ଅମରପାଲି,୧୯।୯(ପୀତାମ୍ବର ସାହୁ): ସୁବର୍ଣ୍ଣପୁର ଜିଲାର ବୀରମହାରାଜପୁର ସ୍ଥିତ ସ୍ଥାନୀୟ କଲ୍ୟାଣ ମଣ୍ଡପଠାରେ ୨୦୨୪ -୨୦୨୫ ଆର୍ଥିକ ବର୍ଷର ମହାତ୍ମାଗାନ୍ଧୀ ନିଶ୍ଚିତ କର୍ମ ନିଯୁକ୍ତି ଯୋଜନା ଓ ଜାତୀୟ ଖାଦ୍ୟ ସୁରକ୍ଷା ଆଇନର ସାମାଜିକ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି । ବୀରମହାରାଜପୁର ବିଡିଓ ରାଜୀବ ହାଁସଦାଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉକ୍ତ ସମୀକ୍ଷା ବୈଠକରେ ଏଡିଏମ ରାଜେନ୍ଦ୍ର ମାଝୀ ମୁଖ୍ୟ ଅତିଥି ଭାବରେ ଯୋଗଦେଇ ଗ୍ରାମ ପଞ୍ଚାୟତ ଏବଂ ପଞ୍ଚାୟତ ସମିତି ଅଧୀନରେ ଚାଲିଥିବା ମନରେଗା ଯୋଜନା କାର୍ଯ୍ୟ ଓ ଜାତୀୟ ଖାଦ୍ୟ ସୁରକ୍ଷା ଆଇନ ର ସମୀକ୍ଷା କରିଥିଲେ । ଉକ୍ତ ବୈଠକରେ ଉଦ୍ୟାନ ବିଭାଗ, ବନବିଭାଗ, ଜଳଛାୟା ଓ ମୃତ୍ତିକା ସଂରକ୍ଷଣ ବିଭାଗର ଅଧିକାରୀମାନେ ବିବରଣୀ ଉପସ୍ଥାପନ କରିଥିଲେ। ମହାତ୍ମାଗାନ୍ଧୀ ନିଶ୍ଚିତ କର୍ମ ନିଯୁକ୍ତି ଯୋଜନା ଓ ଜାତୀୟ ଖାଦ୍ୟ ସୁରକ୍ଷା ଆଇନର ସାମାଜିକ ସମୀକ୍ଷା ସମୟରେ ଆଇନଜୀବୀ ଆଶ୍ରୟ ମହାନନ୍ଦ ବ୍ଲକରେ ବହୁ ଯୋଗ୍ୟ ହିତାଧିକାରୀ ରାଶନ ପାଉନଥିବା ଅଭିଯୋଗ କରିଥିଲେ । ସେହି ଯୋଗ୍ୟ ହିତାଧିକାରୀମାନଙ୍କୁ କାହିଁକି ଜାତୀୟ ଖାଦ୍ୟ ସୁରକ୍ଷା ଆଇନ ମାଧ୍ୟମରେ ରାଶନ ଦିଆଯାଉ ନାହିଁ ବୋଲି ପ୍ରଶ୍ନ କରିଥିଲେ। ଏହାସହିତ ମନରେଗା ଯୋଜନାରେ ବହୁତ ଅନିୟମିତତା ହେଉଥିବା ଅଭିଯୋଗ କରିଥିଲେ ମଧ୍ୟ ସମୀକ୍ଷା ବୈଠକରେ ସେନେଇ ଆଲୋଚନା କରାଯାଇନଥିବା ସେ ଅଭିଯୋଗ କରିଛନ୍ତି । ଏନେଇ ବିଡିଓ ରାଜୀବ ହାଁସଦାଙ୍କୁ ଲିଖିତ ଭାବରେ ସେ ଅଭିଯୋଗ ମଧ୍ୟ କରିଛନ୍ତି । ବ୍ଲକରେ ଶତାଧିକ ଯୋଗ୍ୟ ହିତାଧିକାରୀଙ୍କୁ ରାଶନ ମିଳୁ ନ ଥିବା ଅଭିଯୋଗ ହୋଇଛି । ଉକ୍ତ କାର୍ଯ୍ୟକ୍ରମରେ ଜିଲା ପରିଷଦ ମନରେଗା କାର୍ଯ୍ୟକାରୀ ଅଧିକାରୀ ହୃଷିକେଶ ମହାକୁର, ବୀରମହାରାଜପୁର ବ୍ଲକ ପବ୍ଲିକ ହିଅରିଙ୍ଗ କମିଟି ସଦସ୍ୟ କିଶୋର ହୋତା, ପ୍ରଭଞ୍ଜନ କର୍ମୀ ପ୍ରମୁଖ ମଞ୍ଚାସିନ ହୋଇ ପ୍ରତ୍ୟେକ ବିଭାଗର କାର୍ଯ୍ୟର ସମୀକ୍ଷା କରିଥିଲେ । ବ୍ଲକ ମନରେଗା ସଂଯୋଜକ ଚୈତନ୍ୟ ମଲ୍ଲିକ ବିଗତ ବୈଠକର ବିବରଣୀ ପଠନ କରିବା ସହିତ ଚଳିତ ବୈଠକର ଭିଆରବିମାନଙ୍କ କାର୍ଯ୍ୟ ତଦାରଖ ତଥ୍ୟ ଉପସ୍ଥାପନ କରିଥିଲେ। ବାଗବର, ହିଲୁଙ୍ଗ, ଉଫୁଲା, ଜଟେସିଂହା, ମୁର୍ଷୁଣ୍ଢୀ, କେନଝିରିଆପାଲି ଆଦି ଗ୍ରାମ ପଞ୍ଚାୟତର କିଛି କାର୍ଯ୍ୟର ଆବଶ୍ୟକ ତଥ୍ୟ ନଥିବାରୁ ସେମାନଙ୍କୁ ଜରିମାନା କରାଯାଇଛି। ଅନ୍ୟମାନଙ୍କ ମଧ୍ୟରେ ବୀରମହାରାଜପୁର ଏସସିଏଫ ଅବିନାଶ ବେରିହା,ଉଦ୍ୟାନ ବିଭାଗର ପ୍ରିୟଦର୍ଶିନୀ ଝାଙ୍କର, ପରମେଶ୍ୱର ବିଶି, ଭିଆରବି, ପିଇଓଏଡି ଡବ୍ଲୁଓଙ୍କ ସମେତ ହିତାଧିକାରୀମାନେ ଯୋଗ ଦେଇଥିଲେ । ଏପିଓ ଅମୃତାଂଶୁ ପାତ୍ର ସଭା ସଂଚାଳନ କରିବା ସହିତ ଧନ୍ୟବାଦ ଅର୍ପଣ କରିଥିଲେ ।
