ଭୁବନେଶ୍ୱର,୪।୧୦(ବ୍ୟୁରୋ): ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ ପ୍ରଭାବରେ ରାଜ୍ୟର ଅଧିକାଂଶ ସ୍ଥାନରେ ବର୍ଷା ହେଉଛି। ହେଲେ ଶନିବାର ରାଜଧାନୀ ଭୁବନେଶ୍ୱରରେ ଅପରାହ୍ନ ୧ଟାଠାରୁ ୪ଟା ପର୍ଯ୍ୟନ୍ତ ଘଡ଼ଘଡି ସହ ପ୍ରବଳ ବର୍ଷା ହୋଇଥିଲା। ଏହି ୩ ଘଣ୍ଟାର ବର୍ଷାରେ ଭୁବନେଶ୍ୱରବାସୀ ଅସ୍ତବ୍ୟସ୍ତ ହୋଇପଡ଼ିବା ସହ ବହୁ ଅଞ୍ଚଳ ଜଳାର୍ଣ୍ଣବ ହୋଇଯାଇଥିଲା। ଫଳରେ ଅଞ୍ଚଳଗୁଡ଼ିକରେ ଜଳବନ୍ଦୀ ସମସ୍ୟା ନଜରକୁ ଆସିଛି। ଏ ନେଇ ପାଣିପାଗ ବିଭାଗ ପୂର୍ବରୁ ଶନିବାର ଓ ରବିବାର ପ୍ରବଳ ବର୍ଷା ହେବାର ସୂଚନା ଦେଇଥିଲେ ହେଁ ଭୁବନେଶ୍ୱର ମହାନଗର ନିଗମ (ବିଏମ୍ସି) ପକ୍ଷରୁ କୌଣସି ପ୍ରାକ୍ ପ୍ରସ୍ତୁତି ଥିବା ନଜରକୁ ଆସିନାହିଁ। ଯେଉଁଥିପାଇଁ ଲୋକେ ନାନା ଅସୁବିଧାର ସମ୍ମୁଖୀନ ହୋଇଥିବା ଅଭିଯୋଗ କରିଛନ୍ତି। ଅନ୍ୟପଟେ ଡ୍ରେନ୍ ନିର୍ମାଣ କାର୍ଯ୍ୟ ମନ୍ଥର ଗତିରେ ଚାଲୁଥିବାରୁ ଲୋକେ ଜଳବନ୍ଦୀ ସମସ୍ୟାରୁ ମୁକୁଳି ପାରୁନାହାନ୍ତି। ମୌସୁମୀ ସମୟରେ ବିଏମ୍ସି ପ୍ରାୟ ସ୍ଥାନରେ ଡ୍ରେନେଜ୍ ନିର୍ମାଣ କାର୍ଯ୍ୟ ଆରମ୍ଭ କରିଦେଇଛି। କିନ୍ତୁ ଏବେ ହଠାତ୍ ଲଘୁଚାପ ଭୁବନେଶ୍ୱର ପାଇଁ କାଳ ସାଜିଛି। ତେବେ ସହରରେ ଜଳବନ୍ଦୀ ମୁକାବିଲା କରିବା ପାଇଁ ବିଏମ୍ସିର ୭ଟି ପମ୍ପସେଟ୍ ରହିଛି। ଏଥିସହ ଶନିବାର ବିଏମ୍ସି ୧୦ରୁ ୧୫ଟି ପମ୍ପସେଟ୍ ଭଡ଼ାରେ ଆଣିଥିବା ଜଣାପଡ଼ିଛି। ହେଲେ କେତେଦିନ ବିଏମ୍ସି ଏଭଳି ପମ୍ପସେଟ୍ ଭରସାରେ ଜଳବନ୍ଦୀର ମୁକାବିଲା କରୁଥିବ ସେନେଇ ଏବେ ବଡ଼ ପ୍ରଶ୍ନବାଚୀ ସୃଷ୍ଟି ହୋଇଛି। ଏ ନେଇ ବିଏମ୍ସିର ଡ୍ରେନେଜ୍ ବିଭାଗୀୟ ଅଧିକାରୀ ସମ୍ପୂର୍ଣ୍ଣ ଭାବେ ଅବଗତ ଥିବାବେଳେ ଚେଇଁ ଶୋଇଥିବା ଅନୁଭବ ହେଉଛି। ଏଥିସହ ରବିବାର ପୁଣି ବର୍ଷା ସମ୍ଭାବନା ଥିବାରୁ ବିଏମ୍ସି ଚିନ୍ତା ଦ୍ୱିଗୁଣିତ ହୋଇଥିବା କର୍ତ୍ତୃପକ୍ଷଙ୍କ ମଧ୍ୟରେ ଚର୍ଚ୍ଚା ହେଉଛି।
