ନୂଆଦିଲ୍ଲୀ,୧୦ ।୯: ଆଗାମୀ ୨୦୧୪ ଲୋକ ସଭା ନିର୍ବାଚନକୁ ଦୃଷ୍ଟିରେ ରଖି କଂଗ୍ରେସ ତା’ର ଭାରତ ଯୋଡୋ ଯାତ୍ରା ଆରମ୍ଭ କରି ଦେଇଛି । ଏହା କନ୍ୟାକୁମାରୀରୁ ଆରମ୍ଭ ହୋଇ ପ୍ରାୟ ୧୫୦ ଦିନ ପରେ କଶ୍ମୀରରେ ଶେଷ ହେବ । ଏହି ଯାତ୍ରାକୁ ନେଇ କଂଗ୍ରେସ ଖୁବ ଆଶାବାଦୀ ରହିଛି । ଯାତ୍ରା ଆରମ୍ଭ ହେବାର ୩ ଦିନ ମଧ୍ୟରେ ବିବାଦ ଗୋଟିଏ ପରେ ଗୋଟିଏ ସାମ୍ନାକୁ ଆସିବାରେ ଲାଗିଛି ।
କଂଗ୍ରେସ ଏହି ଯାତ୍ରାରେ ୬୦ କଣ୍ଟେନର(ଭାରତ ଯୋଡୋ ଯାତ୍ରା କଣ୍ଟେନର)କୁ ବିଶେଷ ଭାବେ ରହିବାକୁ ପ୍ରସ୍ତୁତ କରିଛି । ଏହି କଣ୍ଟେନରରେ କଂଗ୍ରେସର ଲୋକେ ରାତି କଟାଇବେ । ଏଥିମଧ୍ୟରୁ ଗୋଟିଏ କଣ୍ଟେନରରେ କଂଗ୍ରେସର ପୂର୍ବତନ ଅଧ୍ୟକ୍ଷ ରହିବାର ବ୍ୟବସ୍ଥା କରାଯାଇଛି । ଏବେ ଏହି କଣ୍ଟେନରରେ ଦିଆଯାଇଥିବା ସୁଯୋଗକୁ ନେଇ ଭାଜପା କଂଗ୍ରେସ ଉପରେ ଅଭିଯୋଗ ଆଣିଛି । ଭାଜପା କହିଛି ରାଲିରେ ସାମିଲ ହୋଇଥିବା ନେତା ଆରାମ କରିବା ଲାଗି ଏହି କଣ୍ଟେନରରେ ଅତ୍ୟାଧୁନିକ ସୁବିଧା ବ୍ୟବସ୍ଥା କରାଯାଇଛି । ସଫେଇ ଦେବାକୁ ଯାଇ କଂଗ୍ରେସ କହିଛି, ଭାରତ ଯୋଡୋ ଯାତ୍ରା ପାଇଁ ଯେଉଁ କଣ୍ଟେନର ବ୍ୟବସ୍ଥା କରାଯାଇଛି ସେଥିରେ ସେମିତି କୌଣସି ସବୁିଧା ନାହିଁ । ବରଂ ରାତ୍ରୀ ଯାପନ ପାଇଁ ଏହା ତିଆରି କରାଯାଇଛି ।
ଭାରତ ଯୋଡୋ ଯାତ୍ରା ଯେତିକ ଯେତିକି ଆଗକୁ ବଢୁଛି କଂଗ୍ରେସ ପାଇଁ ବି ଚ୍ୟାଲେଞ୍ଜ ବଢି ବଢି ଚାଲିଛି । ପ୍ରତି ମୁହୂର୍ତ୍ତରେ ଭାଜପା କଂଗ୍ରେସକୁ ଟାର୍ଗେଟ କରି ଚାଲିଛି । କଣ୍ଟେନର ବିବାଦ ଶେଷ ନ ହେଉଣୁ ଭାଜପା ରାହୁଲ ଗାନ୍ଧୀଙ୍କର ଏକ ଫଟୋ ଶେୟାର କରି କଂଗ୍ରେସକୁ ପୁଣି ଟାର୍ଗେଟ କରିଥିଲା । ଭାଜପା ରାହୁଲଙ୍କ ଟି-ଶର୍ଟର ବ୍ରାଣ୍ଡ ଓ ଦାମକୁ ନେଇ ଅଭିଯୋଗ କରିଥିଲା କି ଏହାର ଦାମ ୪୧,୨୫୭ ଟଙ୍କା ।
