ଭଞ୍ଜନଗର,୨୬।୪(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଠାକୁରାଣୀ ଯାତ୍ରା ରବିବାର ଆରମ୍ଭ ହୋଇଯାଇଛି। ଯାତ୍ରାକୁ ଦେଖିବା ପାଇଁ ହଜାର ହଜାର ଲୋକଙ୍କ ସମାଗମ ହୋଇଥିଲା। ଆତସବାଜି ଏବଂ ପାରମ୍ପରିକ ନୃତ୍ୟରେ ପ୍ରକମ୍ପିତ ହୋଇପଡ଼ିଥିଲା ସହର। ଆଇନ ଶୃଙ୍ଖଳାକୁ ଦୃଷ୍ଟିରେ ରଖି ପୋଲିସ ଏବଂ ସ୍ୱେଚ୍ଛାସେବୀ ନିୟୋଜିତ ହୋଇଥିଲେ।
ସୂଚନା ଯୋଗ୍ୟ, ପ୍ରତି ୩ ବର୍ଷକୁ ଥରେ ଭଞ୍ଜନଗର ଯାତ୍ରା ହୋଇଥାଏ। ରବିବାର ସକାଳେ କୁଲାଡ ବ୍ୟଘ୍ରଦେବିଙ୍କୁ ଯାତ୍ରା କମିଟି ପକ୍ଷରୁ ଆବାହନ କରାଯାଇଥିଲା । ପୂଜାର୍ଚ୍ଚନା ପରେ ଦେବୀଙ୍କୁ କୁଲାଡ ଗ୍ରାମ ପରିକ୍ରମା କରାଯାଇଥିଲା। ପରେ ଉପର ବାଗଦେବୀ ମନ୍ଦିରରୁ ଶୁସଜ୍ଜିତ ହୋଇଥିବା ଶଗଡ଼ରେ ଦେବୀଙ୍କୁ ବସାଇ ଭଞ୍ଜନଗର କୟାଁ ବାଗଦେବୀ ପର୍ଯ୍ୟନ୍ତ ଏକ ବିରାଟ ଶୋଭାଯାତ୍ରାରେ ଅଣାଯାଇଥିଲା। ବାଟରେ ହଜାର ହଜାର ଶ୍ରଦ୍ଧାଳୁ ଦେବୀଙ୍କୁ ପୂଜାର୍ଚ୍ଚନା କରିଥିଲେ। ରାତି ୭ ଟାରେ ଦେବୀ କୟାଁ ବାଗଦେବୀ ମନ୍ଦିରଠାରେ ପହଞ୍ଚି ବିଶ୍ରାମ ନେଇଥିଲେ।
ମନ୍ଦିରରେ ଦେବୀଙ୍କୁ ପୂଜାର୍ଚ୍ଚନା କରାଯିବା ପରେ ଦେବୀ ଅସ୍ଥାୟୀ ମଣ୍ଡପ ଅଭିମୁଖେ ବାହାରିଥିଲେ। ଉପ ଜିଲାପାଳ ଉମା ଶଙ୍କର ବେହେରା ଦେବୀଙ୍କ ପ୍ରତିମାକୁ ଧରି ଚାଲି ଚାଲି ଏକ ବିରାଟ ଶୋଭାଯାତ୍ରାରେ ଅସ୍ଥାୟୀ ମଣ୍ଡପ ଅଭିମୁଖେ ବାହାରିଥିଲେ।ବିଳମ୍ୱିତ ରାତିରେ ଦେବୀ ଅସ୍ଥାୟୀ ମଣ୍ଡପରେ ପହଞ୍ଚି ବିଶ୍ରାମ ନେବେ। ପରେ ଠାକୁରାଣୀଙ୍କୁ ଆବାହନ କରି ଅଣାଯିବ। ଦେବୀଙ୍କ ଆଗମନ ସମୟରେ ଯାତ୍ରା କମିଟି ମୁଖ୍ୟ ଉପଦେଷ୍ଟା ତଥା ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକ, ଗଞ୍ଜାମ ଜିଲା ସ୍ୱତନ୍ତ୍ର ଉନ୍ନୟନ ପରିଷଦ ଅଧ୍ୟକ୍ଷ ନୀଳମାଧବ ପାତ୍ର, ଯାତ୍ରା କମିଟି ସଭାପତି ରାଜେନ୍ଦ୍ର ବିଷୋୟୀ, କାର୍ଯ୍ୟକାରୀ ସଭାପତି ବିଷ୍ଟୁ ପ୍ରସାଦ ପ୍ରଧାନ, ଏସ୍ଡିପିଓ ଡ.ଦୀପକ କୁମାର ମିଶ୍ର, ଥାନା ଅଧିକାରୀ ଜୀବନାନନ୍ଦ ଜେନା, ସମ୍ପାଦକ ସୁଧିର ରଞ୍ଜନ ବେହେରା, ସୁଶାନ୍ତ ମହାପାତ୍ର, ଅବସରପ୍ରାପ୍ତ ତହସିଲଦାର ପ୍ରମୋଦ ଦଳବେହେରା, ଉପସଭାପତି ବିନୟ କୁମାର ରଥ, ମୁରଲୀ ପଣ୍ଡା ପ୍ରମୁଖ ଉପସ୍ଥିତ ରହି ଯାତ୍ରାକୁ ସଫଳ କରିବାରେ ସହଯୋଗ କରୁଛନ୍ତି।
ଏପରିକି ମଙ୍ଗଳବାର ଦେବୀଙ୍କ ନଗର ପରିକ୍ରମା କାର୍ଯ୍ୟକ୍ରମ ରହିଛି। ଦେବୀ ପ୍ରଥମ ଦିନ ପୁରୁଣା ବଜାର ସାହି ଦେଶୀ ବେହେରାଙ୍କ ବାସଭବନ ଅଭିମୁଖେ ଯିବେ। ଯାତ୍ରା ମେ ମାସ ୨୦ ତାରିଖ ପର୍ଯ୍ୟନ୍ତ ଚାଲିବ। ଦୈନନ୍ଦିନ ସାଂସ୍କୃତିକ କାର୍ଯ୍ୟକ୍ରମ ହେବ। ଯାତ୍ରାର ବିଭିନ୍ନ ଦିବସରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ସମେତ ରାଜ୍ୟର ଜଣାଶୁଣା ନେତା, ଅଧିକାରୀ ଯୋଗଦେଇ ଦେବୀଙ୍କ ଦର୍ଶନ କରିବା କାର୍ଯ୍ୟକ୍ରମ ରହିଛି। ପୂର୍ୱ ବର୍ଷ ଅପେକ୍ଷା ଚଳିତ ବର୍ଷ ଯାତ୍ରା ଅଧିକ ଆକର୍ଷଣୀୟ ହୋଇଛି।
