଲାର ବୈପାରିଗୁଡ଼ା ବ୍ଲକରେ ୧୧ମିମି, କୋରାପୁଟ ବ୍ଲକରେ ୨୮.୬ମିମି , ଲମତାପୁଟ ବ୍ଲକରେ ୧୭ ମିମି ବର୍ଷା ହୋଇଥିବା ବେଳେ ଜୟପୁର ବ୍ଲକରେ ୨୮.୬ମିମି ବର୍ଷା, କୋଟପାଡ ବ୍ଳକରେ ୧୬ମିମି, ପଟ୍ଟାଙ୍ଗି ବ୍ଲକରେ ୧୯.୨ମିମି, ନନ୍ଦପୁର ବ୍ଳକରେ ୭ମିମି, କୁନ୍ଦ୍ରା ବ୍ଳକରେ ୨୭ମିମି, ଲକ୍ଷ୍ମୀପୁର ବ୍ଲକରେ ୫.୩ ମିମି, ବନ୍ଧୁଗାଁ ବ୍ଳକରେ ୬ ମିମି ଓ ବୋରିଗୁମ୍ମା ବ୍ଲକରେ ୪.୨ ମିମି ବର୍ଷା ହୋଇଛି।
କୋରାପୁଟରେ ମଙ୍ଗଳବାର ଭୋର ୪ଟାରୁ ପ୍ରବଳ ଝଡ ତୋଫାନ ସହ ବର୍ଷା ହୋଇଥିଲା। ଫଳରେ ଜିଲାର ସେମିଳିଗୁଡା, ଜୟପୁର, କୋରାପୁଟ, କୁନ୍ଦ୍ରା ଆଦି ବିଭିନ୍ନ ବ୍ଲକ ଅଞ୍ଚଳରେ ଲାଗିଥିବା ବିଜ୍ଞାପନ ବୋର୍ଡଗୁଡିକ ଉଡି ଭାଙ୍ଗି ଯାଇଥିଲା। ଏପରିକି ପ୍ରବଳ ବର୍ଷା ଯୋଗୁ କୋରାପୁଟ ସହରର ସମେତ ବିଭିନ୍ନ ସ୍ଥାନରେ ଜଳାବର୍ଣ୍ଣ ହୋଇଯାଇଛି।
ଅନ୍ୟପକ୍ଷେ କିଛି ଦିନ ଧରି ଜାରି ରହିଥିବା ପ୍ରବଳ ଗ୍ରୀଷ୍ମ ପ୍ରବାହରୁ ଜନସାଧାରଣଙ୍କୁ ଟିକିଏ ଆଶ୍ୱସ୍ତି ମିଳିଛି। ଏପରିକି ବର୍ଷା ପବନ ଯୋଗୁ ବିଭିନ୍ନ ସ୍ଥାନରେ ଗଛ ଭାଙ୍ଗି ବିଦ୍ୟୁତ୍ ତାର ଛିଣ୍ଡି ପଡିଥିବା ଜଣାପଡିଛି। ଫଳରେ ଭୋର ୪ଟାରୁ ଅପରାହ୍ନ ୧ଟା ପର୍ଯ୍ୟନ୍ତ ବିଦ୍ୟୁତ୍ ସେବା ବ୍ୟାହତ ହୋଇଥିଲା। ବିଭାଗୀୟ କର୍ମଚାରୀଙ୍କ ମରାମତି ପରେ ବିଦ୍ୟୁତ୍ ସେବା ସ୍ବାଭାବିକ ହୋଇଥିବା ସୂଚନା ମିଳିଛି।
