ବୋହୂ ବେଶରେ ପ୍ରତିଟି ଝିଅ ଖୁବ୍ ସୁନ୍ଦର ଦିଶିବାକୁ ଚାହେଁ। ଆଉ ଏଥିପାଇଁ ବିବାହର ଅନେକ ଦିନ ପୂର୍ବରୁ ଭାବୀ ବୋହୂଟିଏ ବିଭିନ୍ନ ପ୍ରକାରର ସୌନ୍ଦର୍ଯ୍ୟ ଉପଚାର ମଧ୍ୟ କରିଥାଏ। ଯଦି ଆପଣଙ୍କର ବି ବିବାହ ସମୟ ପାଖେଇ ଆସୁଛି ତେବେ କେଉଁ ସବୁ ଉପାୟ ଆପଣେଇଲେ ସୁନ୍ଦର ଲାଗିବେ ଜାଣି ରଖନ୍ତୁ ଟିପ୍ସ …
ବିବାହ ପୂର୍ବରୁ ଅନେକ ଯୁବତୀ ଏଣେ ତେଣେ ମାର୍କେଟିଂ ଲାଗି ଯିବା, ବନ୍ଧୁ ବାନ୍ଧବଙ୍କ ଘରକୁ ଖାଇବାକୁ ଯିବା ଆଦିରେ ଥକିପଡ଼ନ୍ତି। କେବଳ ଏତିକି ନୁହେଁ, ଅଧିକ ରାତି ପର୍ଯ୍ୟନ୍ତ ଅନିଦ୍ରା ରହି ଫୋନ୍ରେ ଗପିଥାନ୍ତି। ଏସବୁର ପ୍ରଭାବ ସେମାନଙ୍କ ତ୍ୱଚା ଉପରେ ପଡ଼ିଥାଏ, ଫଳସ୍ବରୂପ ଯେତେ ମେକ୍ଅପ୍ ନେଲେ ବି ମୁହଁର ସୌନ୍ଦର୍ଯ୍ୟ କମ୍ ଲାଗିଥାଏ। ତେଣୁ ବିବାହର ଅନ୍ତତଃ ଏକ ସପ୍ତାହ ପୂର୍ବରୁ ଶରୀରକୁ ଆରାମ ଦିଅନ୍ତୁ ଏବଂ ରାତିରେ ପର୍ଯ୍ୟାପ୍ତ ନିଦ୍ରା ନିଅନ୍ତୁ। ପାଣି ପର୍ଯ୍ୟାପ୍ତ ପରିମାଣରେ ପିଅନ୍ତୁ। ଯୋଗ, ବ୍ୟାୟାମ ଆଦି ମଧ୍ୟ ଆପଣଙ୍କ ଲାଗି ବେଶ୍ ଲାଭଦାୟକ ହୋଇପାରିବ।
ସାବୁନ ଲଗାଇବା ଅଭ୍ୟାସ ଥିଲେ ବିବାହର କିଛି ଦିନ ପୂର୍ବରୁ ଏହା ବଦଳରେ ମାଇଲ୍ଡ ଫେସ୍ଓ୍ବାଶ୍ ଏବଂ ଲିକ୍ୱିଡ୍ ବଡିଓ୍ବାଶ୍ ବ୍ୟବହାର କରନ୍ତୁ।
ରାତିରେ ଶୋଇବା ପୂର୍ବରୁ ମୁହଁ ଧୁଅନ୍ତୁ ଏବଂ ଆଣ୍ଟି- ଅକ୍ସିଡାଣ୍ଟ, ଭିଟାମିନ୍ ଏ, ସି, ଏବଂ ବି୩ ଯୁକ୍ତ ମଶ୍ଚରାଇଜର ଲଗାନ୍ତୁ।
ଅଧିକ ସୁନ୍ଦର ଲାଗିବା ନିଶାରେ କୌଣସି କେମିକାଲ୍ଯୁକ୍ତ ବ୍ୟୁଟିପ୍ରଡକ୍ଟକୁ ନେଇ ଏକ୍ସପେରିମେଣ୍ଟ ନ କରି ପ୍ରାକୃତିକ ଘରୋଇ ସୌନ୍ଦର୍ଯ୍ୟ ଉପଚାର କରନ୍ତୁ।
ସୁନ୍ଦର ତ୍ୱଚା ପାଇଁ ସବୁଠୁ ଗୁରୁତ୍ୱପୂର୍ଣ୍ଣ ହେଉଛି ସନ୍ତୁଳିତ ଆହାର। କାରଣ ଆପଣ ମୁହଁରେ ଯାହା ବି ଲଗାନ୍ତୁ ନା କାହିଁକି ତେଲ ମସଲାଯୁକ୍ତ ଖାଦ୍ୟ ହେଉ ଅବା ଫାଷ୍ଟଫୁଡ଼, ଜଙ୍କଫୁଡ଼ ଆଦି ଖାଇବା ଦ୍ୱାରା ବ୍ରଣ ଦାଗ ଭଳି ସମସ୍ୟା ଦେଖାଦେବାର ଆଶଙ୍କା ରହିଛି। ତେଣୁ ବିବାହ ପୂର୍ବରୁ ଏସବୁ ଖାଦ୍ୟ ଯଥା ସମ୍ଭବ ନ ଖାଇବାକୁ ଚେଷ୍ଟା କରନ୍ତୁ।
ଯଦି ପୂର୍ବରୁ କେବେ ବ୍ୟୁଟିପାର୍ଲର ନ ଯାଇଥାନ୍ତି ତେବେ ବିବାହ ପୂର୍ବରୁ ହଠାତ୍ ଫେସିଆଲ୍ ଏବଂ ଅନ୍ୟାନ୍ୟ ଉପଚାର କରାନ୍ତୁ ନାହିଁ। କାରଣ କେତେକଙ୍କଠାରେ ଏସବୁର ପାର୍ଶ୍ୱପ୍ରତିକ୍ରିୟା ଦେଖାଦେବାର ନଜିର ରହିଛି। ତେଣୁ ଅନ୍ତତଃ ୨୦ ଦିନ ପୂର୍ବରୁ ଥରେ ଫେସିଆଲ୍ କରି ଦେଖନ୍ତୁ। ଯଦି ତ୍ୱଚା ସମ୍ବେଦନଶୀଳ ହୋଇଥାଏ କିମ୍ବା କୌଣସି ସମସ୍ୟା ଥାଏ ତେବେ ଏସବୁ କରିବା କିମ୍ବା ବ୍ରାଇଡାଲ୍ ମେକ୍ଅପ୍ ନେବା ପୂର୍ବରୁ ତ୍ୱଚା ବିଶେଷଜ୍ଞଙ୍କ ପରାମର୍ଶରେ କୌଣସି କ୍ରିମ୍ ବ୍ୟବହାର କରନ୍ତୁ।
