ରସୁଲପୁର,୨୪ା୩(ଡି.ଏନ.ଏ.): ରସୁଲପୁର ବ୍ଲକ କଲଣ ପଞ୍ଚାୟତସ୍ଥିତ ମଧୁପୁର ସରକାରୀ ରୂପାନ୍ତରଣ ଉଚ୍ଚ ବିଦ୍ୟାଳୟ ପରିଚାଳନା କମିଟି ଗଠନରେ ଅନିୟମିତତା ଘଟଣା ଏବେ ପୁଣି ଚର୍ଚ୍ଚାରେ। ବିଦ୍ୟାଳୟ ପକ୍ଷରୁ କମିଟି ଗଠନରେ ଅନିୟମିତତା ହୋଇଥିବା ଅଭିଭାବକ ବ୍ଲକ ଶିକ୍ଷା ଅଧିକାରୀ(ବିଇଓ) ସୁଦର୍ଶନ ମଲିକଙ୍କ ନିକଟରେ ଅଭିଯୋଗ କରିଥିଲେ ମଧ୍ୟ ଅଭିଯୋଗକୁ ବିଇଓ ଗୁରୁତ୍ୱ ନଦେଇ ଉକ୍ତ କମିଟିକୁ ବୈଧ ଘୋଷଣା କରିଛନ୍ତି। ଏହାଜାଣି ଅଭିଭାବକ ପୁନର୍ବାର ବିଇଓଙ୍କୁ ଅଭିଯୋଗ କରି କମିଟିକୁ ଅଷିଦ୍ଧ ଘୋଷଣା କରିବାକୁ ଦାବି କରିଛନ୍ତି। ଏହା ନ ହେଲେ ସେମାନେ କୋର୍ଟଙ୍କ ଆଶ୍ରୟ ନେବେ ବୋଲି ଚେତାବନୀ ଦେଇଛନ୍ତି।
୧୦ ଜାନୁୟାରୀ ୨୦୨୩ରେ ବିଦ୍ୟାଳୟ ପରିଚାଳନା କମିଟି ଗଠନ ପାଇଁ ଅଭିଭାବକ ଓ ଶିକ୍ଷକଙ୍କ ମିଳିତ ବୈଠକ ହୋଇଥିଲା। ବିଦ୍ୟାଳୟରେ ପ୍ରଥମରୁ ଦଶମ ଶ୍ରେଣୀ ପର୍ଯ୍ୟନ୍ତ ଅଭିଭାବକଙ୍କ ସଂଖ୍ୟା ୪୬୭। ତେଣୁ ବିଧି ମୁତାବକ ବିଦ୍ୟାଳୟ ପରିଚାଳାନା କମିଟି ଗଠନ ପାଇଁ କୋରମକୁ ହିସାବକୁ ନେଲେ ୧୮୯ ଅଭିଭାବକଙ୍କ ଉପସ୍ଥିତ ଆବଶ୍ୟକତା ରହିଛି। ସେହି ଦିଗକୁ ଦେଖିଲେ ମୋଟ୍ ଅଭିଭାବକ ସଂଖ୍ୟାର ୪୦ଶତକଡ଼ା ଉପସ୍ଥାନ ରହିବା ଉଚିତ। ବିଦ୍ୟାଳୟ କର୍ତ୍ତୃପକ୍ଷଙ୍କ ଆହ୍ବାନକ୍ରମେ ବୈଠକରେ ୧୫୫ ସଭ୍ୟାସଭ୍ୟ ଉପସ୍ଥିତ ଥିଲେ, ଯାହାକି ଆବଶ୍ୟକ ଅଭିଭାବକଙ୍କଠାରୁ ୩୪ଜଣ କମ୍। ଉପସ୍ଥିତ ଅଭିଭାବକଙ୍କ ମଧ୍ୟରେ ଏକାଧିକ ଅଣଅଭିଭାବକ ସାମିଲ ଥିଲେ। ଜଣେ ଲେଖାଏ ଅଭିଭାବକ ଏକାଧିକ ସ୍ଥାନରେ ଦସ୍ତଖତ କରିଥିଲେ। କେତେଜଣ ଅଭିଭାବକ ବୈଠକରେ ନ ଥାଇ ବି ସେମାନଙ୍କ ଦସ୍ତଖତକୁ ଜାଲ୍ କରି ଦିଆଯାଇଥିଲା। ବୈଠକରେ ମାତା ଓ ପିତା ଉପସ୍ଥିତ ଥିଲେ ସେମାନଙ୍କୁ ଜଣେ ସଭ୍ୟରେ ଗଣାଯିବ। ଏ ଦିଗରେ ମହିଳାଙ୍କୁ ଅଗ୍ରାଧିକାର ଦିଆଯିବ। ହେଲେ ଏଥିରେ ବ୍ୟତିକ୍ରମ ଘଟି ଉଭୟ ମା,ବାପାଙ୍କୁ କମିଟି ସଦସ୍ୟ ଗ୍ରହଣ କରାଯାଇଛି। ଏ ପରିକି ପରିଚାଳନା କମିଟି ଗଠନ ପାଇଁ ଚୟନ ସଦସ୍ୟଙ୍କ ମଧ୍ୟରୁ କେତେଜଣ ଅଭିଭାବକ ନୁହନ୍ତି। ଖୋଦ୍ ସଭାପତି ପ୍ରାର୍ଥୀଙ୍କ ସମର୍ଥକ ଭାବରେ ଦର୍ଶାଯାଇଥିବା ବ୍ୟକ୍ତି ଜଣକ ଅଭିଭାବକ ନୁହନ୍ତି। ବୈଠକ ଖାତାରେ ଅଭିଭାବକଙ୍କ ଦସ୍ତଖତ ତାଲିକାର କ୍ରମିକ ସଂଖ୍ୟା ୧୫୬ରୁ ୧୯୭ ପର୍ଯ୍ୟନ୍ତ ମିଥ୍ୟା ଦସ୍ତଖତ ବୋଲି ଅଭିଯୋଗରେ ଦର୍ଶାଯାଇଥିଲା। ଏଭଳି ଅନେକ ତ୍ରୁଟି ଥାଇ ବିଦ୍ୟାଳୟ ପକ୍ଷରୁ କମିଟି ଗଠନ କରାଯାଇ ଅନୁମୋଦନ ପାଇଁ ବିଇଓଙ୍କ କାର୍ଯ୍ୟାଳୟକୁ ପଠା ଯାଇଥିଲା। ଅଭିଯୋଗ ପରେ ବିଇଓ କମିଟିକୁ ଅନୁମୋଦନ ପ୍ରଦାନ କରି ନ ଥିଲେ। କମିଟି ପାଇଁ ଆସିଥିବା ଚିଠାକୁ ୨ମାସ ପର୍ଯ୍ୟନ୍ତ ସ୍ଥଗିତ ରଖିଥିଲେ। ହେଲେ ହଠାତ୍ କ’ଣ ଘଟିଲା ଯେ ସେ ରାତିଅଧିଆ କମିଟିକୁ ବୈଧ ଘୋଷଣା କରିଥିଲେ। ଏହାକୁ ନେଇ ଅଭିଭାବକଙ୍କ ମନରେ ସନ୍ଦେହଜାତ ହେଉଛି। ରାଜନୈତିକ ଚାପର ବଶବର୍ତ୍ତୀ ହୋଇ ଶିକ୍ଷାଧିକାରୀ ଏଭଳି କରିଛନ୍ତି ବୋଲି ଅଭିଭାବକ ଦେବବ୍ରତ ସାହୁ ଅଭିଯୋଗ କରିଛନ୍ତି।
ତେଣୁ ଉଚ୍ଚ ପଦସ୍ଥ ଅଧିକାରୀଙ୍କ ଦ୍ୱାରା ଏହାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଅଭିଭାବକଙ୍କ ପକ୍ଷରୁ ଦାବି କରାଯାଇଛି। ଏ ସମ୍ପର୍କରେ ବିଇଓ ମଲିକଙ୍କୁ ପଚାରିବାରୁ ସେ କହିଛନ୍ତି, ବିଦ୍ୟାର୍ଥୀଙ୍କ ସ୍ବାର୍ଥ ଦୃଷ୍ଟିରୁ ଯାହାକିଛି ପଦକ୍ଷେପ ନେଇଛନ୍ତି। କୋରମ ଅଭାବରୁ ବୈଠକ ହୋଇଛି ବୋଲି ଅଭିଯୋଗରେ ଦର୍ଶାଯାଇଛି। ସେ ଦିନ ବିଦ୍ୟାଳୟରେ ୧୯ ଶିକ୍ଷକ ଉପସ୍ଥିତ ଥିଲେ। ସେମାନଙ୍କ ଉପସ୍ଥାନକୁ ମିଶାଇଲେ କୋରମ ହୋଇଯାଉଛି। ଅଭିଯୋଗକାରୀଙ୍କ ମଧ୍ୟରୁ ଜଣେ ସଭାପତି ପଦ ପାଇଁ ଆଶାୟୀ ଥିଲେ। ତାହା ହୋଇ ନ ପାରିବାରୁ ସେ ଏଭଳି ଅଭିଯୋଗ କରୁଛନ୍ତି ବୋଲି ବିଇଓ ପ୍ରକାଶ କରିଛନ୍ତି।
