ଦାରିଙ୍ଗବାଡି, ୨୩।୯(ଅରୁଣ ସାହୁ):କନ୍ଧମାଳ ଜିଲା ଦାରିଙ୍ଗବାଡି ବ୍ଲକ କାର୍ଯ୍ୟାଳୟ ପରିସର ମଧ୍ୟରେ ଅନୁସୂଚିତ ଜନଜାତି ଯୁବତୀ ଏବଂ ଯୁବକ ମାନଙ୍କର ଦକ୍ଷତା ତଥା କ୍ଷମତାକୁ ବୃଦ୍ଧି ପାଇଁ ସରକାରଙ୍କ ଯୋଜନା ଆଦି କର୍ମଯୋଗୀ ଅଭିଯାନର ଏକ ୨ ଦିନିଆ କର୍ମଶାଳା ଉଦଘାଟିତ ହୋଇଯାଇଛି। ଏହି କାର୍ଯ୍ୟକର୍ମରେ ବିଡ଼ିଓ ପ୍ରୀତିରଞ୍ଜନ ରଥ ଅଧ୍ୟକ୍ଷତା କରିଥିବାବେଳେ ବ୍ଲକ ମଙ୍ଗଳ ସମ୍ପ୍ରସାରଣ ଅଧିକାରୀ ବିଶ୍ୱଜିତ ଜାଲି, ଜାଗୃତିର ଧ୍ରୁବଚରଣ ନାୟକ କାର୍ଯ୍ୟକ୍ରମ ପରିଚାଳନା କରିଥିଲେ। ଅନ୍ୟ ଅତିଥିଙ୍କ ମଧ୍ୟରେ ଅତିରିକ୍ତ ତହସିଲଦାର ଦୁଃଶାସନ ସ୍ବାଇଁ,, ଜାଗୃତି ଜାଗୃତି ସମ୍ପାଦକ କୈକାଶ ଚନ୍ଦ୍ର ଦଣ୍ଡପାଟ ପ୍ରମୁଖ ମଞ୍ଚାସିନ ରହି ଜନଜାତି ଯୁବତୀ ଯୁବକ ମାନଙ୍କର ସମାଜିକ ନେତୃତ୍ୱ, ଜୀବନ କୌଶଳ ଓ ବିଭିନ୍ନ କୌଶଳରେ ଦକ୍ଷତା ଅର୍ଜନ କରିବା ଆଦି କର୍ମଶାଳାର ମୁଖ୍ୟ ଲକ୍ଷ୍ୟବୋଲି କୁହାଯାଇଥିଲା। ବିଶେଷ କରି ଗ୍ରାମାଞ୍ଚଳକୁ ଉନ୍ନୟନ ଓ ଶକ୍ତିଶାଳୀ କରିବାକୁ ହେଲେ ଗ୍ରାମପଞ୍ଚାୟତରେ ଶକ୍ତିଶାଳୀ ଶାସନ ପ୍ରଶିକ୍ଷିତ ‘ଆଦି କର୍ମଯୋଗୀ’ ମାଧ୍ୟମରେ ଯୋଜନା ପ୍ରସ୍ତୁତି, କାର୍ଯ୍ୟାନୁଷ୍ଠାନ ଓ ନିରୀକ୍ଷଣରେ ସହଯୋଗ କରିବା ଜରୁରୀ ବୋଲି କୁହାଯାଇଥିଲା।
ସେହିପରି ଶିକ୍ଷା, ସ୍ବାସ୍ଥ୍ୟ, ଜୀବିକା, ସମାଜିକ ସୁରକ୍ଷା ଇତ୍ୟାଦି ସରକାରୀ ଯୋଜନା ବିଷୟରେ ଆଦିବାସୀ ଲୋକଙ୍କୁ ସଚେତନ ବା ଜନଜାଗରଣ କରିବା ଦିଗରେ ଗୁରୁତ୍ୱ ଦିଆଯାଇଥିଲା। ନିଜର ପରମ୍ପରା, ଐତିହ୍ୟ ଓ ଜ୍ଞାନ ପ୍ରତି ଗର୍ବ ବଢ଼ାଇବା ସହିତ ଆଧୁନିକ କୌଶଳର ସମନ୍ବୟ ରଖିବା ଯାହାକି ଜନଜାତିଙ୍କ ସଂସ୍କୃତିର ସୁରକ୍ଷା ହୋଇପାରିବ ବୋଲି କୁହାଯାଇଥିଲା। ସରକାରୀ ସେବା ଗ୍ରାମବାସୀଙ୍କ ପହଞ୍ଚୁଥିବାକୁ ନିଶ୍ଚିତ କରିବା ହେଉଛି ସରକାର ଓ ଲୋକଙ୍କ ମଧ୍ୟରେ ସେତୁ ସ୍ଥାପନ କରିବା ବୋଲି ଏହି ଅଭିଯାନର ମୂଳ ଲକ୍ଷ୍ୟ ହୋଇପାରିବ।
ବୃତ୍ତିଗତ ପ୍ରଶିକ୍ଷଣ, ଉଦ୍ୟମିତା ଓ ନିଜେ-ରୋଜଗାର ସୁଯୋଗ ସୃଷ୍ଟି କରିବା ହିଁ ଜୀବିକା ଓ କୌଶଳ ବିକାଶ ବୋଲି କର୍ମଶାଳାରେ କୁହାଯାଇଥିଲା।
ଭାରତ ସରକାରଙ୍କ ଆଦିବାସୀ ବ୍ୟାପାର ବିଭାଗ ପକ୍ଷରୁ ଏହି କାର୍ଯ୍ୟକ୍ରମ କରାଯାଉଥିବା ବେଳେ ୨୦୩୬ ସୁଦ୍ଧା ବିକଶିତ ଓଡିଶା ଏବଂ ୨୦୪୭ ସୁଦ୍ଧା ବିକଶିତ ଭାରତ ଗଠନ ପାଇଁ ଏହି ଯୋଜନା ପ୍ରସ୍ତୁତ କରାଯାଉଛି। ଯାହାକି
ଆଦି କର୍ମଯୋଗୀ ଅଭିଯାନର ଲକ୍ଷ୍ୟ ହେଉଛି ଯୁବଶକ୍ତିଙ୍କୁ ସଶକ୍ତ କରିବା, ଲୋକଙ୍କୁ ଶାସନରେ ଅଂଶୀଦାର କରିବା ଓ ଆଦିବାସୀ ସମାଜର ସମଗ୍ର ଉନ୍ନତି କରିବା। ଏଥିପାଇଁ ଉକ୍ତ ବ୍ଲକର ୨୫ ପଞ୍ଚାୟତରେ ୪୪ଟି ଗ୍ରାମକୁ ଆଦି ଗ୍ରାମ ଭାବେ ଚୟନ କରାଯାଇଛି ଏବଂ ସେଠାରେ ଆଦି କେନ୍ଦ୍ର ଖୋଳାଯାଇ ଗାଁ ଲୋକଙ୍କ ବୈଠକ ଓ ଗାଁର ସର୍ବାଙ୍ଗୀନ ଉର୍ନ୍ନତି ପାଇଁ ସେଠାରେ ଆଲୋଚନା ଓ ନିଷ୍ପତି ଗ୍ରହଣ କରାଯାଇ ସରକାରଙ୍କୁ ଜଣାଯିବ। ସରକାର ମଧ୍ୟ ଗାଁ ଲୋକଙ୍କ ନିଷ୍ପତି ପ୍ରକାରେ ଗାଁର ବିକାଶ କରିପାରିବେ ବୋଲି କର୍ମଶାଳାରେ କୁହାଯାଇଥିଲା। କର୍ମଶାଳା ଆଜି ଉଦଯାପିତ ହେବ ବୋଲି ବିଡ଼ିଓ କହିଛନ୍ତି।
